Lenbra di kel amor ki N tinha na komésu djuda-m aguenta firmi

NA MÊS di junhu di 1970, N staba internadu na un ospital di Pensilvánia na Mérka pamodi N staba ku un infeson grávi. N tinha 20 anu i mi éra trópa. Un infermeru staba ta midi nha tenson di meia en meia óra. El éra sô un bokadinhu más bédju ki mi i el staba ta parse txeu preokupadu, pamodi nha tenson staba sô ta dixi. Nton N pergunta-l: “Nunka bu ka odja ningen ta móre, ka simé?” El fika más preokupadu inda i el fla-m: “Nau, nunka N ka odja.”

N pensa ma N ta moreba. Má modi ki N bai para na kel ospital? Dexa-m konta nhos un bokadinhu di nha stória.

MODI KI N KONXE GÉRA

N fika duenti timenti N staba ta djuda na un sala ki es ta fazeba operason duránti géra na Vietnam. N gostaba txeu di djuda kes algen ki staba duenti i kes ki panhaba pankada, i N krê biraba dotor i fika ta faze algen operason. N txiga na Vietnam na mês di julhu di 1969. Sima ta kontiseba ku tudu trópa ki ta txigaba, N dadu un simana pa N kustuma ku diferénsa di óra i ku kel kalor ki tinha la.

N kumesa ta trabadja na un ospital di trópas na zóna undi ki riu Mekong ta dividi pa bai pa mar. N txiga di odja un monti di elikópitru ta traze trópas tudu pankadiadu ô mortu. N ta amaba nha país i nha trabadju. Pur isu, N krê kumesaba ta trabadja lógu. Es ta lebaba kes trópa ki tinha pankada pa kes sala di operason, ki na verdadi éra uns kontentor ki tinha ar-kondisionadu. Ta staba un dotor ki ta fazeba operason, otu ki ta daba anestizia i dôs infermeru na kel lugar pikinoti ta faze ses midjór pa salva kes vida. N da kónta ma uns saku grandi i prétu ta fikaba déntu di elikópitru. Dipôs N fladu ma kes-la éra korpu di trópas ki fika padás-padás pamodi bonbas ki spludi. É si ki N konxe géra.

MODI KI N KUMESA TA BUSKA DEUS

Kes primeru bês ki N obi Tistimunhas di Jeová ta inxina, N staba pikinoti inda. Nha mai ki N krê txeu ta studaba Bíblia ku es, má nunka el txiga di batiza. N gostaba txeu di sisti kes studu. Un dia mi ku nha padrastu staba ta pasa frenti di un Salon di Reinu. N pergunta-l: “Kel-la é ki lugar?” El fla-m: “Fika lonji di kes algen la!” N gostaba txeu di nha padrastu i N ta kunfiaba na el, pur isu N obi ku kuzê ki el fla-m. I N ka pâpia ku Tistimunhas di Jeová más.

Kantu N ben di Vietnam, N xinti ma N mesteba di Deus na nha vida. Kes lenbransa kasábi ki N tinha di Vietnam staba ta mexe txeu ku mi. Pur isu, N ka ta ligaba otus kuza ki ta kontiseba na nha vólta. N ta atxaba ma ningen ka ta ntendeba kuzê ki staba ta kontise na Vietnam. N ta lenbra ma fazedu alguns manifestason kóntra trópas di Mérka pamodi alguns notísia fla ma es staba ta mata bebé na géra.

N bira ta bai pa alguns igreja asi pa N xintiba más pértu di Deus. N ta amaba Deus, má N ka gostaba di kes kuza ki N staba ta odja na igreja. Dipôs N kaba pa bai pa Salon di Reinu di Tistimunhas di Jeová, na Delray Beach, na Flórida. Kel-li kontise na un dumingu di febreru di 1971.

Kantu N txiga na Salon di Reinu, diskursu pa públiku staba kuazi ta kaba, nton N fika pa sisti studu di revista Sentinéla. N ka ta lenbra kuzê ki Sentinéla staba ta pâpia di el, má N ta lenbra ma ti mininus pikinoti staba ta djobe kes testu na ses Bíblia. N fika dimiradu ku kel-la! N fika sô ta obi i ta odja. Kantu N staba ta sai un irmon, ki tinha uns 80 anu i ki txomaba Jim Gardner, ben pâpia ku mi. El da-m un livru ku téma “A Verdade Que Conduz à Vida Eterna” i el fla-m: “N ta gostaba pa bu fika ku kel livru li.” I nu marka nos primeru studu pa kinta-fera di palmanhan.

Dipôs di kel runion na dumingu N bai trabadja di noti. N ta trabadjaba na banku di urjénsia di un ospital ki ta fikaba na sidadi di Boca Raton, na Flórida. I kel dia, N trabadja di 11 óra di noti ti 7 óra di palmanhan. Na kel noti ka tevi txeu movimentu, pur isu N konsigi lé kel livru Verdade. Un infermera txiga, el tra-m kel livru di mô, el djobe pa kapa i el fla-m: “N ta spéra ma bu ka sta ben bira un Tistimunha di Jeová?” N torna toma nha livru i N fla-l: “Dja N lé sô metadi di kel livru li, má parse-m ma N sta ben bira un Tistimunha di Jeová sin!” El dexa-m mi sô i N tirmina di lé kel livru na kel noti.

Kantu irmon Jim txiga pa nu faze nos primeru studu, N pergunta-l: “Kuzê ki nu sta ben studa?” El responde-m: “Kel livru ki N da-u.” N fla-l: “Dja N kaba di le-l.” Irmon Jim fla-m ku bondadi: “Má simé, nu ben odja kel primeru kapítlu.” N fika dimiradu di odja un monti di kuza ki N dexa pasa sen N da kónta. El fla-m pa N lé txeu testu na nha própi Bíblia, ki éra un Traduson di Rei Jaime. Ti ki enfin, N staba ta prende sobri kel Deus verdaderu, Jeová. Kel dia di palmanhan, mi ki irmon Jim nu studa três kapítlu di livru Verdade. I di la pa dianti tudu kinta-fera di palmanhan nu ta studaba três kapítlu. N gostaba txeu di kes studu. Foi un priviléjiu studa Bíblia ku un irmon skodjedu ku spritu santu ki txiga di konxe irmon Charles Russell!

Dipôs di alguns simana, N aprovadu pa prega notísias sábi. Jim djuda-m ku txeu di nhas preokupason. I tanbê el djuda-m vense kel medu ki N tinha di prega di kaza en kaza. (Atos 20:20) Jim ta pregaba txeu ku mi, pur isu N bira ta gosta txeu di trabadju di pregason. I ti inda N ta atxa ma trabadju di pregason é kel priviléjiu más grandi ki N ten. N ta xinti filís di ser kolaborador di Deus! — 1 Cor. 3:9.

KEL AMOR KI N XINTI PA JEOVÁ NA KOMÉSU

Gósi dexa-m konta nhos un kuza ki é txeu spesial pa mi. É sobri kel amor ki N xinti pa Jeová na komésu. (Apo. 2:4) Kel amor li djuda-m lida ku kes lenbransa kasábi di géra i ku un monti di otus prubléma ki N pasa pa el. — Isa. 65:17.

N ta lenbra di un kuza spesial ki kontise na un dia di anu 1971. Na kel ténpu, N tevi ki sai di kel kaza undi ki N ta moraba, ki éra di nha mai ku nha padrastu, pamodi nha padrastu ka kria pa un Tistimunha di Jeová moraba na se propriadadi! N staba ku poku dinheru. Ospital ta pagaba mi di 15 en 15 dia, i dja N gastaba kuazi tudu nha dinheru pa N kunpra ropa pa trabadju di Jeová. N tinha dinheru guardadu na un banku di Michigan, ki é sidadi undi ki N nase, má kel-la ta fikaba lonji. Pur isu duránti alguns dia, N tevi ki mora na nha karu. N ta fazeba barba i N ta lababa na kes kaza di banhu di kes lugar ki karu ta poba gazulina.

Un dia timenti N staba ta mora na nha karu, N sai di trabadju na ospital i N bai pa Salon di Reinu. N txiga uns óra antis di runion pa pregason kumesa. Timenti N staba ta spéra irmons txiga, N kumesa ta lenbra di kes kuza kasábi ki kontise na Vietnam. N fika ta lenbra di txeru di algen kemadu i di tudu kel sangi ki N odja, i kel-la pô-m ta xinti dizusperadu. Éra sima si N staba ta odja i ta obi kes jóven ta fla: “N ta skapa? N ta skapa?” N sabia ma es staba ta ba móre, má pa konsola-s N ta finjiba ma tudu kuza ta fikaba dretu. Kes lenbransa li kaba ku mi.

N ora pa Jeová timenti N staba ta txora txeu. (Sal. 56:8) Nton, N kumesa ta pensa más dretu na resureison. I N da kónta ma kel-li é un speransa rei di sábi. Jeová ta ben resusita kes jóven i es ta ten oportunidadi di prende verdadi sobri el. Resureison ta ben kaba ku tudu dór i sufrimentu ki mi i otus algen pasa pa el. (Atos 24:15) Kantu N ntende kel-li, nha amor pa Jeová bira mutu más fórti di ki antis. Kel-la foi un dia txeu spesial pa mi. Di la pa dianti, N ta sforsa txeu pa N ka perde kel amor ki N xinti pa Jeová na komésu, prinsipalmenti óras ki N ta pasa pa difikuldadis.

JEOVÁ SÉNPRI FOI BON PA MI

Na géra, algen ta faze kuzas mariadu dimás. Mi mê N faze. Má óras ki N ta pensa na kes dôs testu ki N gosta más txeu, N ta xinti midjór. Kel primeru é Apocalipse 12:10, 11, ki ta fla ma sangi i pregason di Jizus ta ganha Diabu. Kel sugundu é Gálatas 2:20. Kel testu li ta djuda-m lenbra ma Jizus móre ‘pa mi.’ É pamodi sakrifisiu di Jizus ki Jeová purdua-m kes kuza ki N faze. Kel-li ta djuda-m ten un konsénsia linpu i ta pô-m ta krê pâpia ku otus algen sobri nos Deus Jeová, ki é un Deus ki ta púrdua! — Heb. 9:14.

Óras ki N ta lenbra di tudu kuza ki N pasa, N ta fika ku sertéza ma Jeová sénpri kuida di mi. Pur izénplu, kantu Jim fika ta sabe ma N staba ta mora na nha karu, el mostra-m un irman ki ta lugaba kuartu. N ka ten dúvida ma Jeová uza Jim i kel irman pa djuda-m ten un lugar pa N mora. Jeová ta mostra txeu bondadi própi. El ta kuida di se sérvus fiel.

N PRENDE PÂPIA KU ZELU MÁ KU JETU

Na mês di maiu di 1971, N tevi ki bai pa Michigan pa N ba kuida di alguns asuntu. Antis di N sai di Flórida, N intxi nha karu ku publikasons i N kumesa ta bai pa Michigan. Antis di N txiga metadi di kaminhu dja N dexaba tudu kes publikason. N prega notísias sábi di Reinu ku zelu na tudu tipu di lugar. N prega na alguns kadia i ti N dexa folhetus ku alguns ómi na kes kaza di banhu públiku bera di strada. N ta fika ta pergunta si alguns di kes algen ki N pâpia ku es na kel ténpu, kumesa ta sirbi Jeová. — 1 Cor. 3:6, 7.

Má N ten ki rekonhese ma lógu ki N prende verdadi, N ka ta papiaba ku jetu óras ki N ta pregaba, prinsipalmenti ku nha família. Pamodi kel amor fórti ki N tinha pa Jeová, N ta pregaba ku koraji, má alvês mi éra dirétu dimás. N ta ama nhas irmon, John i Ron, txeu. I na komésu N tenta obriga-s seta verdadi, dipôs gó N pidi-s diskulpa pamodi manera ki N pâpia ku es. Má nunka N ka para di ora pa es seta verdadi. I Jeová ba ta inxina-m poku-poku i gósi N ta prega i inxina ku más bondadi. — Col. 4:6.

OTUS ALGEN KI N KRÊ TXEU

Jeová é kel algen ki N ta ama más txeu. Má ten otus algen ki tanbê N ta ama txeu. É klaru ki primeru é nha mudjer, Susan. N kria un mudjer ki ta apoiaba mi na trabadju di Reinu. Susan ten un fé fórti na Jeová. N ta lenbra dretu ma un dia N bai vizita-l na kaza di se mai ku se pai timenti nu staba ta namora. Kantu N txiga, N odja-l xintadu na varanda ta lé revista Sentinéla i ta djobe testus na Bíblia. N fika dimiradu pamodi el staba ta djobe kes testu na Bíblia sikrê ka éra un artigu di studu. N odja ma se amizadi ku Jeová é inportanti pa el. Nu kaza na dizénbru di 1971. N ta xinti txeu gratidon pamodi N ten un mudjer ki sénpri ta sta na nha ladu ta apoia-m. Kuzê ki N gosta más txeu na el é pamodi el ta ama-m, má el ta ama Jeová inda más txeu.

Mi ku Susan nu fika txeu kontenti kantu nu tevi nos dôs fidju, Jesse i Paul. Jeová djuda nhas fidju txeu timenti es staba ta kria. (1 Sam. 3:19) Es ten ses própi amizadi ku Jeová i kel-li ta dexa mi ku Susan txeu kontenti. I es ta kontinua ta sirbi Jeová pamodi es ka dexa kel amor ki es xinti pa Jeová na komésu fria. Dja ten más di 20 anu ki es sta ta sirbi pa ténpu interu. N ten txeu orgulhu di kes mudjer bunita ki es kaza ku el, Stephanie i Racquel. É sima ki es é nhas própi fidju-fémia. N ta fika kontenti pamodi nhas fidju kaza ku mudjeris ki ta ama Jeová di tudu ses korason i ki ta uza ses vida pa sirbi-l. — Efé. 6:6.

Dipôs ki N batiza, N sirbi duránti 16 anu na Rhode Island, i N faze txeu amigu la. Inda N ta lenbra di kes bons ansion ki N sirbi ku es. Tanbê ami é gratu pa tudu kes enkaregadu di grupu di kongregason ki djuda-m txeu. É un priviléjiu sirbi djuntu ku kes ómi li, ki ka dexa ses amor pa Jeová fria! Na anu 1987, nu muda pa Karolina di Nórti pa nu ba sirbi undi ki tinha más nisisidadi i nu faze bons amigu la tanbê.

Na mês di agostu di 2002, mi ku Susan, nu seta konviti pa ba sirbi na Betel di Mérka, na Patterson. N trabadja na Dipartamentu di Sirvisu i Susan trabadja na laba ropa. El gosta dimás di sirbi la. Na mês di agostu di 2005, N dadu priviléjiu di faze párti di Grupu Enkaregadu di Óbra. N ta atxaba ma N ka staba priparadu pa kel responsabilidadi li. Susan tanbê fika txeu preokupadu pamodi kes trabadju i kes viaji ki nu bira ta faze. Susan nunka ka gosta di viaja di avion, má nu ta faze kel-la tudu óra. El fla ma kuzê ki kes mudjer di kes otu irmon di Grupu Enkaregadu di Óbra fla-l, djuda-l txeu pa el kontinua disididu na apoia-m. I N ta ama-l txeu pamodi el sta ta faze kel-li.

N tene un monti di fotu na nha skritóriu ki ta djuda-m lenbra modi ki nha vida foi rei di sábi. N resebe txeu benson pamodi N ka dexa kel amor ki N xinti pa Jeová na komésu fria.