LISHOMO 05
Ibibiliya ni ntenga wa Nnungu kwetu
Yeova anditupa wetu ishawadi yambone Ibibiliya, shawadi ayo ni lipungu lya mabuku—66 madikidiki. Panji inkuululika wako kulyudya doni: ‘Ibibiliya yalakadile kwashi? Mwene Ibibiliya nyani?’ Pakulota kunjang’ula vyakudya avi, tuke tumanye ntenga wa Nnungu uwikile dashi kwetu.
1. Ikava kenga vanu ni vaandíke Ibibiliya, mwaa shani tunkushidoni yanavo ni lilove lya Nnungu?
Ibibiliya yandikigwe na vanu 40 muwakati wa myaka 1.600, kwajangidya 1513 U.W.K. mpaka 98 W.K. Vaandíke Ibibiliya vave vanu vakuvilingananga. Ata ikava davo dimbande uti dinkwigwania. Shinu ashi shululike dashi? Indyululika mwaa Ibibiliya yalakadile kwa Nnungu. (Shomya 1 Vateshalonika 2:13.) Vanu avo havaandike makumbukililo lavo. Kuleka davo, vanavo ‘vandivalanganga kwalakela upande wake Nnungu valangalalegwa na imumu yanashwe’.a (2 Patulu 1:21) Nnungu atumila imumu yake yanashwe andivamanyia, na andivapa dimongo, pakulota vanu vaandike makumbukililo ake.— 2 Timoti 3:16.
2. Nnungu amwandikidile nyani Ibibiliya?
Ibibiliya, Nnungu avandikidile vanu uti “kula shilambo, likola, inangodi na venentete”. (Shomya Maono 14:6.) Ndyomana, Nnungu anditadya Ibibiliya ipatikane mu dinangodi dyoe kuliko mabuku lanji lapagwite. Mushilambo vanu uti vankuulula kushomya mitenga vyambone vyamu ibibiliya. Kwodananga ishemu yavanama na inangodi yavatangola.
3. Yeova ashilididye dashi Ibibiliya?
Ibibiliya indyandikigwa mu vinu vikanama wakati woe, kenga magwogwe na mapapatu a nnandi. Kanji vanu vakunagwaledya Ibibiliya vandyandika na upole woe namene. Vanu voe vadimongo vandilingangila kutimbanga Ibibiliya, kanji Yeova andishililidya lilove lyake na ngwengwe vandipagwa vanu valijawile pakulota kushililidya Ibibiliya. Yeova hannakile munu au shinu shoeshoe shitimbanga kutumanyia ntenga wake. Ibibiliya inkushidoni: “Lilove lya Nnungu wetu linkupagwa ngwengwe.”—Ishaiya 40:8.
LAMBELA KUMANYA VYOE
Lambela kumanya mwavatumilidile Nnungu vanu pakulota vaandike Ibibiliya, mwavashilididye na mwatandadile pakulota vanu uti vashomye lilove lyake.
4. Ibibiliya inkummalanga mwene
Lola VIDEO. Badae shomya 2 Timoti 3:16, na mwambangile mwaa vyakudya vya mwina.
Ikava kenga ni vanu vaandike Ibibiliya, mwaa shani inkushamegwa lilove lya Nnungu?
Wako unkwamini kenga Nnungu andivatuma vanu vaandike makumbukililo lake?
Mmadengo ankuulula kwaandika ibalugwa, kanji ntenga uve mu ibalugwa ni wa mwene lishilika.Nimumo momo, vanu ni vaandike Ibibiliya,kanji ntenga walakadile kwa Nnungu
5. Ibibiliya indyuvauvanga namene
Ikava kenga Ibibiliya ni ya Nnungu, kwa umwiu nae andishililidya. Maimyo lankulodya kenga, vanu vadimongo vandílingangila kutimbanga Ibibiliya. Vananangalaledi vadidini havashilota vanu vavenavo Ibibiliya. Na kupapatigwa ako, vanu voe vandílijaula pakulota kushililidya Ibibiliya. Tuke tummanye munu atandile davo, lola VIDEO, na badae mwambangile mwaa vyakudya vya mwina.
Wako inkukunagwela kushomya Ibibiliya ambi paumanyite kwaashilá shavatandile vanu pakulota kushililidya? Mwaa wa nyamani?
Shomya Dimu 119:97, na badae mwambangile mwaa vyakudya vya mwina:
Mwaa shani vanu voe vandilijaula pakulota kupindikula na kujava Ibibiliya?
6. Libuku lya vanu uti
Ibibiliya ni libuku lipindikuligwa na lya vajava namene kupunda mabuku lanji. Shomya Vitendo 10:34, 35, na badae mwambangile mwaa vyakudya vya mwina:
Mwaa shani Nnungu ankulota lilove lyake lipindikuligwe na vajavemu dinangodi dyoe?
Nyamani shaushanga wako kwaupande wa Ibibiliya?
Pepi
100%
Vanu vamushilambo uti
vankuulula kushomya Ibibiliya mu inangodiya vaigwa shana
Dinkupagwa dinangodi dyakuwika
3.000
Ibibiliya uti aukwa dimbande
5.000.000.000
Vakapime indipita inamba ya dibibiliya dipilimiligwe,
ni inamba ikumene kupunda mabuku lanji
VANU VANJI VANKUSHIDONI: “Ibibiliya ni libuku lyakala lyavaandike vanu.”
Wako wonela mwashi?
Nyamani shilodya kenga Ibibiliya ni lilove lya Nnungu?
KWAUNGWIPI
Ibibiliya ni lilove lya Nnungu, na nae anditadya vapate vanu uti.
Tukumbukilange
Ibibiliya ikavalanga kenga Nnungu avatumidile vanu pakulota vaandike Ibibiliya, manaake nyamani?
Nyamani shikunagwela wako kwaupande wa kupindikuligwa Ibibiliya, kujavika kwa Ibibiliya na kupita vyakukamadyanga vyoe?
Wako unkuligwa dashi paumanyite dimongo dyatandile Nnungu pakulota akumanyia ntenga wake?
LIPUNDISHE
Shomya kwaupande wa maimyo la mu Ibibiliya—kutunduvanga maandiko lakala mpaka kupindikuligwa kwa inangodi yanelo.
Lola Ibibiliya mwainamidile mu vyakukamadyanga vitatu vikumene.
Lola vyakukamadyanga vyavapitile vanu pakulota kupindikula Ibibiliya.
Ibibiliya vandikopiali na vandipindikula myanda vyoe. Wako ulota kwakikisha dashi kenga ntenga wake haubadilike?
“Je, Biblia Imebadilishwa au Kupotoshwa”?(Makala iliyo kwenye mtandao)
a Mu lishomo 07, tundauka nalipundisha kenga imumu yanashwe ni dimongo dyatumila Nnungu pakulota atende shalota.