LISHOMO 37
Ibibiliya ivalanga nyamani kwaupande wa madengo na njuluku?
Wako undiwai kuvanavo mangaikangilo kwaupande wa madengo na njuluku? Shinkuulula kuva shinu shakukamadyanga kuntumikila Yeova na kwa wakati wowo kwangaikangila vinu vyatulota. Kanji Ibibiliya inkutupa midimu vyambone vilota kutupwashela.
1. Ibibiliya ivalanga nyamani kwaupande wa madengo?
Nnungu alota wetu tupuwangile madengo latutenda. Ibibiliya inkushidoni: ‘hashipali shinu shaulula munu kutenda kuliko . . . kupuwangila madengo lake makumene.’ (Nkúvalanga 2:24) Yeova ankukola madengo namene. Tukanjedya Yeova kwa kukola madengo na dimongo tunampuwangidya na tunaligwa shana.
Kukola madengo ni shinu shikumene. Kanji hatunaleke lidengo shiva shinu shikumene kuliko kulipudya kumwe Yeova. (Nshuwau 6:27) Yeova andilivikila kenga tukammika palyutu litandi, nae andatupa vinu vyatulota.
2. Ibibiliya ivalanga nyamani kwaupande wa njuluku?
Ibibiliya inkuvalanga kenga “njuluku ni lishililidyo” kanji yadavo inkuvalanga kenga njuluku gweka hautupa shinu lipuwilo. (Nkúvalanga 7:12) Pavedoni yanavo inkutumanyia “kenga hatunanagwaledye njuluku kanji tupuwangile ashilá shatuvenavo.” (Shomya Vabalaniya 13:5.) Tukapuwangila avilá vyatuvenavo tunanyema mangaikangilo lakulota kuvanavo vinu vyoe. Namomo tunanyema madeni lakavaikidile. (Mikong’o 22:7) Namomo tunanyema shijoidyo shakunjalanga kamali na kulinjidyanga muvitendo pakulota kutajilika peja.
3. Tulota kutumila dashi njuluku pakulota kuvapwashela vanu vanji?
Yeova ni Nnungu wa kujaula na wetu tunaulula kunjedya Yeova “tuvanavo ntima wa kujaula na kuva tayali mukumajananga.” (1 Timoti 6:18) Tunkuulula kutenda davo tumya mishango vyetu pashipinga na tuvapwashela vanu vanji valota lipwashalelo kupunda namene vanung’unumunu vetu vamu likulupililo. Yeova hanalola vinu vyatumya, kanji apuwangila ashilá shitutadya kumya. Tukaumya na ntima wetu uti tunavanavo lipuwilo na tunampuwangidya Yeova.—Shomya Vitendo 20:35.
LAMBELA KUMANYA VYOE
Lambela kumanya mwaa shani ni shambone kuvika madengo palyutu lyake na kupuwangila ashilá shatuvenavo.
4. Mwishimu Yeova kwa inamuna yaukola madengo
Umbodi wetu namu Yeova uvaikidile wambukishe amula mwatwanela madengo. Lola VIDEO, na Badae mwambangile mwaa vyakudya vya mwina.
Mu video, nyamani shikutadidye wako kushanga kwaupande wa mpano umwe Jonashi?
Jonashi atandile nyamani pakulota kuvika madengo palyutu lyake?
Shomya Vakoloshu 3:23, 24, na badae mwambangile mwaa shakudya sha mwina:
Mwaa shani ni shinu shikumene kuva tuvamadengo vambone?
Kukola madengo ni shinu shikumene. Kanji hatunaleke madengo shiva shinu shikumene kuliko kulipudya kwetu kumwe Yeova
5. Kupuwangila ashilá shatuvenavo kunkutupa ipaida
Vanu voe vankulikanyalidya pakulota vapate njuluku woe. Kanji Ibibiliya inkutumanyia tutandele munji. Shomya 1 Timoti 6:6-8, na badae mwambangile mwaa shakudya sha mwina:
Ibibiliya inkutupa ntima shii pakulota tutende nyamani?
Tunkuulula kuvanavo lipuwilo ata tukavanavo vinu padyoko. Lola VIDEO, na badae mwambangile mwaa shakudya sha mwina.
Likola alyo vavedavo havavenavo vinu vyoe mwaa shani vankupuwanga?
Napanelo wetu ivedavo tuvenavo vinu vyoe kanji mwaa shani tunkulota kavili? Yesu andyumya mpano ulodya shijoidyo kwaupande wa shinu asho. Shomya Lukashi 12:15-21 na badae mwambangile mwaa shakudya sha mwina:
Ulipundishidye nyamani na mpano umwe Yesu?—Lola nshitali wa 15.
Shomya na linganianga na Mikong’o 10:22 na 1 Timoti 6:10. Badae mwambangile mwaa vyakudya vya mwina:
Kwako shinu shikumene ni shakwashi? Kuva mbodi umwe Yeova au kuvanavo njuluku woe? Mwaa wa nyamani?
Munu akalota kuvanavo njuluku woe shilota kumumilila nyamani?
6. Yeova andatupa avilá vyatulota
Patwona kukamadyanga kupata madengo au njuluku tunkuulula kupata litala lya kulodya kenga tunkunkulupila Yeova. Lola VIDEO pakulota tumanye mwashi mwakutandela tukavanavo makumbukililo alo, na badae mwambangile mwaa vyakudya vya mwina.
Mu video vyaugwene, vyakukamadyanga shani vyapitidile nung’unumunu?
Atandile nyamani pakulota kupililila vyakukamadyanga avyo?
Shomya Mateu 6:25-34, na badae mwambangile mwaa shakudya sha mwina:
Yeova alivikidile kutenda nyamani kwa avalá vammika palyutu litandi?
VANU VANJI VANKUSHIDONI: “Inguvaikidile ngukole madengo pakulota ngulishe likola lyangu. Pavedoni hangulula kuka ku mikutano kula ishumana.”
Lyaandiko shani likulodya wako kenga kuvika lyutu litandi kulipudya kumwe Yeova ni shinu shambone?
KWAUNGWIPI
Tunkulota madengo na njuluku, kanji vinu avi havinalote kututadya mene kuntumikila Yeova.
Tukumbukilange
Shilota kukupwashela nyama- ni wako kuvanavo ishabaa yambone kwaupande wa madengo?
Mwaa shani ni shambone kupuwangila ashilá shauvenavo?
Ulota kulodya dashi kenga unkwamini ashilá shalivikidile Yeova kenga anavashunga venentete vake?
LIPUNDISHE
Lambela kumanya ikava kenga Ibibiliya inkupundisha kuvanavo njuluku ni shinu shakunyata.
“Je, Pesa Ndio Chanzo cha Uovu Wote?” (Makala iliyo kwenye mtandao)
Lipundishe pakulota umanye mwashi mwakutumilila njuluku mu inamuna impuwangidya Nnungu.
“Biblia Inasema Nini Kuhusu Kutoa?” (Makala iliyo kwenye mtandao)
Da kujalanga kamali shinkupagwa shijoidyo?
Lola shinu shimpwashadile munu jumo avele nkwiva na wakujalanga kamali kubadili shingumi shake.
“Nilipenda Sana Mashindano ya Farasi” (Mnara wa Mlinzi, Novemba 1, 2011)