Primeru livru di Krónikas
18 Un ténpu dipôs, Davidi ganha kes filisteu i el fika ta manda na es. El toma-s sidadi di Gate i kes vila pértu di la. 2 Dipôs, el ganha kes moabita, i es bira sérvus di Davidi i es fika ta paga-l un taxa.
3 Davidi ganha Adadezer, rei di Zobá, pértu di Amate. Adadezer staba na kaminhu ta bai toma zóna di riu Eufratis pa el fika ta kontrolaba el otu bês. 4 Davidi toma Adadezer mil karu di géra, 7 mil ómi ki ta montaba kabalu i 20 mil trópa ki staba apé. Dipôs, Davidi korta tendon di tudu kes kabalu di karu di géra. Má el dexa 100 di es sen korta tendon. 5 Kantu kes síriu di Damasku ba djuda Adadezer, rei di Zobá, Davidi mata 22 mil di kes trópa. 6 Dipôs, Davidi poi un grupu di trópa na Síria di Damasku, i kes trópa di Síria bira sérvus di Davidi i es fika ta paga-l un taxa. Jeová ta daba Davidi vitória* pa tudu lugar ki el baba. 7 Davidi toma kes skudu di oru rodondu di kes sérvu di Adadezer i el leba-s pa Jiruzalen. 8 Davidi leba un monti kóbri ki el panha na Tibate i na Kun, ki éra sidadis di Adadezer. Salumon uza kes kóbri pa faze kel tanki grandi* di kóbri, kes pilar i kes kuza di kóbri.
9 Toú,* rei di Amate, obi ma Davidi ganha tudu kes trópa di rei Adadezer, di Zobá. 10 (Adadezer dja lutaba kóntra Toú txeu bês.) Nton kel óra, el manda se fidju, Adoron, pa ba pergunta rei Davidi modi ki el staba i pa da-l parabens pamodi el luta kóntra Adadezer i el ganha-l. Adoron leba Davidi tudu tipu di kuzas di oru, di prata i di kóbri. 11 Rei Davidi santifika kes kuza li pa Jeová, djuntu ku kes prata i kes oru ki el traze di tudu kes nason li: di Edon, di Moabe, di kes amonita, di kes filisteu i di kes amalekita.
12 Abizai, fidju di Zeruia, mata 18 mil edomita na vali di Sal. 13 El poi trópas na tudu tiritóriu di Edon i tudu kes edomita bira sérvus di Davidi. Jeová ta daba Davidi vitória* pa tudu lugar ki el baba. 14 Davidi kontinua ta governa tudu Israel, i el ta fazeba kel ki éra dretu i justu pa djudaba tudu se povu. 15 Joabe, fidju di Zeruia, éra xéfi di trópa di Davidi; Jeozafá, fidju di Ailude, ta skrebeba kes kuza ki ta kontiseba na reinu; 16 Zadoki, fidju di Aitube, i Aimeleki, fidju di Abiatar, éra saserdóti, i Savza éra sekretáriu. 17 Benaia, fidju di Jeoiada, éra xéfi di kes keretita i di kes peletita. I kes fidju di Davidi éra kes ómi más inportanti dipôs di rei.