LISHOMO 22
Wako ulota kuulula dashi kwandadya mitenga vyambone?
Kwa kuva wako undilipundisha umwiu wamu Ibibiliya, unkuulula kukumbukila doni: ‘vanu uti ivavaikidile vamanye umwiu au!’ Mwiu, vanu uti ivavaikidile vamanye umwiu wamu Ibibiliya! Kanji, wako unkuulula kuligwa kuva na kujopa ukakumbukila kuvaulila vanu vanji kwaupande wa avilá vyaulipundishidye. Bai tuke tumanye mwashi mwaulota kuululila kutema kujopa pakulota wanjange kwandadya mitenga vyambone vyamu Ibibiliya.
1. Ulota kuulula dashi kuvaulila vanu vauvamanyite kwa avilá vyaulipundisha?
Vakwoda vake Yesu vatangwele doni: “Wetu apa, vyatwona na vyatwigwa hatuulula kuleka kutambulanga.” (Vitendo 4:20) Vanavo vashinanagwaledya namene umwiu na mpaka navatadya kulota kuvaulila vanu vanji. Wako momo unkuligwa yadavo? Ikava davo, haunakatoke litala pakulota kuvaulila na ishima valikola vako na vambodi ashilá shaulipundisha.—Shomya Vakoloshu 4:6.
Inamuna ivaikidile wako wanjange
Pautangola na mulikola, unkuulula kwanjanga mwaa wamu Ibibiliya utangola doni: “Ndilipudisha shinu shambone namene mu ishumana ai.”
Lodya lyaandiko lyamu Ibibiliya pakulota kumpabadyanga munu nwele au angaikanga.
Vavao va ku madengo vakakudya mwaupitidile kwila kwa ishumana, vaulile avilá vyaulipundishidye mulipundisho lyako lya Ibibiliya au ku mikutano.
Valodye vavao isaiti jw.org.
Valalike vanu vanji pakulota vapagwe pa lipundisho lyako lya Ibibiliya, au valodye mwashi mwakujugwila lipundisho lya Ibibiliya mu jw.org.
2. Mwaa shani ni shambone kwandadya ntenga na shipinga?
Vakwoda vake Yesu vanditenda poe kuleka kuvandadidye vila ntenga vanu vavashivamanya. Yesu “andivatuma vavili vavili vauke valangalela mmakaja uti” pakulota vakandadye ntenga. (Lukashi 10:1) Kutenda davo kundívapa litala vanu voe kwigwa mitenga vyambone. Kuleka davo, kwandadya pamo kundívapa vakwoda lipuwilo lyoe. (Lukashi 10:17) Da wako unkuulula kwandadya pamo na shipinga?
LAMBELA KUMANYA VYOE
Manya mwashi mwaulota kuululila kutema kujopa kwako na kupata lipuwilo kwa kwandadya mitenga vyambone.
3. Yeova andapagwa namu wako
Vanji vankulota kwandadya ntenga kanji panji, vankuvanavo mangaikangilo kwa ashilá shavalota kukumbukila vanu au mwavalota kupwashalela ntenga.
Da wako unkujopa kuvaulila vanu vanji avilá vyaulipundisha? Mwaa wa nyamani?
Lola VIDEO, na badae mwambangile mwaa shakudya sha mwina.
Vanemba ava Mashaidi va Yeova, vaulwile dashi kutema kujopa kwavo?
Shomya Ishaiya 41:10, na badae mwambangile mwaa shakudya sha mwina:
Ikava kenga wako unkujopa kwandadya, kushwali kulota kukupwashela dashi?
Wako ushindamanya?
Mashaidi va Yeova voe nelo, vashona kenga havaulula shinu kwandadya mitenga vyambone. Kwampano nung’unumunu Sergey, nae ashilyona kenga havané mana na ashona kukamadyanga kutangola na vanu. Kanji badae nae andyanjanga kulipundisha Ibibiliya. Nae ankushidoni: “Ivedavo nguvenavo kujopa, nangu ndyanja- nga kuvaulila vanu vanji avilá vyangushilipundisha. Shinu shangukile ndashanga, kuvaulila vanu vanji kwaupande wa Ibibiliya kuningutadya dimongo. Namomo, kuningutadya kuvanavo wakika wa umwiu mu ntima mwangu.”
4. Lodya ishima
Muwakati wauvandadidya vanu vanji mitenga vyambone, haunakumbukile bai shauvaulila kanji mwashi mwakuvalangangila. Shomya 2 Timoti 2:24 na 1 Patulu 3:15, na badae mwambangile mwaa vyakudya vya mwina:
Pauvandadidya vanu vanji kwaupande wa Ibibiliya, wako ulota kuvikila dashi mmitendo ashilá shitangola mishitali avi?
Inkuululika panji valikola au vambodi haivanagwela shinu. Wako ikuvaikidile utende nyamani? Na nyamani shivaikidile wako haunatende?
Mwaa shani ni shambone kutumila vyakudya vya maoni kuliko kuvakanyalidya kukubali ashilá shauvaulila? Mwaa wa nyamani?
5. Kuvaulila vanu vanji mitenga vyambone kundaidanavo lipuwilo
Yeova animupa Yesu shimadengo shakwandadya mitenga vyambone. Yesu ashanela mwashi shimadengo asho? Shomya Nshuwau 4:34, na badae mwambangile mwaa vyakudya vya mwina:
Kulya shakulya shambone shindapwashela shingumi shetu na tundapuwanga. Yesu alínganienge dashi kutenda malotelo ake Nnungu—kwampano kwandadya mitenga vyambone—na kulya shakulya?
Mwaa shani wako wona kenga kwandadya mitenga vyambone kunatupa lipuwilo?
Midimu
Ku mikutano vya pakati ishumana igwilila shana midimu vyavaumya kwaupande wa kwandadya mitenga vyambone.
Lyandikishe pakulota utende dimbande dya nkutano wa pakati ishumana. Dimbande dya vashikola va Ibibiliya dinakupwashela vako kuvanavo wakika wakutangola na vanu vanji kwaupande wa avilá vyaulipundisha.
Tumila libau “Vanu vanji vankushidoni” au “Vanu vanji vankuulula kudya” pakulota kulijavalakedya kujang’ula vyakudya vyakawaida na munu akaita shaumwaulila.
VANU VANJI VANKUULULA KUDYA: “Nyamani shauvenavo shaambi?”
Wako ulota kutumila dashi litala alyo pakulota kumwaulila munu vyaulipundishidye mu Ibibiliya?
KWAUNGWIPI
Kuvaulila vanu vanji kwaupande wa mitenga vyambone kunaidanavo lipuwilo na ni shinu shikakamadyanga kuleka amula mwaukumbukilila wako.
Tukumbukilange
Mwaa shani ituvaikidile tuvaulile vanu vanji kwaupande wa mitenga vyambone?
Wako ulota kuulula dashi kutenda davo na ishima?
Wako ulota kuulula dashi kutema kujopa kwandadya ntenga?
LIPUNDISHE
Manya dinamuna nsheshe dilodya mwashi mwakuvalangila mitenga vyambone utumila ikadi ya isaiti jw.org.
Lipundishe kwaupande wa mavalelo nsheshe lalota kukupwashela wako kwandadya mitenga vyambone.
“Je, Uko Tayari Kuwa Mvuvi wa Watu?” (Mnara wa Mlinzi, Septemba 2020)
Lola mpano wamu Ibibiliya utupa dashi ntima shii pakulota twandadye mitenga vyambone, ata tukava tuvadyoko.
Lipundishe mwashi mwakuvaulilila valikola vako vákammanya Yeova kwaupande wa Ibibiliya.
“Kuifikia Mioyo ya Watu wa Ukoo Wasio Waamini” (Mnara wa Mlinzi, Machi 15, 2014)