Primeru livru di Krónikas

14 Iron, rei di Tiru, manda mensajerus pa Davidi. Tanbê el manda madera di sédru, pedrerus* i karpinterus pa faze un kaza* pa el. 2 Davidi intende ma Jeová poi se reinu ta fika firmi na Israel, pamodi Deus engrandese se reinu txeu pa djuda Se povu Israel.

3 Davidi ranja más mudjer na Jiruzalen i el tevi más fidju matxu i más fidju-fémia. 4 Kes-li é nómi di ses fidju ki nase na Jiruzalen: Samua, Sobabe, Natan, Salumon, 5 Ibar, Elizua, Elpelete, 6 Noga, Nefege, Jafia, 7 Elizama, Beliada i Elifelete.

8 Kantu kes filisteu fika ta sabe ma Davidi skodjedu pa ser rei di tudu Israel, tudu es kumesa ta djobe-l. Kantu Davidi fika ta sabe di kel-li, el ba luta kóntra es. 9 Nton, kes filisteu ben i es kumesa ta ataka vali di Refain. 10 Davidi djobe orientason na Deus i el pergunta-l: “N debe ba ataka kes filisteu? Bu ta intrega-s na nha mô?” Jeová responde-l: “Bu pode bai. Bu pode ten serteza ma N ta intrega-s na bu mô.” 11 Nton, Davidi subi pa Baal-Perazin i el mata kes filisteu. Pur isu, Davidi fla: “Deus verdaderu uza-m pa N kaba ku nhas inimigu sima agu ta ronba paredi.” É pur isu ki es poi kel lugar nómi di Baal-Perazin. 12 Kes filisteu dexa ses deus la, i kantu Davidi da órdi, es kemadu na lumi.

13 Dipôs, kes filisteu torna ben i es ataka vali. 14 Davidi torna pidi orientason na Deus, má Deus verdaderu fla-l: “Ka bu ataka-s pa frenti. Da vólta pa tras, i ataka-s na frenti di kes arvi.* 15 I óras ki nhos obi barudju di trópas ta marxa na meiu di kes arvi, nhos ataka-s pamodi Deus verdaderu dja bai nhos dianti pa kaba ku kes trópa filisteu.” 16 Nton, Davidi faze sima Deus verdaderu fla-l, i es mata kes trópa filisteu désdi Jibion ti Jezer. 17 I fama di Davidi spadja pa tudu téra, i Jeová poi tudu nason ta ten medu di el.