LISHOMO 51
Wako ulota kumpuwangidya dashi Yeova kwa inamuna yautangola?
Yeova anditupa shawadi yambone namene—kutangola. Da shana Yeova inkunnagwela inamuna yatutumilila shawadi ayo? Kwaumwiu inkunnagwela! (Shomya Tiyagu 1:26.) Napanelo tulota kutumila dashi kutangola mu inamuna impuwangidya Yeova?
1. Tulota kutumila dashi malove letu?
Ibibiliya inkutwaulila pakulota wetu “twing’ane ntima shii na tunanowanange kula munu na muje.” (1 Vateshalonika 5:11) Da unkunkumbukila munu avaikidile umupe ntima shii? Ulota kutenda nyamani pakulota munu ajo aligwe shana? Mwaulile kenga unkunnagwaledya. Panji unkuulula kunnambwalela mavalelo lambone lavenavo. Wona dashi kutumila lyaandiko lyamu Ibibiliya pakulota kumupa ntima shii? Lapali maandiko loe lavaikidile wako utandole. Kumbukila yadavo inamuna yautangola inkuulula kutenda mabadiliko kwaupande wa vanu. Ndyomana, lingangila kutangola ngwengwe kwa inamuna ya upole na mwambone.—Mikong’o 15:1.
2. Malove shani latuvaikidile hatunatangole?
Ibibiliya inkushidoni: “Malove akunyata hanaume kanywa mwenu.” (Shomya Vaepeshu 4:29.) Asho mana ake ituvaikidile hatunatangole malove lakunyata na ata hatunaumye maoni laukalau au lakwabola pakulota kuntadya munu shitundi. Kuleka davo, ituvaikidile twambukange udalali na kung’wenya.—Shomya Mikong’o 16:28.
3. Nyamani shilota kutupwashela wetu pakulota kutumila shana shawadi yakutangola?
Kwaumwiu, vyatutangola vinkulodya avilá vyatuvenavo mu makumbukililo na muntima. (Lukashi 6:45) Ndyomana ituvaikidile tulikanyalidye pakulota tukumbukile—vinu vyaumwiu, vyaishaliya, víkave ushapu, vyakwalala, na vyakutumbyanga. (Vapilipo 4:8) Pakulota itandeke davo, ivaikidile tuvatandole shana vambodi na vinu vyakupikitila. (Mikong’o 13:20) Namomo ni shambone kukumbukila kwanja ukanava kutangola. Kumbukila malove lako mwashi mwavalota kuligwidya vanu vanji. Ibibiliya inkushidoni: ‘Kutangola bila kukumbukila ni kenga kwenga kwa lyambila, kanji lulimi lwa munu walimanyilo lunaponia.’—Mikong’o 12:18.
LAMBELA KUMANYA VYOE
Lola yadavo malove shani lambone lavaikidile kutumila pakulota kuvapa ntima shii vanu vanji.
4. Lilaledye na vyautangola
Myanda vinji, tunatangola vinu vinatutadya kulyambila badae. (Tiyagu 3:2) Shomya Vagalata 5:22, 23, na badae mwambangile mwaa vyakudya vya mwina:
Lyaandiko ali linkulodya mavalelo lalota kukupwashela kulaledya matangodi lako. Mavalelo shani lavaikidile unjugwe Yeova? Mavalelo ala lalota kukupwashela dashi?
Shomya 1 Vakolintu 15:33, na badae mwambangile mwaa shakudya sha mwina:
Mwatupikitila na vambodi vetu valota kutwambukisha dashi inamuna yatutangola?
Nyamani shilota kwambukisha inamuna yakutangola kwetu?
Shomya Nkúvalanga 3:1, 7, na badae mwambangile mwaa shakudya sha mwina:
Wakati shani uvaikidile umalale au wakulindila pakulota kutangola shinu?
5. Tangola wambone kwaupande wa vanu vanji
Tulota kunyema dashi kuvatadya shitundi vanu vanji kwamwaa wa vinu vyatutangola? Lola VIDEO, na badae mwambangile mwaa vyakudya vya mwina.
Kulingana na video, mwaa shani nae andílota kubadili inamuna yavatangola vanu vanji?
Nae atandile nyamani pakulota kubadilika?
Shomya Nkúvalanga 7:16, na badae mwambangile mwaa shakudya sha mwina:
Lakatwida makumbukililo lakuntangola munu kunyata, nyamani shituvaikidile tukumbukile?
Shomya Nkúvalanga 7:21, 22, na badae mwambangile mwaa shakudya sha mwina:
Lyaandiko ali lilota kukupwashela dashi ikava kenga wako uve na shitundi kwamwaa wa munu akutangwele kunyata?
6. Ava wambone pautangola na likola lyako
Yeova alota wetu tutumile malove alinagwaledyo na lambone muwakati watutangola na valikola. Lola VIDEO, na badae mwambangile mwaa shakudya sha mwina.
Nyamani shilota kukupwashela wako kutangola kwa inamuna yambone na likola lyako?
Shomya Vaepeshu 4:31, 32, na badae mwambangile mwaa shakudya sha mwina:
Ulota kutangola dashi kwa inamuna yambone pakulota likola liligwe shana?
Yeova anditangola kenga ankunnagwaledya Mwanagwe, Yesu. Shomya Mateu 17:5, na badae mwambangile mwaa shakudya sha mwina:
Da wako ulota kunjedya dashi Yeova muwakati wautangola na likola lyako?
Lambela wakati pakulota kuvalambwalela vanu vanji
VANU VANJI VANKUSHIDONI: “Nangu ngutangola ashilá shangukumbukila. Ikava kenga vanu vanji hainavanagwela shinu vandamanya vovene.”
Unkwamini shinu ashi? Mwaa wa nyamani?
KWAUNGWIPI
Malove lankuvanavo dimongo. Ituvaikidile tulilaledye ashilá shatutangola, wakati watutangola, na mwashi mwatutangalela.
Tukumbukilange
Ulota kutumila dashi shawadi yakutangola pakulota kuvapwashela vanu vanji?
Malove shani laukalota kutumila?
Nyamani shilota kutupwashela pakulota tuve tuvanu tuvambone na kuvapa ntima shii vanu vanji kwaindila ya malove?
LIPUNDISHE
Nyamani shilota kutupwashela pakulota kutumila shana shawadi yakutangola?
Lola nyamani shilota kutupwashela pakulota kuleka kutangola malove lakunyata.
“Je, Kweli Kutumia Lugha Chafu Ni Vibaya?” (Makala iliyo kwenye mtandao)
Lola mwashi mwakulakela kuvatangola vanu kunyata.
Lola mwashi Yeova mwampwashaladile nnume jumo kuleka kutangola malove lakunyata.
“Nilianza Kufikiria kwa Uzito Mwelekeo wa Maisha Yangu” (Mnara wa Mlinzi, Agosti 1, 2013)