Primeru livru di Krónikas

20 Na komésu di anu,* na ténpu ki kes rei ta kustuma saíba pa géra, Joabe leba ses trópa pa ataka téra di kes amonita i el distrui-l. El bai i el serka Rabá, má Davidi fika na Jiruzalen. Joabe ataka Rabá i el distrui-l. 2 Nton, Davidi tra koroa di kabésa di Malkan* i es poi Davidi el na kabésa. Kel koroa éra di oru, el ta pezaba 34 kilu* i el tinha pédras di valor na el. Tanbê Davidi leba txeu kuza ki el panha na kel sidadi. 3 Davidi prende kes algen ki staba la i el pô-s ta sera pédra, ta trabadja ku feraméntas di féru moladu i ku matxadu. El faze kel-li ku tudu kes sidadi di kes amonita. Dipôs, Davidi ku tudu kes trópa volta pa Jiruzalen.

4 Dipôs di kel-li, kontise un géra ku kes filisteu na Jezer. É na kel géra la ki Sibekai, kel uzatita, mata Sipai, kel disendenti di kes refain. I Israel ganha kes filisteu.

5 Kontise más un géra kóntra kes filisteu, i Elanan, fidju di Jair, mata Lami, irmon di Gulias, kel jeteu. Lansa di Lami tinha un kabu sima kes silindru ki ta uzadu pa faze tisidu.

6 Kontise más un géra, má di es bês na Gate. Staba un ómi la ki se altura ka éra normal. El tinha 24 dédu: 6 dédu na kada mô i 6 dédu na kada pé, i tanbê el éra disendenti di kes refain. 7 El staba ta dizafia Israel. Nton, Jonatan, fidju di Simeia, mata-l. Simeia éra irmon di Davidi.

8 Es éra disendenti di kes refain ki ta viveba na Gate. É Davidi ku ses trópa ki mata-s.