Mwaa shani Nnungu andyumba shilambo shapai?

1. Mwaa shani Nnungu andyumba shilambo shapai?

Yeova andivapa vanu shilambo shapai pakulota live lyutu lyavo. Pavedoni, Nnungu havaumbile Adamu namu Eva pakulota kunama kuwa, mwaa nae andivaumba tayali vanjelo pakulota vaname kwanavo. (Jobi 38:4, 7) Nnungu animika munu ntandi mu ipalaishu yambone lishishamegwa liteka lya ku Edeni. (Kutunduvanga 2:15-17) Yeova animupa nae pamo na udukulu wake litala lyakuvanavo shingumi shikamalilika mu shilambo shapai.—Shomya Dimu 37:29; 115:16.

Kunantandi, liteka lya ku Edeni ni livele ipalaishu bai. Adamu namu Eva vakandivalakana, na kuumbadya shilambo shapai pamo na udukulu wake. Badae yake, vanavo vakandishunga shilambo uti shapai mpaka nava ipalaishu. (Kutunduvanga 1:28) Shilambo shapai mwiko ashibamalegwa. Shanavo shinauka ngwengwe liva lyutu lya vanu.—Shomya Dimu 104:5.

2. Mwaa shani nelo shilambo shapai hashinava shinu ipalaishu?

Adamu namu Eva havamwigwilidile Nnungu, ndyomana nae andivakumulanga mu liteka lya ku Edeni. Vanavo vandikatoka ipalaishu, na hapali munu aulwile kujidya kavili. Kutunduvangila apo, shilambo shinkutawaligwa na vakalau.—Jobi 9:24.—Shomya Kutunduvanga 3:23, 24.

Dá shana Yeova anditatakela kutandedya malotelo ake pameo pa vanu? Mene! Nae ni Wadimongo-uti, na hanakowa. (Ishaiya 45:18) Nnungu anatandedya malotelo ake pameo pa vanu.—Shomya Dimu 37:11, 34.

3. Ipalaishu ilota kuujila duvani kavili?

Ipalaishu inaujila kavili Yesu palota kutawala mu shilambo shapai. Mu ing’ondo yavashema Alimagedoni, Yesu anavalangalalela vanjelo pakulota kuvabamola vammongo vamwe Nnungu. Baada ya apo, Yesu ananjela Shatwani nkalaboshi mu myaka 1.000. Venentete vamwe Nnungu vandaambwalegwa mwaa Yesu anavalangalalela na kuvashililidya. Vanavo vananama myaka vikamalilika mu Ipalaishu ya mu shilambo shapai.—Shomya Maono 20:1-3; 21:3, 4.

4. Mauvilo alota kumalilika duvani?

Nnungu alota kumalila duvani mauvilo amushilambo shapai? Yesu andilodya “shimanyikilo” pakulota vanu vamanye kenga mwisho undivandika. Vinu vitandeka nelo vinkuvaleka vanu mushijaidyo, na doni vinkulodya shalowa kenga tunkunama mmaduva la mwisho.—Shomya Mateu 24:3, 7-14, 21, 22.

Yesu anamalidya mauvilo uti amushilambo shapai mumyaka 1.000 ya utawala wake wa kuwa. (Ishaiya 9:6, 7; 11:9) Yesu anava nanangalaledi, na yadavo anava Nkúlangalalela-shadaka na analivaliva madambi lavanu uti kwa avalá vanagwaledya Nnungu. Napavedoni, kupitila kwake Yesu, Nnungu anamalidya malwele, kukangapala na kupela.—Shomya Ishaiya 25:8; 33:24.

5. Nyani alota kunama ku Ipalaishu?

Vanu vamwigwilila Nnungu vandanama ku Ipalaishu. (1 Nshuwau 2:17) Yesu andivatumidya vakwoda vake pakulota vavalambele vanu vakulimaladya na kuvapundisha pakulota vatandedye malotelo a Nnungu. Nelo, Yeova ankuvapanganianga vanu vakwinjipa pakulota vakaname mu Ipalaishu yamushilambo shapai. (Soponiya 2:3) Muding’ande dya Utawala dya Mashaidi va Yeova, valume vankulipundisha mwashi mwakuvashungila vadyavave na vanavavo, na momo vakongwe vankulipundisha mwashi mwakulota kushungila shana likola lyavo. Vana na vatatamunu vankulipudya kwa unapamo kwake Nnungu, na vankulipundisha kuvanavo likola lyambone kwa mwaa wa mapundisho a Nnungu.—Shomya Mikeya 4:1-4.