LISHOMO 12
Nyamani shilota kukupwashela wako kuka mushu ulipundisha Ibibiliya?
Lipundisho lya Ibibiliya ni kenga mwanda wakuka kushu. Pavedoni, myanda vinji inkuululika kukamadyanga. Wako unkuulula kulyudya ikava kenga undauka mushu ulipundisha Ibibiliya. Mwaa shani ni shambone kulikanyalidya kuka mushu? Nyamani shilota kukupwashela wako kupililila ata lakapagwa matatisho?
1. Mwaa shani kulipundisha Ibibiliya ni shinu shambone?
“Mwaa lilove lyake Nnungu lingumi na linkuvanavo dimongo.” (Vabalaniya 4:12) Ibibiliya inkuvanavo mana makumene mwaa inkulodya makumbukililo na mwaligwidya Nnungu kwaupande wako. Yanavo indakupwashela wako kuvanavo limanyilo na lilindililo liu. Kupunda namene Ibibiliya, indakupwashela wako kuva mbodi wake Yeova. Muwakati waulipundisha Ibibiliya, wako unaleka dimongo dive mwanavo ditadya shingumi shako kuva shambone.
2. Mwaa shani ni shambone kutumbyanga umwiu wamu Ibibiliya?
Umwiu wamu Ibibiliya ni kenga lijanga lya mali. Ni ndyomana Ibibiliya inkutupa ntima shii pakulota wetu ‘tushume umwiu na mwiko hatunalote kushumidya.’ (Mikong’o 23:23) Wetu tukakumbukila mana lapagwite mu umwiu wamu Ibibiliya, tunalikanyalidya kuka mushu tulipundisha—ata ikava kenga vinkutukodya vyakukamadyanga.—Shomya Mikong’o 2:4, 5.
3. Yeova alota kukupwashela dashi pakulota uke mushu ulipundisha?
Namalunda Wapashanya-uti ni Yeova mbodi wako, nae ankulota kukupwashela wako pakulota uke mushu ulipundisha kwaupande wake. Nae andakupa wako “lilotelo na kutandedya kwodananavo amulá munnagwéla nae.” (Shomya Vapilipo 2:13.) Pavedoni, ikava kenga unkulota uvenavo lilotelo pakulota ulipundishe au uvikile mmitendo avilá vyaulipundisha, Yeova anakupwashela. Ikava kenga unkupita vyakukamadyanga au kupapatigwa, nae anakupa dimongo pakulota uteme. Ngwengwe njugwe Yeova mukushwali pakulota akupwashele wako kuka mushu ulipundisha Ibibiliya.—1 Vateshalonika 5:17.
LAMBELA KUMANYA VYOE
Manya mwashi mwakukila mushu ulipundisha Ibibiliya ata ikava kenga unkupapatigwa na vanu vanji. Lola mwashi Yeova mwalota kukupwashalela wako pakulota uke mushu ulipundisha Ibibiliya.
4. Vika lyutu litandi lipundisho lyako lya Ibibiliya
Myanda vinji unkuulula kwona kenga unkuvanavo vyakutenda vyoe na hauvenavo litala pakulota kulipundisha Ibibiliya. Shilota kukupwashela nyamani? Shomya Vapilipo 1:10, na badae mwambangile mwaa vyakudya vya mwina:
Nyamani vyawona wako kuva “vinu vive na mana makumene” mushingumi?
Wako ulota kuvika dashi lipundisho lyako lya Ibibiliya palyutu litandi?
Ikava kenga wako unkumbadya dimbwe mulidovo badae kutwala kuvika majanga, majanga alo halaikala shinu
Kanji wako ukatunduvanga kuvika majanga, lindabakila litala lyakutaja dimbwe. Kulingana na mpano au, wako ukatunduvanga “vinu vive na mana makumene” mushingumi, undapagwa wakati wakulota kutenda vinu vinji
Lipundisho lya Ibibiliya linkwangangola vyatulota mu imumu—yani vyatulota kumanya kwaupande wa kulipudya kwake Nnungu. Shomya Mateu 5:3, na badae mwambangile mwaa shakudya sha mwina:
Tulota kupata ipaida shani tukavika lipundisho lyetu palyutu litandi?
5. Haunanneke munu akutadya wako kuleka kulipundisha
Myanda vinji, vanu vanji vankuulula kukupungula dimongo pakulota haunalipundishe Ibibiliya. Lola mpano umwe Francesco. Lola VIDEO, na badae mwambangile mwaa vyakudya vya mwina.
Mu video, vambodi na valikola vake Francesco vatandíle nyamani baada nae kuvaulila vyalipundisha?
Inudyo shani yapatile kwamwaa wakupililila?
Shomya 2 Timoti 2:24, 25, na badae mwambangile mwaa vyakudya vya mwina:
Valikola vako na vambodi vankuligwa dashi kwaupande wa vinu vyaulipundisha?
Kulingana na mishitali avi, ulota kujang’ula dashi ikava kenga apali hakalota wako ulipundishe Ibibiliya? Mwaa wa nyamani?
6. Nkulupile Yeova kenga andakupwashela
Wetu tukammandika Yeova, lilotelo lyetu lyakumpuwangidya nae lindanjadyeka. Ata ikava davo, inkuululika kukamadyanga kutenda mabadiliko mushingumi shetu pakulota kunama kulingana na malotelo lake. Ikava kenga wako unkuligwa davo, haunadobe. Yeova andakupwashela. Lola VIDEO, na badae mwambangile mwaa vyakudya vya mwina.
Mu video, mabadiliko shani latandile Jim pakulota kumpuwangidya Yeova?
Nyamani shikunagwadile wako kwaupande wa mpano awo?
Shomya Vabalaniya 11:6, na badae mwambangile mwaa vyakudya vya mwina:
Yeova alota kutenda nyamani kwa avalá “vammandika nae na kunkulupila”—au avalá valikanyalidya pakulota kummanya na kumpuwangidya?
Wako wona kenga Yeova ankuligwa dashi pakwona ulikanyalidya pakulota kulipundisha Ibibiliya?
VANU VANJI VANKUULULA KUDYA: “Mwaa shani wako unkulipundisha Ibibiliya?”
Wako ulota kujang’ula dashi?
KWAUNGWIPI
Kwaumwiu kulipundisha Ibibiliya vinkupagwa vyakukamadyanga, kanji ukalipundisha indakupwashela wako ngwengwe kupuwanga. Wena mushu unkulupila Yeova na nae andakwalaliya.
Tukumbukilange
Mwaa shani umwiu wamu Ibibiliya ni kenga lijanga lya mali kwako?
Wako ulota kulodya dashi kenga unkutumbyanga “vinu vive na mana makumene”?
Mwaa shani ivaikidile ujugwe lipwashalelo kumwe Yeova pakulota uke mushu ulipundisha Ibibiliya?
LIPUNDISHE
Shomya kwaupande wa midimu nshenshe vivapwashadile vanu voe kutumila shana wakati.
“Jinsi ya Kutumia Wakati Wako Vizuri” (Amkeni!, februari 2014)
Ntwagwe Grace hashimanya shana mwaa shani ndyagwe ashinalikanyalidya kumpuwangidya Nnungu. Lola mwashi Yeova mwampwashaladile Grace.
Yeova anatupa dimongo pakulota tuulule kupililila matatisho loeloe (5:05)
Nnole nnume mwapatidile lipwashalelo kwamwaa wa kulipililila kwa ndyagwe.
Myanda vinji Mashaidi va Yeova vanavatambudyanga kutimbanga makola. Kanji shinu ashi shiu?
“Je, Mashaidi wa Yeova Huvunja Familia au Huziimarisha?” (Makala iliyo kwenye mtandao)