LISHOMO 29
Munu akapela shintandeka nyamani?
Da wako undiwai kunkatoka munu waunnagwaledya namene mu kupela? Muwakati wakupwateka kenga awo wako unkuulula kulyudya doni: ‘Munu akapela shintandeka nyamani? Da linkupagwa lilindililo lyakuvona kavili valikola vetu vatuvanagwaledya vapadile?’ Mu lishomo ali na lishomo lyaatika tundauka ndona majibu lakupambadyanga la mu Ibibiliya.
1. Munu akapela shintandeka nyamani?
Yesu andilinganianga kupela na lwono. Munu akava mu lwono hanamanya nyamani shitandeka. Kupela kunkulingana dashi na lwono? Munu akapela, hanaona kumpwateka. Nae hanaligwa kuva gweka, ata ikava kenga ashínavanagwaledya namene vambodi na valikola vake. Ibibiliya inkushidoni ‘Vakupela hashipali shavamanya shoeshoe.’—Shomya Nkúvalanga 9:5.
2. Tunkupata ipaida shani kwa kumanya umwiu kwaupande wakupela?
Vanu voe vankujopa kupela—na mpaka vanavajopa vanu vapadile! Kanji wako unkuulula kupata lipambadyangidyo kwa ashilá shivalanga Ibibiliya kwaupande wakupela. Yesu atedoni: “Umwiu wo, unamwambola.” (Nshuwau 8:32) Didini dyoe dipundisha kenga shipali shinu shinanama baada ya munu kupela, kanji au haunava shinu umwiu upundisha Ibibiliya. Munu akapela hanauvauvanga. Nayadavo vapadile hashipali shinu shavamanya na vanavo havaulula shinu kutuvyauvyanga. Ndyomana wetu haituvaikidile tuvajope vanu vapadile na ata kulipudya kwavo vanavo.
Vanu vanji vaashidoni vanaulula kutangola na vanu vapadile. Kanji shinu asho hashululika. Kenga tundilipundisha, vapadile “hashipali shavamanya shoeshoe.” Avalá vakumbukila kenga vankutangola na vanu vapadile, kwaumwiu vankutangola na vandamoni vanalitenda kuva munu apadile. Ivedoni, kumanya umwiu kwaupande wakupela kunkuulula kutushililidya kwa vandamoni. Yeova ankutuleya wetu pakulota hatunatangole na vanu vapadile mwaa nae ankumanya kenga kutangola na vandamoni ni shinu shakujowa.—Shomya Kumbukumbu 18:10-12.
LAMBELA KUMANYA VYOE
Manya nyamani shipundisha Ibibiliya kwaupande wakupela, na nanowanga likulupililo lyako kwa Nnungu walinagwaledyo hakavauvyanga vanu vakupela.
3. Manya umwiu kwaupande shinantandeka munu akapela
Vanu mushilambo, vankwamini vinu vyakuvilingananga kwaupande wa ashilá shinantandeka munu akapela. Kwaumwiu kwamini ako akunava shinu kwiu.
Vyakwamini shani vipagwite palikaja lyaunama kwaupande wa ashilá shinantandeka munu akapela?
Pakulota umanye ashilá shipundisha Ibibiliya, lola VIDEO.
Shomya Nkúvalanga 3:20, na badae mwambangile mwaa vyakudya vya mwina:
Kulingana na lyaandiko ali, munu akapela shintandeka nyamani?
Da ipali imbande ya mili inauka mushu inama baada ya munu kupela?
Ibibiliya inkutwaulila kwaupande wakupela kumwe Lashalu muje Yesu. Paulota kunshomya Nshuwau 11:11-14, lola mwashi mwavalaléle Lashalu baada ya kupela. Badae mwambangile mwaa vyakudya vya mwina:
Yesu alinganienge kupela na nyamani?
Kulinganianga aku kunkutulodya nyamani kwaupande wa ashilá shinantadeka munu akapela?
Wako unkuligwa dashi kwa kumanya ashilá shivalanga Ibibiliya kwaupande wakupela?
4. Kumanya umwiu kwaupande wakupela kunkutupa ipaida
Kumanya umwiu kwaupande wakupela kunkutupwashela wetu mene kuvajopa vapadile. Shomya Nkúvalanga 9:10, na badae mwambangile mwaa shakudya sha mwina:
Da vapadile vankuulula kutuvyanga?
Tukakulupila umwiu uvele mu Ibibiliya wetu hatuka shinu naduwangigwa kenga ituvaikidile tuvapuwangidye na tulipudye kwa vakupela . Shomya Ishaiya 8:19 na Maono 4:11, na badae mwambangile mwaa shakudya sha mwina:
Wako wona kenga Yeova ankuligwa dashi kwaupande wa vanu valipudya au valambela lipwashalelo lya vakupela?
Umwiu kwaupande wakupela unkutwambola wetu mu diyadi dikannagwela Yeova
5. Umwiu kwaupande wakupela unkutupambadyanga
Vanu voe vandivapundisha kenga vakapela vandauka navauvyanga kwamwaa wa vitendo vyavo vyakunyata vyakala. Kanji wetu tunkupata lipambadyangidyo kwa kumanya kenga hapali hanauva baada ya kupela—ata munu atandile vinu vyakunyata. Shomya Valoma 6:7, na badae mwambangile mwaa shakudya sha mwina:
Ibibiliya inkutwaulila kenga munu akapela, Nnungu hanamwona kuva wamakosha kwamwaa wa madambi ake. Wako wona kenga vapadile vankuvauvanga kwamwaa wa makosha lavo lavatandile kala?
Patuka mushu tummanya shana Yeova, tunauka nanalela kenga nae mwiko hanavauvyanga vapadile. Shomya Kumbukumbu 32:4 na 1 Nshuwau 4:8, na badae mwambangile mwaa vyakudya vya mwina:
Da Nnungu avenavo mavalelo lavavalanga mu mishitali avi, ankuulula kuvauvyanga vapadile?
Da wako wona kenga ni shinu shakupambadyanga kumanya umwiu kwaupande wakupela? Mwaa wa nyamani?
VANU VANJI VANKUSHIDONI: “Nangu ninkujopa nikakumbukila nyamani shilota kungutandeka baada ya kupela.”
Mishitali shani vyaulota kutumila pakulota kuvapambadyanga vanu kwaupande wakupela?
KWAUNGWIPI
Munu akapela, shingumi shake shinamalilika. Vapadile havanauvauvanga shinu, na havaulula kuvatenda shakunyata vangumi.
Tukumbukilange
Munu akapela shintandeka nyamani?
Umwiu kwaupande wakupela unkutupa ipaida shani?
Umwiu kwaupande wakupela unkutupambadyanga dashi?
LIPUNDISHE
Manya lilove “ungumi” mana ake nyamani mu Ibibiliya.
Da Nnungu andavauvyanga vanu ku moto wa mauvilo?
Da wetu indituvaikila tuvajope vapadile?
Roho za Wafu—Je, Zaweza Kukusaidia au Kukuumiza? Je Ziko Kweli? (broshua)
Manya mwashi nnume jumo mwaukidile ndapata lipambadyangidyo, baada yakulipundisha umwiu kwaupande wa ashilá shinantandeka munu akapela.
“Nilivutiwa na majibu ya Biblia yaliyo wazi na yanayoeleweka” (Mnara wa Mlinzi, Februari 1, 2015)