LISHOMO 6
Munu akapela shintandeka nyamani?
1. Ni mitenga shani vyambone kwa avalá vapadile?
Yesu pawikile ku Betaniya, pepi na ku Yelusalemu, aninkodya muje Lashalu ápadile na lapitile maduva nsheshe. Yesu andyúka kulikabuli lyake Lashalu pamo namu Malita namu Maliya, valumbuvake Lashalu. Muwakati padiki, vanu vandikadyanianga. Kumbukila lipuwilo lyavavenavo Malita namu Maliya baada yakumwona Yesu andyúwa Lashalu!—Shomya Nshuwau 11:21-24, 38-44.
Malita andimanya mitenga vyambone kwa avalá vapadile. Nae andimanya kenga Yeova anavatakatuwa vapadile pakulota vaname kavili mushilambo shapai.—Shomya Jobi 14:14, 15.
2. Vanu vakapela shivatandeka nyamani?
Nnungu animwaulila Adamu kushidoni: ‘Wako ni litutunga, bai undaujila kavili kuva litutunga.’—KUTUNDUVANGA 3:19.
Vanu vandyumbigwa na litutunga. (Kutunduvanga 2:7; 3:19) Wetu ni tuvanu tuvenavo mili wainyama. Hashipali shinu shoeshoe shinama baada yakupela. Muwakati watupela, ututuli wetu unapela, na makumbukililo letu lanamalilika. Ni ndyomana Lashalu havalenge shinu pakati pakupela, mwaa nae hamanyite shoeshoe.—Shomya Dimu 146:4; Nkúvalanga 9:5, 6, 10.
Dá shana Nnungu anavauvyanga vanu na moto baada yakupela? Mene! Mwaa Ibibiliya inkuvalanga kenga vapadile hashipali shavamanya. Napavedoni, lipundisho lyakushidoni Nnungu anavauvyanga vanu na moto ni lipundisho lyakushang’apa, linkunyatiyanga lina lya Nnungu. Shitendo shakuvauvyanga vanu na moto ni ushaapu kwake Nnungu.—Shomya Yelemiya 7:31.
3. Dá vapadile vankulula kutangola namu wetu?
Vapadile havanatangola na havanaigwa. (Dimu 115:17) Kanji, vanjelo vanji vakunyata. Vanavo vanatangola na vanu, valitenda kenga avalá vapadile. (2 Patulu 2:4) Yeova analeya vanu vangumi kutangola na vakupela.—Shomya Kumbukumbu 18:10, 11.
4. Nyani alota kudyuka?
Dimbumba dya vanu voe vapadile, vandadyúka kunama kavili mushilambo shapai. Ata avalá vatandile vinu vyakunyata bila kummanya Nnungu, na momo vandadyúka.—Shomya Lukashi 23:43; Vitendo 24:15.
Vanu valota kudyuka, vanalipundisha umwiu umwe Nnungu na kunkulupila Yesu kwa kumwigwilila. (Maono 20:11-13) Vanu valota kudyuka na kutandedya vinu vyambone, vandanama mushilambo shapai myaka vikamalilika.—Shomya Nshuwau 5:28, 29.
5. Kudyuka kunkutupundisha nyamani kwa upande umwe Yeova?
Nnungu andijaula lilindililo kwa vanu vapadile pakuntumidya Mwanagwe Yesu, napela kwa mwaa wetu. Napavedoni, lilindililo lya kudyuka kwa vapadile linkutupundisha kenga Yeova ni wambone na ankutunagwaledya. Pavalotakudyuka vanu vapadile, wako akunagwadile umwone nyani?—Shomya Nshuwau 3:16; Valoma 6:23.