Kuzas ki nu ta prende na Palavra di Deus
Kuzê ki ta ben kontise na Dia di Julgamentu?
Kel artigu li ten alguns pergunta ki talvês dja bu kustuma faze i el ta mostra undi ki bu pode atxa kes respósta na Bíblia. Tistimunhas di Jeová ta fika kontenti di pâpia ku bo sobri kes respósta.
1. Kuzê ki é Dia di Julgamentu?
Sima kel imaji na direita ta mostra, txeu algen ta atxa ma na Dia di Julgamentu un monti di alma ta lebadu pa fika dianti di tronu di Deus pa julgadu di akordu ku kes kuza ki es fazeba antis. I es ta atxa ma alguns algen ta rekonpensadu ku vida na Séu i otus ta kemadu pa tudu ténpu na inférnu. Má Bíblia ta mostra ma obijetivu di Dia di Julgamentu é libra algen di injustisa. (Salmo 96:13) Deus skodje Jizus pa ser kel Juís ki ta ben poi justisa na Téra. — Lé Isaías 11:1-5; Atos 17:31.
2. Modi ki Dia di Julgamentu ta ben traze justisa?
Dja ki kel primeru ómi, Adon, disidi rabela kóntra Deus, nos tudu nu ta peka, nu ta sufri i nu ta móre. (Romanos 5:12) Pa rezolve kel prubléma li, Jizus ta ben poi un monti di algen ta vive otu bês. Livru di Apocalipse ta mostra ma kel-li ta ben kontise duránti kes mil anu ki Jizus ta ben governa. — Lé Apocalipse 20:4, 11, 12.
Kes algen ki resusitadu ka ta ben julgadu ku bazi na kuzê ki es faze antis di es móre, envês di kel-li, es ta ben julgadu ku bazi na kuzê ki es faze dipôs ki es resusitadu. I es ten ki ben vive di akordu ku kes ‘rolu’ ki ta abridu, ki é orientasons novu ki Deus ta ben da i ki Apocalipse kapítlu 20 ta pâpia di el. (Romanos 6:7) Apóstlu Polu fla ma ‘ta ben ten resureison di algen justu i tanbê di algen injustu.’ I es ta ben ten oportunidadi di prende sobri Deus. — Lé Atos 24:15.
3. Kuzê ki Dia di Julgamentu ta ben faze pa nos?
Kes algen ki móre sen konxe Jeová Deus i sen sirbi-l ta ten oportunidadi di muda ses manera di ser i di faze kuzê ki é dretu. Si es faze kel-li, es ta resusitadu pa ‘un resureison di vida’. Má ta ben ten txeu algen ki ka ta ben krê obi ku Jeová, pur isu es ta ten ‘un resureison di julgamentu.’ — Lé João 5:28, 29; Isaías 26:10; 65:20.
Na fin di kes mil anu di Dia di Julgamentu, tudu algen na Téra ki obi ku Jeová dja ta sta perfetu sima éra na komésu. (1 Coríntios 15:24-28) Fórti speransa sábi pa tudu kes algen ki ta obi ku Deus! Deus ta ben faze un últimu próva i el ta ben larga Satanás, ki ta sta prézu duránti kes mil anu. Satanás ta ben torna tenta disvia algen di Jeová, má kes ki fika di ladu di Jeová ta ben vive pa tudu ténpu na Téra. — Lé Isaías 25:8; Apocalipse 20:7-9.
4. Kal ki é kel otu dia di julgamentu ki ta ben djuda-nu?
Bíblia tanbê ta fla ma fin di kel mundu mau li, tanbê é un ‘dia di julgamentu’. Kel dia di julgamentu li ta ben dirapenti, sima kontise na Dilúviu na ténpu di Nué, ki kaba ku tudu kes algen mau di kel ténpu. Nu pode fika kontenti pamodi ka ta dura, tudu ‘kes algen mau’ ta ben distruídu i nu ta ben vive na un mundu ki ‘ta ben ten justisa.’ — Lé 2 Pedro 3:6, 7, 13.