Primeru livru di Krónikas
15 I Davidi kontinua ta faze kazas pa el na Sidadi di Davidi. El pripara un lugar pa Arka di Deus verdaderu i el arma un ténda pa kel Arka. 2 Nton Davidi fla: “É sô levitas ki debe karega Arka di Deus verdaderu, ningen más, pamodi Jeová skodje-s pa es karega Arka di Jeová i pa es sirbi-l sénpri.” 3 Nton, Davidi djunta tudu algen di Israel na Jiruzalen pa traze Arka di Jeová pa kel lugar ki dja el priparaba pa el.
4 Davidi djunta kes disendenti di Aron i kes levita: 5 di kes disendenti di Koate, tinha Uriel, ki éra xéfi i 120 ómi di se família. 6 Di kes disendenti di Merari, tinha Azaías, ki éra xéfi i 220 ómi di se família. 7 Di kes disendenti di Jérson, tinha Juel, ki éra xéfi i 130 ómi di se família. 8 Di kes disendenti di Elizafan, tinha Semaías, ki éra xéfi i 200 ómi di se família. 9 Di kes disendenti di Ebron, tinha Eliel, ki éra xéfi i 80 ómi di se família. 10 Di kes disendenti di Uziel, tinha Aminadabe, ki éra xéfi i 112 ómi di se família. 11 Tanbê Davidi txoma saserdóti Zadoki, saserdóti Abiatar i kes levita li: Uriel, Azaías, Juel, Semaías, Eliel i Aminadabe. 12 El fla-s: “Anhos é xéfi di grupu di família di kes levita. Nhos santifika, i tanbê nhos santifika nhos irmon,* i nhos traze Arka di Jeová, kel Deus di Israel, pa kel lugar ki N pripara pa el. 13 Na primeru bês, nhos ka karega Arka pamodi nu ka tenta sabe kal ki éra manera sértu di karega-l, pur isu Jeová fika txeu xatiadu ku nos.” 14 Nton, kes saserdóti i kes levita santifika pa traze Arka di Jeová, kel Deus di Israel.
15 I kes levita karega Arka di Deus verdaderu riba di ses onbru, ku kes varal, sima Muizés dja mandaba di akordu ku palavra di Jeová. 16 Dipôs, Davidi fla kes xéfi di levitas pa skodje ses irmon ki éra kantor pa kanta ku alegria djuntu ku instrumentus di múzika, instrumentus di kórda, arpa i sínbalu.*
17 Kes levita skodje kes ómi li di ses tribu: Eman, fidju di Juel; Azafe, fidju di Berekias; i Etan, fidju di Kuzaías, di família di Merari. 18 Tanbê es skodje un sugundu grupu di ses irmon: Zakarias, Ben, Jaziel, Semiramote, Jeiel, Uni, Eliabe, Benaia, Mazeias, Matitias, Elifeleu i Mikneias. Tanbê es skodje Obede-Edon i Jeiel ki éra porteru. 19 Kes kantor Eman, Azafe, i Etan debe tokaba kes sínbalu di kóbri. 20 Zakarias, Aziel, Semiramote, Jeiel, Uni, Eliabe, Mazeias i Benaia ta tokaba kes instrumentu di kórda pa kes nóta altu.* 21 I Matitias, Elifeleu, Mikneias, Obede-Edon, Jeiel i Azazias ta tokaba kes instrumentu di kórda pa kes nóta baxu* pa es pode orientaba múzika. 22 Kenanias, xéfi di kes levita, ta orientaba kes algen ki ta karegaba Arka, pamodi el éra bon na faze kel-li. 23 I Berekias i Elkana éra guarda di Arka. 24 Kes saserdóti li: Sebanias, Jozafá, Netanel, Amazai, Zakarias, Benaia i Eliézer ta tokaba tronbéta altu dianti di Arka di Deus verdaderu. Obede-Edon i Jeías tanbê éra guarda di Arka.
25 Nton Davidi, kes ansion di Israel i kes xéfi di mil bai kontenti pa kaza di Obede-Edon pa es ba buska Arka di Kontratu di Jeová. 26 Dja ki Deus verdaderu staba ta djuda kes levita ki staba ta karega Arka di Kontratu di Jeová, es sakrifika 7 toru novu i 7 karneru. 27 Davidi staba ta uza un ropa sen manga di tisidu di bon kualidadi, sima tudu kes levita ki staba ta karega Arka, kes kantor i Kenanias. Éra Kenanias ki staba ta orienta kes algen ki staba ta karega Arka i kes kantor. Davidi tanbê staba ta uza un éfodi* di linhu. 28 Tudu algen di Israel staba ta leba Arka di Kontratu di Jeová ta grita di alegria, i ku son di buzina, di tronbéta, di sínbalu i ta toka altu kes instrumentu di kórda i arpa.
29 Má kantu Arka di Kontratu di Jeová entra na Sidadi di Davidi, Mikal, fidju-fémia di Saul, staba na janéla ta djobe pa baxu i el odja rei Davidi ta salta i ta komemora. I el kumesa ta dispreza Davidi na se korason.