LISHOMO 47
Wako uvele tayali pakulota kubatishwa?
Wako undilipundisha vinu vyoe kwaupande umwe Yeova kupitila lipundisho lyako lya Ibibiliya. Inkuululika wako unditenda mabadiliko mushingumi pakulota kuvikila mmitendo avilá vyaulipundishidye. Kanji vinkuulula kupagwa vinu vikutadya wako haunalijaule kumwe Yeova na kubatishwa. Mu lishomo ali tunauka namanya vinu vikutadya wako haunabatishwe na mwashi mwakutamela vinu avyo.
1. Da inkulateka kumanya vinu uti kwaupande wa Ibibiliya pakulota kubatishwa?
Pakulota ubatishwe ivaikidile uvenavo “limanyilo lya kumanya umwiu.” (1 Timoti 2:4) Kanji asho hashinalodya shinu kenga ivaikidile umanye kujang’ula vyakudya uti vyavanatenda kwaupande wa Ibibiliya pakulota kubatishwa. Mwaa ata avalá vabatishigwe mu myaka vipitile kunyuma vankuka mushu valipundisha kwaupande umwe Yeova. (Vakoloshu 1:9, 10) Kanji wako ivaikidile umanye mapundisho makumene la mu Lilove lya Nnungu, Ibibiliya. Vanang’olo vashipinga vandauka nakupwashela pakulota vamanye ikava kenga undilipundisha pakutosha pakulota ubatishwe.
2. Vinu shani vivaikidile utende ukanava kubatishwa?
Ukanava kubatishwa, wako ikuvaikidile “ulyambile . . . na ushiliuke.” (Shomya Vitendo 3:19.) Asho mana ake ulyambile na ntima wako uti, vinu vyakunyata vyautandile kala na unjugwe Yeova akulivalive madambi lako. Namomo mana ake undyamuwa kunama kulingana na malotelo lake Yeova na hautenda vinu vyavalanga nae kenga vyakunyata. Shinu shinji shikuvaikidile wako utende ni kupagwa ku mikutano na kwandadya mitenga vyambone pamo na shipinga.
3. Mwaa shani haivaikidile ujope kubatishwa?
Vanu vanji vanajopa mene kuulula kutandedya vinu uti vyavalivikidile kumwe Yeova. Kwaumwiu, myanda vinji wako inkuululika kukowa, mwaa ata mpaka valume na vakongwe vavalangangigwa mu Ibibiliya vashinakowa. Kanji kumbukila kenga Yeova hanavalindila shinu vatumika vake vave vakwaloka. (Shomya Dimu 103:13, 14.) Nae anapuwanga namene pakwona wako ulikanyalidya kutenda ashilá shauulula! Nae anauka nakupwashela. Na kwaumwiu Yeova ankutupa wakika au aashidoni: hashipali “shilota kuulula kutwapukanianga na linagwaledyo lyake.”—Shomya Valoma 8:38, 39.
LAMBELA KUMANYA VYOE
Kummanya shana Yeova na kukubali lipwashalelo lyake kundauka nakupwashela wako kuvanavo dimongo pakulota uteme vinu uti vikutadya wako haunabatishwe.
4. Mmanye shana Yeova
Mpaka pashi pavaikidile wako ummanye shana Yeova ukanava kubatishwa? Ikuvaikidile ummanye shana Yeova mpaka unnagwaledye na ulote kumpuwangidya. Lola VIDEO pakulota umanye shavatandile vashikola va Ibibiliya mushilambo uti pakulota kummanya shana Yeova. Badae mwambangile mwaa shakudya sha mwina.
Kulingana na video, nyamani shivapwashadile vanu voe kulipanganianga pakulota kubatishwa?
Shomya Valoma 12:2, na badae mwambangile mwaa vyakudya vya mwina:
Da wako unkwambambidya shipundisha Ibibiliya? Da wako unkwambambidya kenga Mashaidi va Yeova vankupundisha umwiu?
Ikava kenga unkwambambidya, ikuvaikidile utende nyamani?
5. Tema shinu shoeshoe shikutadya wako haunabatishwe
Uti wetu tunkupitila vyakukamadyanga muwakati watulijaula kumwe Yeova na kubatishwa. Pakulota kulola mpano, lola VIDEO, na badae mwambangile mwaa vyakudya vya mwina.
Kulingana na video, vyakukamadyanga shani vyatamile Narangerel pakulota kuntumikila Yeova?
Linagwaledyo lyavénavo Narangerel lyukile nampwashela dashi kutema vyakukamadyanga avyo?
Shomya Mikong’o 29:25 na 2 Timoti 1:7, na badae mwambangile mwaa shakudya sha mwina:
Nyamani shitupa ntima shii pakulota kutema vyakukamadyanga?
6. Kulupila lipwashalelo limwe Yeova
Yeova andakupwashela kumpuwangidya nae. Lola VIDEO, na badae mwambangile mwaa vyakudya vya mwina.
Kulingana na video, nyamani shishintadya nshikola wa Ibibiliya hanabatishwe?
Nyamani shimpwashadile kunanowanga likulupililo lyake kumwe Yeova?
Shomya Ishaiya 41:10, 13, na badae mwambangile mwaa shakudya sha mwina:
Ikava kenga wako undilijaula kumwe Yeova, ulota kuvanavo dashi wakika kenga unatandedya uti vyaulivikidile?
7. Anjedya kulambwalela kwako kwa linagwaledyo limwe Yeova
Kukumbukilanga linagwaledyo limwe Yeova, kunauka nanjedya kulambwalela kwako na kuvanavo lilotelo lyakuntumikila nae mu maduva uti. Shomya Dimu 40:5, na badae mwambangile mwaa shakudya sha mwina:
Dinudyo shani dimwe Yeova divele dyapagweka kwako?
Nkúlava Yelemiya ashínannagwaledya Yeova na lilove lyake, na ashínatumbyanga namene ibati yavénavo yakuntumikila Yeova. Yelemiya atedoni: ‘Lilove lyako lindiva kupuwanga na lipuwilo muntima mwangu, mwaa ninkushamegwa kwa lina lyako, Ee Yeova Nnungu.’ (Yelemiya 15:16) Jang’ula vyakudya vya mwina:
Mwaa shani kuva Nshaidi wa Yeova ni ibati yapagweka?
Unkulota ubatishwe na uve Nshaidi wa Yeova?
Shipali shinu shikutadya haunabatishwe?
Kwa maoni lako nyamani shikuvaikidile utende pakulota ubatishwe?
VANU VANJI VANKUSHIDONI: “Nangu ninkujopa kubatishwa na badae kutenda shinu shakunyata.”
Tushidoni amu ni mwaukumbukilila wako?
KWAUNGWIPI
Na lipwashalelo limwe Yeova, wako unkuulula kutema shakukamadyanga shoeshoe shikutadya haunabatishwe.
Tukumbukilange
Tushidoni inkulateka umanye vinu uti vyamu Ibibiliya pakulota ubatishwe?
Mabadiliko shani lavaikidile wako utende ukanava kubatishwa?
Mwaa shani haivaikidile kuleka kujopa kukutadya wako haunabatishwe?
LIPUNDISHE
Lola nyamani shilota kukutadya wako kumya wamushi wakubatishwa.
Manya mwashi mwakutamela vyakukamadyanga vikutadya haunabatishwe.
“Ni Nini Kinachonizuia Kubatizwa?” (Mnara wa Mlinzi, Machi 2019)
Lola mwashi nnume jumo mwatamadile vyakukamadyanga pakulota kubatishwa.
Kunantandi, nnume walina Ataa ashinalemya kubatishwa. Lola nyamani shintadídye nae kumya wamushi wambone.