LISHOMO 8
Mwaa shani mushilambo andinjipa mauvilo?
1. Mauvilo latunduvenge dashi?
Nnungu andivaleka vanu vatawale muwakati padiki pakulota kulodya shalowa kenga vanao havaulula kumalila matatishoa vanu
Mauvilo landitunduvanga mushilambo shapai wakati Shatwani panduwenge Eva. Kunnantandi Shatwani nae avele njelo wakwaloka na wambone, kanji nae “haukile mushu nkati muumwiu.” (Nshuwau 8:44) Nae andikulumuwa lilotelo lyakulota vanu valipúdye kwake nae kuliko Nnungu. Shatwani aninduwanga nkongwe ntandi, Eva, na kuntanga pakulota amwigwilile nae kuliko kumwigwilila Nnungu. Adamu animungila nkono Eva pakulota hanamwigwilile Nnungu. Shatandile Adamu shindidanavo mauvilo na kupela.—Shomya Kutunduvanga 3:1-6, 19.
Shatwani patangwele namu Eva pakulota hanamwigwilile Nnungu, nae ashilota vanu vatunduvange kuvangedya ishilikali ya Nnungu. Vanu voe vándikala upande umwe Shatwani vaíta kutawaligwa namu Nnungu. Pavedoni, Shatwani nae andiva “nkútawala washilambo ashi.”—Shomya Nshuwau 14:30; 1 Nshuwau 5:19.
2. Dá Nnungu havaumbile shana vanu na vanjelo?
Mene! Uti vyaumbile Nnungu vivele vyambone. Vanu na vanjelo vaumbigwe na Nnungu vanavo vakandyúlula kumwigwilila Nnungu muwambone. (Kumbukumbu 32:4, 5) Kanji Nnungu andituumba na kutupa ulu wakutandola kutenda vinu vyakunyata au kutenda vinu vyambone. Ulu awo unkutupatiya litala lyakulodya linagwaledyo lyetu kwa Nnungu.—Shomya Tiyagu 1:13-15; 1 Nshuwau 5:3.
3. Mwaa shani Nnungu ankuleka mauvilo mushilambo?
Kwa wakati padiki, Yeova ankuvaleka vanu vavangedya ishilikali yake. Mwaa wanyamani? Pakulota vanu vamanye kenga hashipali shilota kúka shana kwabila kukubali kutawaligwa na Nnungu. (Nkúvalanga 7:29; 8:9) Vikapite myaka 6.000 tangu kupagwa kwa vanu, inkwaneka ngala kenga dishilikali dya vanu hadyulwile kumalidya ding’ondo, ukalau, ungave ishaliya au malwele.—Shomya Yelemiya 10:23; Valoma 9:17.
Kuvilingananga kwa dishilikali dya vanu, ishilikali ya Nnungu inkuvapa wambone kwa vanu valota kutawaligwa na yanavo. (Ishaiya 48:17, 18) Muwakati wakuvandika, Yeova anabamola dishilikali uti dya vanu. Vanu valota kukubali kutawaligwa na Nnungu ni vanavo bai valota kunama mushilambo shapai.—Ishaiya 11:9.—Shomya Daniyele 2:44.
4. Upole umwe Nnungu unkutupa litala shani?
Shatwani anditangola kushidoni hapali munu alota kuntumikila Yeova kwa linagwaledyo. Kanji wako unkulula kulodya kenga shinu ashi ni ushwang’a! Upole umwe Yeova unkutupatiya litala lyakulota kukubali kutawaligwa na Nnungu au vanu. Vinu vyatutenda nkati mushinamilo shetu vinkulodya nyani atutawala.—Shomya Jobi 1:8-12; Mikong’o 27:11.
5. Tulota kulilodya dashi kenga tunkulota kutawaligwa na Nnungu?
Vinu vyatutenda vinkulodya kenga Nnungu ni Nkútawala wetu au mene
Tunkulula kuntandola Nnungu kuva Nkútawala wetu nkati munkulinjidyanga mu idini ya umwiu kwadananga na mwaitangalela Ibibiliya. (Nshuwau 4:23) Tunkulula kumpinga Shatwani kwa mwaa mene kulinjidyanga nkati mushiyasa na ding’ondo, kenga momo mwatandadile Yesu.—Shomya Nshuwau 17:14.
Shatwani ankutumila dimongo dyake avatadya vanu vatende vinu vyakunyata. Wetu tukapinga vinu kenga avi, vambodi vanji na valikola vankulula kutweludyanga au kutuvangedya. (1 Patulu 4:3, 4) Kanji wetu ibidi tutandole shinu shimo, kutenda vinu vyavalota vanu au vyalota Nnungu. Shatwani anditangola kushidoni vanu vakandileka kuntumikila Nnungu kwa mwaa wakuvauvanga. Kanji wetu tukamwigwilila Nnungu pamo na mauvilo letu, wetu tunalodya kenga Shatwani nae ni nkúshang’apa.—Shomya 1 Vakolintu 6:9, 10; 15:33.
Linagwaledyo lyake Nnungu pameo pa vanu linkulodya shalowa kenga nae anauka namalidya mauvilo. Avalá vakulupila vinu avi vandanama mushilambo shapai mu myaka vikamalilika.—Shomya Nshuwau 3:16.