Primeru livru di Krónikas
19 Algun ténpu dipôs, Naás, rei di kes amonita móre, i se fidju bira rei na se lugar. 2 Nton, Davidi fla: “N ta mostra amor lial pa Anun, fidju di Naás, pamodi se pai mostra amor lial pa mi.” Pur isu, Davidi manda mensajerus pa ba konsola-l pamodi se pai móre. Má kantu sérvus di Davidi txiga na téra di amonitas pa konsola Anun, 3 kes prínsipi di kes amonita fla Anun: “Bu ta atxa ma Davidi manda ses sérvu pa konsola-u pamodi el krê onra bu pai? Bu ka ta atxa ma el manda-s pa es ben splora sidadi, pa djobe modi ki el sta i pa kaba ku bo?” 4 Nton, Anun pega kes sérvu di Davidi i el tra-s barba, el korta-s ses ropa na metadi, na altura di pólpa, i dipôs el manda-s bai ses kaminhu. 5 Kantu es fla Davidi kuzê ki kontise ku kes ómi, kel óra el manda otus ómi pa ba inkontra ku ses sérvu, pamodi es podu ta pasa txeu vergónha. I rei manda fla-s: “Nhos fika na Jerikó i nhos volta óras ki nhos barba kria.”
6 Ku ténpu, kes amonita da kónta ma Davidi staba ku ódiu di es. Nton, Anun i kes amonita manda 34 mil kilu di prata* pa es kontrata karus di géra i kes ómi di Mezopotamia,* di Aran-Maká i di Zobá ki ta montaba kabalu. 7 Nton es kontrata 32 mil karu di géra, i tanbê rei Maká i ses trópa. Dipôs es ben i es arma ténda na frenti di Medeba. Kes amonita sai di ses sidadi i es djunta pa géra.
8 Kantu Davidi fika ta sabe di kel-li, el manda Joabe i tudu ses trópa, i tanbê kes trópa más fórti. 9 Nton, kes amonita bai i es fika na puzison di géra, na entrada di sidadi. I kes rei ki ben djudaba es, fika apárti na kanpu abértu.
10 Kantu Joabe odja ma kes trópa staba ta binha kóntra el pa frenti i pa tras, el skodje alguns di kes midjór trópa di Israel i el pô-s na puzison di géra pa es luta ku kes síriu. 11 El dexa se irmon Abizai ta komanda kes otu trópa, asi pa el pode poba es na puzison di géra pa es lutaba kóntra kes amonita. 12 Nton, Joabe fla-l: “Si kes síriu bira fórti dimás pa mi, bu ta ben djuda-m. Má si kes amonita bira fórti dimás pa bo, N ta ba djuda-u. 13 Nu ten ki ser fórti i luta ku koraji pa nos povu i pa kes sidadi di nos Deus, i Jeová ta faze kel ki el ta atxa ma é midjór.”
14 Nton, Joabe i ses trópa avansa pa ba luta kóntra kes síriu, i es fuji di ses dianti. 15 Kantu kes amonita odja ma kes síriu dja fujiba, es fuji tanbê di Abizai, irmon di Joabe, i es entra na sidadi. Dipôs, Joabe volta pa Jiruzalen.
16 Kantu kes síriu odja ma Israel ganha-s, es manda mensajerus pa ba txoma kes síriu ki staba na zóna di riu Eufratis.* Ken ki staba ta komanda-s éra Sofaki, xéfi di trópa di Adadezer.
17 Kantu Davidi fika ta sabe di kel-li, kel óra, el djunta tudu trópa di Israel, el trabesa Jurdon, el ba inkontra ku es i el poi ses trópa na puzison di géra. Davidi fika na puzison di géra pa infrenta kes síriu, i es luta kóntra el. 18 Má kes síriu fuji di Israel. Davidi mata 7 mil kondutor di karu di géra i 40 mil trópa síriu ki staba apé. Tanbê el mata Sofaki, xéfi di ses trópa. 19 Kantu kes sérvu di Adadezer odja ma Israel ganha-s, kel óra es faze pas ku Davidi i es bira ses sérvu. I kes síriu ka krê djudaba kes amonita otu bês.