Nnungu Ankuvanavo Malotelo Shani Kwetu?

WAKATI wawona au wawigwa dyabali, undavanavo limanyilo lyavinu vyoe vyakunyata vitandeka nelo mushilambo kenga ing’ondo, ukalau pamo na upidi. Au kwali unkuvauvanga kwamwaa wa shilwele au andikupalela munu waunagwaledya.

Unkuulula kulyudya:

• Da shinamilo ashi ni shalota Nnungu kwangu pamo na likola lyangu?

• Shilota kungupwashela nyamani pakulota nguulule kupililila matatisho langu?

• Da inkuululika kupagwa amani mushilambo?

Ibibiliya inkujang’ula vyakudya avi.

IBIBILIYA INKUVALANGA KENGA NNUNGU ANATANDEDYA VINU VYAMBONE MUSHILAMBO SHAPAI.

• Hakupagwa kupwateka, kukangapala au kupela.—Maono 21:4

• Ákawena andawena.—Ishaiya 35:6

• Vákalola vandalola.—Ishaiya 35:5

• Vapadile vandadyuka.—Nshuwau 5:28, 29

• Hapali alota kuva nnwele.—Ishaiya 33:24

• Vanu uti vandavanavo shakulya shoe.—Dimu 72:16

  

MANYA SHITANGALEKA MU IBIBILIYA

Unkuulula kwona kenga vyalivikidile Nnungu kutandedya mushilambo shapai kuva vinu vyadimbenje. Kanji Nnungu ankuvalanga kenga muwakati wakuvandika andauka natandedya uti vyalivikidile. Ibibiliya inkuvalanga mwashi mwalota kutandela.

Kuleka avyo, Ibibiliya inkutupundisha mwashi mwakupatila lipuwilo ambi. Kumbukila vinu vikwangaisha, kenga matatisho a njuluku, au na likola, vilwele au kupela kwa mulikola wako kwali mujo waunagwaledya. Ibibiliya inakupwashela pakulota ulipililile matatisho alo. Nayadavo, inakunagwela kumanya kenga Ibibiliya inkujang’ula vyakudya kenga avi:

• Mwaa shani tunkuvauvanga?

• Tulota kupililila dashi matatisho etu?

• Likola lyako lilota kupata dashi lipuwilo?

• Munu akapela shintandeka nyamani?

• Tunkuulula kuvaona kavili vanu vapadile?

• Tulota kukulupila dashi kenga Nnungu anatandedya vinu uti vyalivikidile?

Ukava kenga unkushomya libuku ali, unkulota umanye shitangaleka mu Ibibiliya. Libuku ali linakupwashela. Kula lipungu vipali vyakudya vilota kukupwashela pakulota wigwe shana Ibibiliya. Dimiliyoni dyavanu voe indivanagwela lipwashalelo lyavapatile na Mashaidi va Yeova pakulota kwigwa shana Ibibiliya. Tunkukulindila wako yadavo ikunagwele lipwashalelo ali. Tunkukulatela yadavo Nnungu akwalaliye kwamwaa wakulikanyalidya pakulota wigwe shana Ibibiliya!