LISHOMO 11

Kutangola na lipuwilo

Valoma 12:11

IKUVAIKIDILE UTENDE DASHI: Vatadye vanu kuvanavo amu na vape dimongo vanu vakwigwilíla kwakutangola na lipuwilo.

Tangola mukwigwiniya. Muwakati waulipanganianga pakulota kuka ku kwandadya ntenga, kumbukila manaake ntenga wauvenavo. Lambela kumanya shana mwaa wako pakulota ukaulule kutangola na ntima wako uti.
Vakumbukile vanu vakwigwilíla. Kumbukilanga ntenga wauka nashomya au kupundisha uvele na paida shani kwavanu vanji. Lambela inamuna yakuka ndavalanganga ntenga awo kwaindila ya kuvatadya vanu vakwigwilíla kukulupila shauka ndavalanganga.
Tangola na dimongo. Tangola na lipuwilo. Tumila makono lako, ing’ope na dimbande dinji dyamili, pakulota ulodye kenga unkukulupila ashilá shaupundisha.

Lilaledye pakulota haunavababaishange vanu vakwigwilíla kwa kutumila shimanyikilo shimo shosho kula wakati. Tumila shimanyikilo sha mili mwako kulingana na ashilá shautangola. Tangola na lipuwilo, kupunda namene muwakati waupundisha imbande ikumene, na vape dimongo vanu vakwigwilíla pakulota vavikile mmitendo. Haunavatadye vanu vakwigwilíla kukudoba kwamwaa wakutangola shinu shimo shosho kunantandi mpaka kumwisho wa mwaa wako.