4 Perdon

KUZÊ KI KEL-LI SIGINIFIKA

Púrdua krê fla ma bu ta dexa kel kuza pa la i ma bu ka ta xinti más ninhun mágua pamodi kel ki kontise. Perdon ka krê fla ma bu ka ta liga kel kuza mariadu ki kontise ô ma bu ta finji ma nada ka kontise.

KONSEDJU DI BÍBLIA: ‘Nhos kontinua ta suporta kunpanheru i ta púrdua kunpanheru di korason, sikrê algen tene algun razon di kexa kóntra kel otu.’ — Colossenses 3:13.

“Óras ki bu ta ama un algen, bu ka ta konsentra na se fadjas, má envês di kel-li bu ta konsentra na kel sforsu ki el sta ta faze pa el tenta ser un algen midjór.” — Aaron.

PAMODI KI KEL-LI É INPORTANTI

Si bu dura ta xinti mágua, bu pode prujudika bu saúdi i manera ki bu ta xinti. Tanbê bu pode prujudika bu kazamentu.

“Un bês nha maridu pidi-m diskulpa pamodi un kuza ki el faze ki magua-m txeu. Foi txeu difísil pa N konsigi purdua-l. Ku ténpu, N konsigi, má N rapende pamodi N ka purdua-l antis. Kel-li kria un anbienti kasábi na nos kazamentu sen nisisidadi.” — Julia.

KUZÊ KI BU PODE FAZE

FAZE UN TÉSTI PA BU KABÉSA

Otu bês, óras ki bu maridu ô bu mudjer fla ô faze algun kuza ki magua-u, pergunta bu kabésa:

• ‘N ta mágua faxi dimás?’

• ‘Kel ki el faze é txeu gravi ki N meste pa el pidi-m diskulpa ô N pode sô dexa pa la?’

NHOS PÂPIA KU KUNPANHERU SOBRI KES PERGUNTA LI

• Kantu ténpu ta kustuma leba pa nu pode púrdua kunpanheru?

• Kuzê ki nu pode faze pa nu konsigi púrdua kunpanheru más faxi?

AJUDA

• Óras ki bu maridu ô bu mudjer faze algun kuza ki magua-u, ka bu fika ta pensa ma éra kel-la ki el kria faze-u.

• Tenta púrdua bu maridu ô bu mudjer pamodi kel ki el faze. Lenbra ma ‘nos tudu nu ta fadja txeu bês’. — Tiago 3:2.

“É fásil púrdua óras ki é nhos tudu dôs ki ten kulpa, má óras ki é sô un di nhos ki ten kulpa, é más difísil púrdua. Pa nhos konsigi seta diskulpa di kunpanheru i púrdua ta iziji pa nhos mostra umildadi di verdadi.” — Kimberly.

KONSEDJU DI BÍBLIA: ‘Si bu ten algun prubléma pa rezolve ku un algen, rezolve-l faxi’. — Mateus 5:25.