Tistimunhas di Jeová ta uza mudjeris pa inxina?

Sin, na mundu interu ten milhons di mudjer ki é Tistimunha di Jeová ki ta inxina. Es ta faze párti di un monti di mudjer ki ta prega notísias sábi di Reinu di Deus. Un profesia na Salmo 68:11, ki ta pâpia sobri es, ta fla: ‘É Jeová ki ta da órdi; Mudjeris ki ta pâpia di notísias sábi é un grandi izérsitu.’

Má agó, nu ka debe konfundi kel manera ki mudjeris ki é Tistimunha di Jeová ta inxina ku kel manera ki mudjeris di otus relijion ta inxina. Ten un diferénsa grandi entri kes manera di inxina li. Kal ki é kes diferénsa?

Kes mudjer di otus relijion txeu bês ta inxina déntu di ses igreja, má kes mudjer ki é Tistimunha di Jeová ta inxina algen fóra di kongregason, pa tudu kes algen ki es ta atxa di kaza en kaza i na otus situason ô lugar.

Otu diferénsa é ki na kongregasons di Tistimunhas di Jeová sô ómis ki ta dadu responsabilidadi di kuida di kongregason. Nton mudjeris ka ta inxina na kongregason, óras ki ómis batizadu sta la. — 1 Timóteo 3:2; Tiago 3:1.

Bíblia ta fla ma é sô ómis ki debe dadu responsabilidadi di inxina na kongregason. Pur izénplu, apóstlu Polu skrebe pa Titu, ki éra un enkaregadu di kongregason tanbê, i el fla-l: ‘N dexa-u na Kreta. . . pa bu faze diziginasons di ansions na kada sidadi’. Polu inda fla ma kada ómi ki ten responsabilidadi na kongregason debe ser un ‘ómi ki ka sta akuzadu di nada, maridu di sô un mudjer’. (Tito 1:5, 6) Apóstlu Polu da Timótiu un orientason kuazi igual. El fla-l: ‘Si un ómi sta ta sforsa pa ser enkaregadu, el sta ta dizeja un bon trabadju. Pur isu un enkaregadu debe ser algen ki ka ta faze nada pa el txomadu atenson, maridu di un mudjer sô. . . ki sabe inxina.’ — 1 Timóteo 3:1, 2.

Pamodi ki responsabilidadi di kuida di kongregason ta dadu sô pa ómis? Polu fla: ‘N ka ta permiti pa mudjer inxina ô pa manda na ómi, má el debe fika kaladu. Pamodi, Adon fazedu primeru, dipôs foi Eva.’ (1 Timóteo 2:12, 13) Kel-li ta mostra ma dja ki Deus kria ómi primeru, el disidi da-l responsabilidadi di inxina i di ser enkaregadu di kongregason.

Tudu Tistimunha di Jeová ta sigi izénplu di ses Líder, ki é Jizus Kristu. Disiplu Lukas skrebe kel-li sobri trabadju di pregason di Jizus: ‘El kumesa ta viaja di un sidadi pa kel otu sidadi i di un zóna pa kel otu zóna, ta prega i ta pâpia sobri notísias sábi di Reinu di Deus.’ Dipôs, Jizus manda se disiplus pa es faze kel mésmu trabadju. Nton, ‘es bai i es anda pa tudu kel zóna, ta sai di un vila ta entra na kel otu, ta pâpia di notísias sábi’. — Lucas 8:1; 9:2-6.

Oji tudu Tistimunha di Jeová, ómi ku mudjer, ta faze tudu kel ki es pode pa kunpri ku kel ki Jizus fla: ‘I kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.’ — Mateus 24:14.