Pamodi ki bu debe kontinua ta studa Bíblia?

1. Pamodi ki kontinua ta studa Bíblia ta djuda-u?

Di sertéza, studu di kes primeru ensinu di Bíblia li, poi bu amor pa Jeová bira más fórti. Bu meste kontinua ta sforsa pa es amor bira más fórti inda. (1 Pedro 2:2 ) Óras ki bu kontinua ta studa Bíblia, bu ta bira más amigu di Deus i bu ta ten speransa di vida itérnu. — Lé João 17:3; Judas 21.

Sima bu ta ba ta sabe más di Deus, bu fé ta fika más fórti. Fé ta djuda-u faze kel ki Deus gosta. (Hebreus 11:1, 6 ) Fé tanbê ta pô-u rapende i muda bu vida. — Lé Atus 3:19, BPK.

2. Modi ki kes kuza ki dja bu sabe di Deus pode djuda otus algen?

É normal bu krê pâpia ku otus algen di kuzas ki bu prende, nos tudu nu gosta di da notísias sábi. Sima bu ta ba ta studa Bíblia, bu ta prende uza-l pa splika bu fé na Jeová i pa mostra otus algen kes notísia sábi ki Bíblia ten. — Lé Romanos 10:13-15.

Kuazi tudu algen ta kumesa ta prega óras ki es pâpia ku amigus i família di kuzas sábi ki es prende. Má pâpia ku ruspetu. Ka bu fla-s ma ses relijion é mariadu, pâpia di promésas di Deus. Ka bu skese tanbê ma txeu bês algen ta repara más na kuzas ki bu ta faze, di ki na kel ki bu ta fla. — Lé 2 Timóteo 2:24, 25.

3. Ki tipu di amizadi bu pode ten ku Deus?

Studa Palavra di Deus ta djuda-u ser kel tipu di algen ki Deus krê. Ku ténpu, bu pode ben ten un amizadi fórti ku Jeová. Bu pode ti bira párti di Se família. — Lé 2 Coríntios 6:18.

4. Modi ki bu pode kontinua ta ser kel tipu di algen ki Deus krê?

Óras ki bu kontinua ta studa Palavra di Deus, bu pode bira kel tipu di algen ki Deus krê. (Hebreus 5:13, 14 ) Pidi un Tistimunha di Jeová pa studa Bíblia ku bo, na livru Kuzê ki nu pode prende na Bíblia?. Sima bu ta ba ta prende más di Palavra di Deus, bu vida ta ba ta bira más midjór. — Lé Salmo 1:1-3; 73:27, 28.

Kes notísia sábi ta ben di Jeová ki é Deus filís. Bu pode ser se amigu óras ki bu bira amigu di Se povu. (Hebreus 10:24, 25 ) Sima bu ta ba ta sforsa pa poi Jeová ta fika kontenti, bu sta ta buska vida di verdadi, ki é vida pa tudu ténpu. Bira más amigu di Deus é midjór kuza ki bu pode faze. — Lé 1 Timóteo 1:11; 6:19.