LISON 12

Kuzê ki ta djuda-u kontinua ta studa Bíblia?

Formatu di livru na papel

Studa Bíblia é bon pa bo, má alvês pode ka ser fásil. Talvês bu pode pergunta si bu ta konsigi kontinua ta studa Bíblia. Pamodi ki bale péna kontinua ta studa? Kuzê ki pode djuda-u kontinua ta studa sikrê ku prublémas?

1. Pamodi ki studa Bíblia é inportanti?

‘Palavra di Deus é bibu i el ten puder’. (Hebreus 4:12) Bíblia é un livru inportanti, pamodi el ta mostra kuzê ki Deus ta pensa i kuzê ki el ta xinti pa bo. El ta djuda-u ka ten sô konhisimentu, má tanbê sabedoria di verdadi i speransa. Más inportanti inda, Bíblia ta djuda-u bira amigu di Jeová. Óras ki bu ta studa Bíblia bu sta dexa-l midjora bu vida.

2. Pamodi ki é inportanti da valor pa kuzê ki Bíblia ta inxina?

Verdadis di Bíblia é sima tizorus ki ten txeu valor. É pur isu ki Bíblia ta insentiva-nu pa nu ‘kunpra verdadi i nunka ka nu bende-l’. (Provérbios 23:23) Óras ki nu ta da valor pa kuzê ki Bíblia ta inxina, nu ta kontinua ta studa, sikrê nu sta pasa pa prublémas. — Lé Provérbios 2:4, 5.

3. Modi ki Jeová pode djuda-u kontinua ta studa?

Jeová, ki é bu Kriador i bu Amigu, krê djuda-u prende sobri el. El pode da-u ‘dizeju i forsa pa bu aji.’ (Lé Filipenses 2:13.) Nton, si alvês bu meste xinti más vontadi pa studa ô pa faze kel ki bu prende, el pode djuda-u. El pode da-u más forsa pa bu vense prublémas ô pirsigison. Pidi Jeová sénpri na orason pa djuda-u kontinua ta studa Bíblia. — 1 Tessalonicenses 5:17.

SABE MÁS

Odja modi ki bu pode kontinua ta studa Bíblia, sikrê bo é un algen txeu okupadu ô otus algen ka krê pa bu studa, i modi ki Jeová pode djuda-u kontinua ta studa.

4. Studu di Bíblia debe ser un kuza inportanti pa bo

Alvês nu ta sta okupadu dimás ki ta parse ma nu ka ten ténpu pa studa Bíblia. Kuzê ki pode djuda-nu? Lé Filipenses 1:10, i dipôs pâpia sobri kes pergunta li:

Kal ki é alguns kuza ki bu ta atxa ma é ‘más inportanti’ na vida?
Modi ki studu di Bíblia pode bira un kuza inportanti pa bo?

1. Dizenhus: Ta mostra un baldi, pédras i areia. 1. Areia i pédras. 2. Un baldi ku areia ti metadi. 3. Alguns pédra riba di areia i otus dja baza na txon.

2. Dizenhus: 1. Kel mésmu monti di areia i kel mésmu monti di pédra. 2. Kel mésmu baldi xeiu di pédra. 3. Areia dja entra na meiu di kes pédra, dja intxi ti bóka. Inda resta un bokadinhu di areia fóra di baldi.

Si bu intxi un baldi ku areia i dipôs bu tenta poi pédra, kes pédra ka ta kebe
Si bu poi kes pédra primeru bu ta konsigi poi kuazi tudu kel areia na el. Di mésmu manera, si bu poi kes kuza ki é más inportanti na primeru lugar na bu vida bu ta konsigi faze-s i inda bu ta ten ténpu pa faze otus kuza.

Studa Bíblia ta satisfaze nos nisisidadi spritual, ô kel nisisidadi ki nu ten di konxe i adora Deus. Lé Mateus 5:3, i dipôs pâpia sobri kel pergunta li:

Modi ki studu di Bíblia ta djuda-nu óras ki el bira un kuza inportanti pa nos?

5. Ka bu dizisti sikrê ku opozison

Alvês otus algen pode tenta pô-u ta dizisti di studa Bíblia. Odja izénplu di Francesco. Odja VÍDIU, i dipôs pâpia sobri kes pergunta li:

VÍDIU: El abensuadu pamodi el ka dizisti (5:22)

Un párti di vídiu ‘El abensuadu pamodi el ka dizisti’. Francesco bai se kaminhu dipôs ki el fla se amigus ma el ka ta kolegaba ku es más.

Na vídiu, modi ki amigus di Francesco i se mai reaji kantu el fla-s kuzê ki el staba ta prende?
Ki bensons el resebe pamodi el ka dizisti?

Lé 2 Timóteo 2:24, 25, i dipôs pâpia sobri kes pergunta li:

Kuzê ki bu família i amigus ta atxa di kuzê ki bu sta prende?
Di akordu ku kes versíklu li, kuzê ki bu debe faze si un algen ka krê pa bu studa Bíblia? Pamodi?

6. Kunfia ma Jeová ta djuda-u

Sima nu ta ba ta bira más amigu di Jeová, nu ta fika ku más vontadi di faze kel ki el krê. Má simé, alvês pode ser difísil faze mudansas pa vive sima Jeová ta krê. Si algun bês dja bu kustuma xinti si, ka bu dizisti. Jeová ta djuda-u. Odja VÍDIU, i dipôs pâpia sobri kes pergunta li:

VÍDIU: Jeová ta djuda-nu faze mudansas na vida (3:56)

Na vídiu, ki mudansas Jim faze pa agrada Jeová?
Kuzê ki más bu gosta di se izénplu?

Lé Hebreus 11:6, i dipôs pâpia sobri kes pergunta li:

Kuzê ki Jeová ta ben faze pa kes algen ki ta ‘djobe-l asériu’, ô kes ki ta sforsa pa konxe-l i agrada-l?
Modi ki Jeová ta xinti óras ki el ta odja sforsu ki bu ta faze pa studa Bíblia?

UN ALGEN PODE PERGUNTA: “Pamodi ki bu sta ta studa Bíblia?”

Modi ki bu ta respondeba?

REZUMU

Nbóra pode ka ser fásil, studa Bíblia pode djuda-u ser filís pa tudu ténpu. Kontinua ta kunfia na Jeová i el ta abensua-u.

Perguntas di rezumu

Pamodi ki verdadis di Bíblia ten txeu valor pa bo?
Modi ki bu pode ‘konfirma kuzê ki é más inportanti’?
Pamodi ki bu debe pidi Jeová pa djuda-u kontinua ta studa Bíblia?

Dia ki N tirmina kel párti li:

Sprimenta faze kel-li

Kontinua ta studa peloménus un bês pa simana. Si ka da pa studa na kel dia ô óra ki nhos konbina, tenta atxa otu dia ô otu óra.

Sprimenta tanbê:

Otu kuza pa bu sprimenta

DJOBE MÁS

Odja kuatu kuza ki dja djuda txeu algen uza ses ténpu dretu.

“Modi ki bu pode uza bu ténpu dretu” (Nhos korda!, febreru di 2014)

Repara modi ki Jeová djuda un mudjer ki se maridu ka ta ntendeba sforsu ki el ta fazeba pa agrada Deus.

Jeová ta da-nu forsa pa nu karega nos karga (5:05)

Odja modi ki un mudjer ki ka dizisti di studa Bíblia konsigi djuda se maridu.

N krê provaba si éra verdadi (6:30)

Es ta kustuma fla ma Tistimunhas di Jeová ta dividi família. Má kel-li é verdadi?

“Tistimunhas di Jeová ta sipara ô ta uni famílias?” (Artigu na jw.org)