Profesias ki dja kunpri

Na komésu di kel revista li nu pâpia di stória di Krezu, ki nganadu i el perde géra kóntra rei di Pérsia. Má, Bíblia ten un profesia spetakular sobri kel rei di Pérsia li. Kel profesia li kunpri tintin pa tintin.

Uns 200 anu antis, txeu ténpu antis di kel rei di Pérsia nase, proféta Izaías ki éra ebreu, splika modi ki kel rei li ta tomaba sidadi di Babilónia. Ti el fla ma kel rei li txomaba Siru.

Isaías 44:24, 27, 28: ‘É si ki Jeová fla: “Kel ki fla kes agu ki sta na lugar fundu: ‘Nhos seka! N ta seka tudu bus riu’. Kel ki ta fla Siru: ‘El é nha pastor i el ta ben faze tudu kel ki N krê’; Kel ki fla Jiruzalen: ‘El ta torna konpodu’, i sobri ténplu: ‘Bu alisérsi ta ben fazedu.’”’

Un storiador di Grésia ki txoma Eródutu, fla ma kes trópa di Siru disvia kes agu di riu Eufratis ki ta pasaba na meiu di sidadi di Babilónia, pur isu agu dixi. Kel planu di Siru poi se trópas ta trabesa riu apé i ta entra na sidadi. Dipôs ki Siru toma sidadi di Babilónia, el liberta kes judeu ki staba prézu i tanbê el dexa-s volta pa ses téra Jiruzalen, ki dja tinha 70 anu distruídu.

Isaías 45:1: ‘É si ki Jeová fla Siru, kel ki el skodje, kel ki N ta pega se mô direita pa vense nasons ki sta se dianti i pa dizarma kes rei, pa abri kes pórta di dôs ladu ki ta sta se dianti, asi pa kes porton ka sta fitxadu’.

Kes trópa di Pérsia entra na Babilónia pa kes pórta uma grandi di dôs ladu na muralha di sidadi ki kes trópa di Babilónia skese di fitxa. Si kes algen di Babilónia sabia di kes planu di Siru es pode fitxaba tudu kes porton ki ta baba pa riu. Má es ka faze kel-li i sidadi fika sen proteson.

Kel-li é un di kes txeu profesia di Bíblia ki kunpri tintin pa tintin.a Txeu di kes algen ki ta tenta sabe futuru ta fla ma es ta faze kel-li ku ajuda di ses deus, ki é deus falsu. Má profesias di Bíblia ta ben di Kel ki ta fla: ‘Désdi komésu N ta fla kal ki é fin, i désdi ténpu antigu kes kuza ki inda ka fazedu.’ — Isaías 46:10.

É sô Jeová ki é Deus verdaderu, ki pode fla kel-li. Sima alguns studiozu ta fla, kel nómi li siginifika ‘El ta faze kontise’. Kel nómi li ta mostra ma el pode sabe futuru i poi kuzas ta kontise di akordu ku se vontadi. Kel-li ta da-nu sertéza ma el pode kunpri tudu kuza ki el promete.

PROFESIAS KI STA TA KUNPRI GÓSI

Bu krê sabe kuzê ki profesias di Bíblia ta fla sobri nos ténpu? Dja ten uns 2 mil anu ki Bíblia fla ma ‘na ténpu di fin kuzas ta fikaba konplikadu difísil di aguenta.’ Fin di kuzê? É ka fin di téra i di algen. Má é fin di géra, frónta i sufrimentu ki dja ten txeu ténpu ta kontise ku algen na téra. Nu ben odja alguns profesia ki ta mostra ma nu sta ta vive na ‘ténpu di fin’.

2 Timóteo 3:1-5: ‘Na ténpu di fin, ómis ta ba ama sô ses kabésa, ta ama dinheru, ta ser konvensidu, orgulhozu, ta konta mintira sobri Deus, ka ta obi ku pai ku mai, ta ser ingratu, disleal, sen amor pa família, ka ta krê djobe pas ku kunpanheru, ta ser kaluniador, diskontroladu, runhu, ka ta ama kuzas dretu, traidoris, temozus, xeiu di orgulhu, envês di ama Deus es ta krê sô pasa sábi, i es ta finji ma es ta adora Deus, má es ka ta seta puder di es adorason.’

Bu ka ta konkorda ma oji algen sta ta konporta sima kel testu li ta fla? Dja bu da kónta ma nu sta ta vive na meiu di algen ki é orgulhozu, ki ta ama sô ses kabésa i ki ta ama dinheru? Dja bu repara ma algen ta iziji kada bês más i ta insisti pa kuzas fazedu di ses manera? Di sertéza gósi dja bu odja ma é normal fidjus ka obi ku ses pai i ku ses mai i ma maioria di algen krê sô pasa sábi envês di ama Deus. I kuzas sta ta fika kada bês más piór.

Mateus 24:6, 7: ‘Nhos ta ben obi ta papiadu di géras i di notísias di géras. Gentis di un nason ta briga ku gentis di otu nason i reinu ku reinu’.

Sima alguns studiozu ta fla, désdi 1914 dja móre más di 100 milhon di algen na géra. Kel nunbru li é más txeu di ki kes algen ki ta mora na txeu país. Pensa na kes lágua, tristéza i sufrimentu pamodi kes más di 100 milhon di algen ki dja móre. Kes país prende ku ses éru i es kaba ku géra?

Mateus 24:7: ‘Ta ben ten falta di kumida’.

Un organizason ki txoma Programa Mundial de Alimentos, fla: “Téra ta konsigi da kumida ki ta txiga pa tudu algen. Má, un na kada 9 algen ta durmi ku fómi tudu dia. Kel-li krê fla ma é 815 milhon di algen na mundu. Más piór inda, un na kada três algen ten saúdi fraku pamodi falta di kumida.” I ta fladu ma tudu anu, uns 3 milhon di mininu ta móre di fómi.

Lucas 21:11: ‘Ta ben ten grandis tremor di téra’.

Tudu anu ta kontise uns 50 mil tremor di téra ki algen ta xinti. Di kes tremor di téra li, uns 100 ta faze txeu stragu na prédius. I más ô ménus un bês pa anu ta kontise un grandi tremor di téra. Un piskiza ta mostra ma di 1975 ti 2000, 471 mil algen móre pamodi tremor di téra.

Mateus 24:14: ‘Kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.’

Más di 8 milhon di Tistimunhas di Jeová sta ta prega notísias sábi di Reinu di Deus na téra interu, na uns 240 país. Es ta prega na sidadis grandi, na zónas izoladu, na florésta i na montanhas. Profesia ta fla ma óras ki Deus atxa ma kel trabadju li dja tirmina, ‘fin ta ben.’ Kuzê ki kel-li krê fla? Má govérnus di ómi ta ben kaba i ma Reinu di Deus ta ben governa na ses lugar. Ki promésas ta ben kunpri óras ki Reinu di Deus ben governa? Kontinua ta lé kel revista li pa bu sabe respósta.