Lukas

1 Txeu algen faze sforsu pa skrebe sobri tudu kes kuza ki kontise, i ki nos tudu ta kridita. 2 Otus tanbê ki odja i ki pâpia di mensajen di Deus konta-nu kes kuza li. 3 Pur isu, Sinhor Tiófilu, ami tanbê, dipôs ki N piskiza tudu kes kuza, N rezolve skrebe-s pa nho di manera organizadu. 4 N faze kel-li pa nho pode ten tudu serteza ma kes kuza ki nho inxinadu, é verdadi.

5 Na ténpu di Eródis,* ki éra rei di Judea, tinha un saserdóti ki txomaba Zakarias i el ta fazeba párti di kel grupu di saserdóti ki ta txomadu di Abias. Se mudjer éra un di kes fidju-fémia di Aron, i se nómi éra Elizabeti. 6 Es tudu dôs éra justu dianti di Deus, i es ta obiba ku tudu mandamentu i leis di Jeová.* 7 Má, es ka tinha fidju, pamodi Elizabeti ka ta pode tinha fidju, i es tudu dôs dja staba algen grandi.

8 Zakarias staba na se grupu ta faze se trabadju di saserdóti dianti di Deus. 9 Di akordu ku trabadju ki saserdótis tinha kustumu di fazeba, txiga se bês pa el entra na santuáriu di Jeová* i oferese insénsu. 10 I na óra di oferese insénsu, povu interu staba ta faze orason na ladu di fóra. 11 Nton, anju di Jeová* parse pa el, di pé, na ladu direita di altar di insénsu. 12 Má, kantu Zakarias odja-l, el fika spantadu i ku txeu medu. 13 Má, anju fla-l: “Ka bu xinti medu, Zakarias, pamodi Deus dja obi bus orason,* i bu mudjer Elizabeti ta ben da-u un fidju, i bu ta pô-l nómi di Juan. 14 Bu ta ben ten txeu alegria, i txeu algen ta ben fika kontenti óras ki el nase, 15 pamodi el ta ben ser un grandi ómi dianti di Jeová.* Má, el ka debe bebe vinhu nen otu bebida alkólika, i el ta ben fika xeiu di spritu santu, mésmu antis di el nase,* 16 i el ta ben poi txeu fidju di Israel ta volta pa Jeová,* ses Deus. 17 Tanbê, Deus ta ben manda-l se frenti ku spritu i puder di Elias, pa poi korason di kes pai ta volta pa ses fidju, i djuda kes dizobidienti aji ku sabedoria i faze kel ki é dretu, asi pa el pripara un povu pa Jeová.”*

18 Zakarias fla kel anju: “Modi ki N pode ten serteza di kel-li? Pamodi dja N sta bédju i nha mudjer dja sta algen grandi.” 19 Anju responde-l: “Ami é Gabriel ki ta sta dianti di Deus, i N mandadu pa pâpia ku bo i pa dexa-u sabe di kel notísia sábi li. 20 Má, pamodi bu ka kridita na nhas palavra ki ta ben kunpri na se ténpu markadu, bu ta ben fika mudu i bu ka ta pode pâpia, ti ki kes kuza li kontise.” 21 Má, povu kontinua ta spera Zakarias, i es atxa stranhu pamodi el staba ta dura txeu na santuáriu. 22 Kantu el sai, el ka konsigi pâpia ku es, i es da kónta ma el tevi un vizon na santuáriu. El ta fazeba es jéstu, má el kontinua mudu. 23 Kantu el tirmina kes dia di se sirvisu sagradu,* el bai pa kaza.

24 Alguns dia dipôs, Elizabeti, se mudjer, fika grávida i el fika déntu kaza duránti sinku mês. El ta flaba: 25 “É si ki Jeová* sta ta lida ku mi gósi. El volta se atenson pa mi, pa kaba ku nha vergónha dianti di tudu algen.”

26 Kantu el tinha 6 mês grávida, Deus manda anju Gabriel pa un sidadi di Galilea ki txomaba Nazaré, 27 pa un vírjen ki staba noiva di* un ómi ki txomaba Juzé, di kaza di Davidi, i nómi di kel vírjen éra Maria. 28 Kantu anju entra na undi ki Maria staba, el fla-l: “Jeová* sta txeu kontenti ku bo Maria i el ta abensua-u.” 29 Má, Maria fika trapadjadu ku kes kuza ki anju fla i el staba ta tenta intende kuzê ki el krê flaba ku kel tipu di mantenha. 30 Pur isu, anju fla-l: “Ka bu xinti medu, Maria, pamodi Deus sta kontenti ku bo. 31 Odja! Bu ta ben fika grávida i bu ta ben ten un fidju, i bu ta pô-l nómi di Jizus. 32 El ta ben ser grandi i el ta ben txomadu Fidju di kel Más Grandi, i Jeová* Deus ta ben da-l tronu di Davidi, se pai, 33 i el ta ben ser Rei di kaza di Jakó pa tudu ténpu, i se Reinu ka ta kaba.”

34 Má, Maria fla kel anju: “Modi ki kel-li ta ben kontise, si inda mi é vírjen?” 35 Kel anju responde-l: “Spritu santu ta ben riba bo i puder di kel Más Grandi ta kubri-u ku se sónbra. I é pur isu ki kel ki ta ben nase ta txomadu santu, Fidju di Deus. 36 I fika ta sabe ma Elizabeti, bu família ki dja sta di idadi, i ki gentis ta flaba ma el ka ta pode tinha fidju, tanbê sta grávida i dja el tene 6 mês, 37 pamodi ka ten nada ki Deus ta fla ki el ka ta pode faze.” 38 Nton Maria fla: “Ami é skrava di Jeová!* Pa kontise ku mi sima kel ki bu fla.” Dipôs di kel-li, anju dexa-l i el bai.

39 Poku ténpu dipôs, Maria bai faxi pa kel zóna ki ta fikaba na montanha, pa un sidadi di Judá. 40 El entra na kaza di Zakarias i el kunprimenta Elizabeti. 41 Kantu Elizabeti obi Maria ta kunprimenta-l, kel mininu salta déntu di se bariga, i Elizabeti fika xeiu di spritu santu 42 i el fla altu: “Abo é más abensuada di ki tudu kes otu mudjer, i abensuadu é kel mininu ki sta na bu bariga! 43 Ami é kenha pa mai di nha Sinhor ben vizita-m? 44 Pamodi lógu ki N obi-u ta kunprimenta-m, mininu salta di alegria déntu nha bariga. 45 Filís é kel mudjer ki kridita na kes kuza li, pamodi kes kuza ki Jeová* promete-l ta ben kunpri tudu.”

46 I Maria fla: “Nha alma* ta lova Jeová,* 47 i nha spritu ta fika kontenti na Deus, nha Salvador, 48 pamodi el odja pa situason umildi di se skrava. Di gósi pa dianti tudu jerason ta ben fla ma mi é filís, 49 pamodi kel Poderozu faze kuzas grandi pa mi, i se nómi é santu, 50 se mizerikórdia ta pasa di jerason pa jerason riba di kes ki ten txeu ruspetu pa el. 51 Ku se brasu, el aji ku puder. El spadja kes ki ten intenson orgulhozu na ses korason. 52 El tra kes ómi poderozu di ses tronu i el labanta kes algen umildi. 53 El intxi di bons kuza kes ki staba ku fómi i el manda kes riku bai ses kaminhu ku mô vaziu. 54 El ben djuda Israel, se sérvu, pa mostra ma el ta lenbra di se promésa di mostra mizerikórdia pa tudu ténpu 55 pa Abraon i se disendentis,* sima dja el prometeba pa nos gentis grandi.” 56 Maria fika uns três mês ku Elizabeti i dipôs el volta pa se kaza.

57 Nton, kantu txiga ténpu di mininu nase, Elizabeti tevi un fidju matxu. 58 Kantu se vizinhus i se família obi ta fladu ma Jeová* mostra-l txeu mizerikórdia, es fika kontenti djuntu ku el. 59 Kantu faze 8 dia, es ba faze kel mininu sirkunsizon, i es staba ta ba pô-l nómi di se pai, Zakarias. 60 Má, se mai fla: “Nau! Se nómi ta ser Juan.” 61 Nton, es fla-l: “Ka ten ningen na bu família ku es nómi li.” 62 Nton, es pergunta se pai ku jéstu modi ki el kreba pa mininu txomadu. 63 El pidi un tábua i el skrebe: “Se nómi é Juan.” I tudu algen fika spantadu. 64 Kel óra, se bóka abri, se língua solta, i el kumesa ta pâpia i ta lova Deus. 65 Tudu se vizinhus fika dimiradu, i es kumesa ta konta kes kuza ki kontise na tudu kes zóna ki ta fikaba na montanha di Judea. 66 I tudu kes ki obi kel-li guarda-l na ses korason i es fla: “Kuzê ki kel mininu li ta ben ser?” Pamodi di serteza mô di Jeová* staba ku el.

67 Nton, Zakarias, se pai, fika xeiu di spritu santu i el kumesa ta profetiza: 68 “Pa Jeová,* kel Deus di Israel, lovadu, pamodi el volta se atenson pa se povu i el libra-s. 69 I el labanta un salvador* poderozu na kaza di Davidi, se sérvu, 70 sima dja el flaba pa bóka di se profétas santu di ténpu antigu, 71 pa salva-nu di nos inimigus i di mô di tudu kes ki ta odia-nu, 72 pa mostra-nu mizerikórdia sima el prometeba nos gentis grandi i pa lenbra di se kontratu santu, 73 kel juramentu ki el faze pa nos pai Abraon. 74 Dipôs di el libra-nu di mô di nos inimigus, el da-nu priviléjiu di adora-l sen medu, 75 ku lialdadi i justisa se dianti, tudu dia di nos vida. 76 Má abo, nha fidju, bu ta ben txomadu proféta di kel Más Grandi, pamodi bu ta bai na frenti di Jeová* pa pripara se kaminhu, 77 pa pâpia ku se povu mensajen di salvason através di perdon di ses pekadu, 78 pamodi konpaxon di nos Deus. Ku kel konpaxon li, un lus di palmanhan ta ben vizita-nu di séu, 79 pa límia kes ki sta xintadu na sukuru i na sónbra di mórti i pa gia nos pé na kaminhu di pas.”

80 I kel mininu kria i el bira fórti na spritu, i el kontinua na dizértu ti ki txiga kel dia pa el ba prega pa povu di Israel.