Matéria pa studa na runion Vida i pregason
4 TI 10 DI MAIU
TIZORUS DI PALAVRA DI DEUS | GÉNESIS 36-37
“Juzé sufri pamodi se irmons tinha siumis di el”
(Génesis 37:3, 4 ) Israel ta amaba Juzé más di ki tudu kes otu fidju, pamodi el éra fidju di se bedjisa; i el manda faze-l un ropa spesial. 4 Kantu se irmons odja ma ses pai ta amaba el más di ki tudu es, es kumesa ta odia-l, i es ka sta konsigi papiaba ku el dretu más.
‘Favor, nhos obi kuzê ki N sunha ku el’
Bíblia ta fla: ‘Kantu se irmons odja ma ses pai ta amaba el más di ki tudu es, es kumesa ta odia-l, i es ka sta konsigi papiaba ku el dretu más.’ (Génesis 37:4 ) Nu pode ti ntende pamodi ki irmons di Juzé tinha siumis di el, má es mostra falta di sabedoria kantu es dexa siumis toma kónta di es. (Provérbios 14:30; 27:4 ) Dja bu kustuma xinti siumis di un algen ki resebe atenson ô ónra ki bu kreba pa bo? Pensa na kuzê ki kontise ku irmons di Juzé. Siumis pô-s ta faze kuzas ki ku ténpu es ben rapende txeu. Ses izénplu ta djuda-nu lenbra ma é mutu más midjór ‘fika kontenti ku kes ki sta kontenti.’ — Romanos 12:15.
Juzé di sertéza xinti ma se irmons staba ku rankor di el. El ta sukundiba se ropa bunitu óras ki se irmons ta staba pértu di el? Talvês el pensa na faze kel-la. Má lenbra ma Jakó kreba pa Juzé uzaba kel ropa kómu sinal di se aprovason i amor. I Juzé krê agradaba se pai, pur isu sénpri el ta uzaba kel ropa. Kel-li é un bon izénplu pa nos. Nbóra nos Pai ki sta na Séu nunka ka ta faze skodjénsa, alvês el ta da priviléjius spesial pa alguns di se sérvus lial. Tanbê, Jeová ta pidi pa se sérvus ser diferenti di kel mundu li ki sta xeiu di korupson i konportamentu seksual mariadu. Sima kel ropa spesial di Juzé, konportamentu di kristons verdaderu ta pô-s ta ser diferenti di kes algen ki sta na ses vólta. Alvês ses konportamentu ta poi pesoas ku siumis i rankor di es. (1 Pedro 4:4 ) Un kriston debe sukundi ma el é sérvu di Deus? Nau, di mésmu manera ki Juzé nunka ka sukundi se ropa. — Lucas 11:33.
(Génesis 37:5-9 ) Dipôs, Juzé tevi un sonhu i el konta se irmons el, i kel-la foi más un kuza ki pô-s ta odia-l. 6 El fla-s: “Favor, nhos obi kuzê ki N sunha ku el. 7 Nu staba ta mara padja na meiu di kanpu kantu nha fexu labanta i el fika sakédu, i kes fexu di nhos rodia-l i es nbaxa dianti di nha fexu.” 8 Se irmons fla-l: “Bo própi ki ta ben fika rei riba di nos i ta ben manda na nos?” Nton, es atxa un otu razon pa odia-l, pamodi kes sonhu ki el ta tinha i kuzê ki el fla. 9 Dipôs di kel-li, el tevi un otu sonhu i el konta se irmons: “N tevi un otu sonhu. Kel bês li, sól, lua i 11 stréla staba ta nbaxa nha dianti.”
(Génesis 37:11 ) I se irmons fika ku siumis di el, má se pai guarda kes palavra na se menti.
‘Favor, nhos obi kuzê ki N sunha ku el’
Kes sonhu ben di Jeová. Es éra profesia, i Deus kreba pa Juzé flaba kel mensaji ki staba na kes sonhu. Di sértu manera, Juzé tinha ki fazeba sima tudu kes otu proféta faze más tardi, kantu es konta mensajis i julgamentus di Deus pa Se povu ki ka ta obiba ku El.
Ku jetu Juzé fla se irmons: ‘Favor, nhos obi kuzê ki N sunha ku el.’ Es ntende siginifikadu di kel sonhu i es ka fika kontenti ku kuzê ki es obi. Es responde: ‘Bo própi ki ta ben fika rei riba di nos i ta ben manda na nos?’ Kel stória ta kontinua ta fla: ‘Nton, es atxa un otu razon pa odia-l, pamodi kes sonhu ki el ta tinha i kuzê ki el fla.’ Kantu Juzé konta kel sugundu sonhu pa se pai i se irmons, es aji di mésmu manera ki kel primeru bês. Bíblia ta fla: ‘Se pai reprende-l i el fla-l: “Kuzê ki siginifika kel sonhu li ki bu tevi? Bu krê fla ma ami i tanbê bu mai ku bus irmon, ta ben nbaxa bu dianti ku róstu pa txon?”’ Má, Jakó kontinua ta pensa na kel asuntu. Éra Jeová ki talvês staba ta pâpia ku Juzé? — Génesis 37:6, 8, 10, 11.
Juzé ka éra kel primeru nen kel últimu sérvu di Jeová ki mandadu pa pâpia di mensaji di profesia ki pesoas ka gostaba i ki ta trazeba pirsigison. Jizus éra kel algen más inportanti ki prega kel tipu di mensaji li, i el fla se sigidoris: ‘Si es pirsigi-m ami, es ta pirsigi nhos tanbê.’ (João 15:20 ) Kristons di tudu idadi pode prende txeu ku fé i koraji di Juzé kantu el éra jóven.
(Génesis 37:23, 24 ) Nton, sin ki Juzé txiga na se irmons, es tra-l se ropa ki el tinha bistidu di riba, kel ropa spesial ki el ta uzaba, 24 i es pega-l i es bota-l na sistérna. Na kel ténpu kel sistérna staba vaziu; ka tinha agu na el.
(Génesis 37:28 ) I, kantu kes ómi di Midian, ki ta fazeba nogósiu, staba ta pasa, kes irmon di Juzé tra-l fóra di kel sistérna i es bende-l pa kes ismaelita pa 20 pésa di prata. Kes ómi leba Juzé pa Ijitu.
Djobe jóias ki sta na Bíblia
(Génesis 36:1 ) Kel-li é stória di Izaú, ki tanbê ta txomadu di Edon.
it-1 p. 752
Edon
Edon [Burmedju], Edomitas.
Edon éra kel sugundu nómi di Izaú, irmon jémiu di Jakó. (Gén 36:1) El dadu kel nómi li kantu el bende se direitu di primeru fidju pa un pratu di kumida burmedju. (Gén 25:30-34) Tanbê, Izaú nase ku uma kor burmedju, i pártis di téra ki el ku se disendentis más tardi bai mora na el tanbê éra burmedju. (Gén 25:25)
(Génesis 37:29-32 ) Dipôs, kantu Ruben volta pa sistérna i el odja ma Juzé ka staba na sistérna, el ratxa se ropas. 30 Kantu el torna bai na se irmons, el grita: “Rapazinhu dja dizaparse! I mi, kuzê ki N ta faze?” 31 Nton, es panha ropa di Juzé, es mata un bódi i es mete kel ropa na se sangi. 32 Dipôs, es manda kel ropa spesial pa ses pai i kel rekadu li: “Odja kuzê ki nu atxa. Favor, djobe si é ropa di bu fidju ô nau.”
it-1 pp. 628-629
Toma kónta, poi prézu
Óras ki un pastor ta flaba ma el ta tomaba kónta ô ma el ta guardaba un ribanhu, el staba ta mostra ma di akordu ku lei, el ta setaba responsabilidadi di toma kónta di kes animal. Kel-li ta daba kel dónu garantia ma se ribanhu ta dadu kumida i ma kes animal ka ta furtadu. Má si es furtadu kel pastor tinha ki pagaba pa es. Sô ki se responsabilidadi tinha limiti, pamodi kel lei tanbê ta flaba ma si un kuza ki el ka ta konsigi kontrolaba kontise, sima ataki di un animal brabu, el ka ta sérba kondenadu. Má, pa el fikaba livri di kel kulpa, el tinha ki mostraba kel dónu un próva, sima korpu di kel animal mortu. Dipôs ki kel dónu odjaba kel próva, el tinha ki fla ma kulpa ka éra di kel pastor.
Normalmenti, kel mésmu prinsípiu li ta aplikaba na kalker propriadadi ki un algen dadu pa toma kónta, ti mésmu na família. Pur izénplu, sima lei ta flaba, un irmon más grandi tinha ki tomaba kónta di se irmons ku irmans más pikinoti. Pur isu, ta da pa ntende pamodi ki Ruben, ki éra fidju más grandi, staba preokupadu ku vida di Juzé, kantu se irmons fla ma es ta mataba Juzé. Nton, na Génesis 37:18-30, ‘Ruben fla: “Ka nu tra-l se vida”. . . “Ka nhos tra sangi. Ka nhos faze-l mal.” Se obijetivu éra salvaba el di ses mô, pa el torna lebaba el pa se pai.’ I kantu Ruben da kónta ma Juzé ka staba la, el fika uma preokupadu ki ‘el ratxa se ropas’ i el grita: ‘Rapazinhu dja dizaparse! I mi, kuzê ki N ta faze?’ El sabia ma kulpa pode fikaba na el pamodi Juzé dizaparse. Pa el pode fikaba livri di kulpa, se irmons ranja un próva pa da ideia ma éra un animal brabu ki mata Juzé. Es panha ropa di Juzé i es pô-l déntu di sangi di un bódi. Dipôs es mostra kel próva li pa Jakó ki éra ses pai, juís i xéfi di família. Jakó ka poi kulpa na Ruben, pamodi kantu se fidjus mostra-l kel próva, ki éra kel ropa xeiu di sangi, Jakó pensa lógu ma Juzé matadu. — Gén 37:31-33.
11 TI 17 DI MAIU
TIZORUS DI PALAVRA DI DEUS | GÉNESIS 38-39
“Jeová nunka ka bandona Juzé”
(Génesis 39:1 ) Juzé lebadu pa baxu, pa Ijitu, i un ómi di Ijitu ki txomaba Putifar, un ofisial na palásiu di Faraó i xéfi di guarda, kunpra-l na kes ismaelita ki lebaba el pa la.
Un skravu ki obi ku Deus
Na Ijitu, Juzé bendedu i el fika skravu di un ómi inportanti ki txomaba Putifar. Má, Jeová staba ta djuda Juzé. Putifar odja ma Juzé éra un bon trabadjador i un algen di kunfiansa. Poku ténpu dipôs, Juzé fika ta toma kónta di tudu kuza ki Putifar tinha.
(Génesis 39:12-14 ) Nton, el pega-l na ropa i el fla: “Deta ku mi!” Má el fuji pa fóra i el dexa mudjer ku se ropa na mô. 13 Kantu mudjer odja ma Juzé dexa se ropa na se mô i el fuji pa fóra, 14 el kumesa ta grita i ta txoma kes ómi di se kaza. El fla-s: “Nhos odja! Kel ebreu ki nha maridu traze-nu, krê faze trósa di nos. El ben pega-m pa el deta ku mi, má N kumesa ta grita más riju ki N pode.
(Génesis 39:20 ) Nton, patron di Juzé pega-l i el manda-l pa kadia, kel lugar undi prézus di rei ta fikaba, i el kontinua la na kadia.
Un skravu ki obi ku Deus
Mudjer di Putifar odja ma Juzé éra bunitu i fórti. Tudu dia el ta pidiba Juzé pa deta ku el. Kuzê ki Juzé faze? El nega i el fla-l: ‘Nau! Kel-li é ka dretu. Nha xéfi ta kúnfia na mi i bo é se mudjer. Si N deta ku bo N ta peka kóntra Deus!’
Un dia mudjer di Putifar tenta poi Juzé ta deta ku el aforsa. El pega-l na se ropa, má Juzé sai ta kóre. Kantu Putifar ben pa kaza, se mudjer fla-l ma Juzé ataka-l. El staba ta konta mintira. Putifar fika uma xatiadu i el poi Juzé na kadiâ. Má Jeová ka skese di Juzé.
(Génesis 39:21-23 ) Má, Jeová kontinua ta sta ku Juzé i ta mostra-l se amor lial, i Jeová poi xéfi di guardas di kadia ta gosta di el. 22 Pur isu, xéfi di guardas di kadia poi Juzé ta kuida di tudu kes otu prézu ki staba na kadia, i éra Juzé ki ta orientaba tudu kuza ki es ta fazeba la. 23 Kel xéfi di guardas di kadia ka ta preokupaba ku nada ki Juzé ta kuidaba di el, pamodi Jeová ta staba ku Juzé, i Jeová ta poba tudu kuza ki el ta fazeba ta tinha bon rezultadu.
Un skravu ki obi ku Deus
Na Ijitu, Juzé bendedu i el fika skravu di un ómi inportanti ki txomaba Putifar. Má, Jeová staba ta djuda Juzé. Putifar odja ma Juzé éra un bon trabadjador i un algen di kunfiansa. Poku ténpu dipôs, Juzé fika ta toma kónta di tudu kuza ki Putifar tinha.
Jeová ka skese di Juzé
Kantu Juzé staba prézu, Faraó, rei di Ijitu, tevi un sonhu ki ningen ka konsigi splika. Un trabadjador di Faraó fla-l ma Juzé ta konsigi splikaba kuzê ki se sonhu siginifika. Kel óra, Faraó manda traze Juzé.
Faraó pidi-l pa el splika-l se sonhus. Nton Juzé fla Faraó: ‘Duránti 7 anu Ijitu ta ben ten txeu kumida, má dipôs ta ben ten 7 anu di fómi. Djobe un algen spértu pa guarda kumida, asi bu povu ka ta móre di fómi.’ Faraó responde: ‘N ta skodje-u abo! Bu ta ben ser sugundu ómi más inportanti di Ijitu!’ Modi ki Juzé konsigi splika sonhus di Faraó? É Jeová ki djuda-l.
Djobe jóias ki sta na Bíblia
(Génesis 38:9, 10 ) Má Onan sabia ma kel fidju ka ta sérba pa el. Nton, kantu el ta fazeba séksu ku mudjer di se irmon, el ta bazaba kel spérma na txon, asi pa el ka daba se irmon disendenti. 10 Jeová atxa ma kuzê ki Onan staba ta faze éra mariadu, i pur isu el mata-l tanbê.
it-3 pp. 133-134
Onan
[ta ben di un palavra ki siginifika “kapasidadi di kria ô faze, inerjia”].
Fidju matxu di Judá, kel sugundu fidju ki el tevi ku un mudjer di Kanan, fidju-fémia di Sua. (Gén 38:2-4; 1Cr 2:3) Er éra irmon más grandi di Onan i el ka tinha fidju. Dipôs ki Jeová mata Er pamodi kuza mariadu ki el faze, Judá manda Onan faze kazamentu di kunhadu ku Tamar, ki antis éra mudjer di Er. Si Tamar ku Onan tinha un fidju, el ta sérba sima si el éra fidju di Er. Nton eransa di primeru fidju ta sérba pa kel fidju di Tamar ku Onan, pamodi el ta sérba erderu di Er. Má si Er ka tinha un erderu, Onan ta fikaba ku se eransa. Kantu ki Onan ta fazeba séksu ku Tamar, ‘el ta bazaba kel spérma na txon’ pa Tamar ka fikaba grávida. Kel-li ka krê fla ma Onan faze masturbason, pamodi Bíblia ta fla ma ‘kantu el ta fazeba séksu ku mudjer di se irmon’ el baza se spérma. Ta parse ma Onan ka dexa se spérma entra na Tamar di propózitu pa el ka fika grávida. Jeová mata Onan, ki tanbê ka tinha fidju, ka pamodi el faze masturbason, má pamodi el ka obi ku se pai, el tinha invéja di se irmon i el peka kóntra kazamentu ki Deus kria. — Gén 38:6-10; 46:12; Núm 26:19.
(Génesis 38:15-18 ) Kantu Judá odja-l, el pensa lógu ma el éra un prostituta, pamodi se róstu staba kubértu. 16 Nton, el bai pa el, na bera di strada, i el fla-l: “Dexa-m faze séksu ku bo.” Pamodi el ka sabia ma el éra se nóra. Má, Tamar pergunta-l: “Kuzê ki bu ta da-m si N faze séksu ku bo?” 17 El responde: “N ta manda-u un kabritu di nha ribanhu.” Má Tamar pergunta-l: “Bu ta da-m algun kuza di garantia ti ki bu manda-m el?” 18 El fla-l: “Ki garantia ki bu krê pa N da-u?” Tamar responde: “Bu anel di sélu ku se kordon, i bu pó ki bu tene na mô.” Nton, el da-l es i dipôs el faze séksu ku el. I Tamar fika grávida.
w04 15/1 p. 30 pars. 4-5
Perguntas ki leitoris ta faze
Judá faze un kuza mariadu kantu el ka da se fidju matxu, Selá, pa kaza ku Tamar, sima el prometeba Tamar. Tanbê el faze séksu ku un mudjer ki el pensaba ma éra un prostituta di ténplu. Kel-li é un kuza kóntra vontadi di Deus. Jeová krê pa un ómi faze séksu sô déntu di kazamentu. (Génesis 2:24 ) Na verdadi, Judá ka faze séksu ku un prostituta. Má sen el da kónta, el faze kazamentu di kunhadu na lugar di se fidju, Selá. Pur isu, kes fidju ki el tevi ku Tamar éra fidjus di kazamentu.
Kel kuza ki Tamar faze ka éra konportamentu seksual mariadu. Bíblia ka ta fla ma fidjus jémiu di Tamar éra fidjus di konportamentu seksual mariadu. Kantu Boás, ki éra di Belen, faze kazamentu di kunhadu ku Ruti, ki éra di Muabi, ansions di Belen pâpia dretu di Peris, ki éra fidju di Tamar. Kes ansion fla Boás: ‘Através di disendenti ki Jeová ta ben da-u através di kel minina li, pa bu kaza bira sima kaza di Peris, kel fidju ki Tamar tevi ku Judá.’ (Rute 4:12 ) Peris tanbê ta parse na kel lista di kes algen ki Jizus ben di ses família. — Mateus 1:1-3; Lucas 3:23-33.
18 TI 24 DI MAIU
TIZORUS DI PALAVRA DI DEUS | GÉNESIS 40-41
“Jeová kaba ku sufrimentu di Juzé”
(Génesis 41:9-13 ) Nton, kel xéfi di koperus fla Faraó: “Oji N ta konfesa nhas pekadu. 10 Faraó staba xatiadu ku se sérvus. Pur isu, el manda prende-m na kadia di kaza di xéfi di guarda, ami ku xéfi di paderus tanbê. 11 Dipôs di kel-li, nos tudu dôs nu sunha na mésmu noti. Nos sonhu éra diferenti i kada un tinha se própi siginifikadu. 12 I staba la ku nos un jóven ebreu, ki éra sérvu di xéfi di guarda. Kantu nu konta-l nos sonhu, el splika-nu kuzê ki kada un di kes sonhu ta siginifikaba. 13 I kontise tudu sima el splika-nu. N torna dadu nha trabadju otu bês, má kel otu ómi prindadu na un pósti.”
Jeová ka skese di Juzé
Kantu Juzé staba prézu, Faraó, rei di Ijitu, tevi un sonhu ki ningen ka konsigi splika. Un trabadjador di Faraó fla-l ma Juzé ta konsigi splikaba kuzê ki se sonhu siginifika. Kel óra, Faraó manda traze Juzé.
(Génesis 41:16 ) Juzé responde Faraó: “Ken ki é mi? É Deus ki ta ben pâpia kuzas dretu pa Faraó.”
(Génesis 41:29-32 ) “Ta ben ten 7 anu di grandi fartura na tudu téra di Ijitu. 30 Má, dipôs di kes-li, di sertéza ta ben 7 anu di fómi, i tudu kel fartura di téra di Ijitu di sertéza ta skesedu di el i fómi ta toma kónta di país. 31 I kel fartura ki tinha antis na país ka ta lenbradu di el más, pamodi kel fómi ki ta ben dipôs ta ser duru dimás. 32 Faraó dadu kel sonhu dôs bês pamodi é un kuza ki Deus verdaderu dja disidi faze, i Deus verdaderu sta ben faze-l já já.
Jeová ka skese di Juzé
Faraó pidi-l pa el splika-l se sonhus. Nton Juzé fla Faraó: ‘Duránti 7 anu Ijitu ta ben ten txeu kumida, má dipôs ta ben ten 7 anu di fómi. Djobe un algen spértu pa guarda kumida, asi bu povu ka ta móre di fómi.’ Faraó responde: ‘N ta skodje-u abo! Bu ta ben ser sugundu ómi más inportanti di Ijitu!’ Modi ki Juzé konsigi splika sonhus di Faraó? É Jeová ki djuda-l.
(Génesis 41:38-40 ) Nton, Faraó fla se sérvus: “Ta atxadu otu ómi sima kel-li, ki ten spritu di Deus?” 39 Nton Faraó fla Juzé: “Dja ki Deus pô-u ta sabe tudu kes kuza li, ka ten ningen prudenti i ku sabedoria sima bo. 40 É bo própi ki ta fika ta toma kónta di nha kaza, i tudu nha povu ta obi ku bo na tudu kuza. Sô na puzison di rei ki N ta ser más grandi ki bo.”
Jeová ka skese di Juzé
Faraó pidi-l pa el splika-l se sonhus. Nton Juzé fla Faraó: ‘Duránti 7 anu Ijitu ta ben ten txeu kumida, má dipôs ta ben ten 7 anu di fómi. Djobe un algen spértu pa guarda kumida, asi bu povu ka ta móre di fómi.’ Faraó responde: ‘N ta skodje-u abo! Bu ta ben ser sugundu ómi más inportanti di Ijitu!’ Modi ki Juzé konsigi splika sonhus di Faraó? É Jeová ki djuda-l.
Djobe jóias ki sta na Bíblia
(Génesis 41:14 ) Nton, Faraó manda txoma Juzé, i es traze-l di kadia faxi. El tra barba, el troka di ropa i el bai ti Faraó.
w15 1/11 p. 9 pars. 1-3
Bu sabia?
Pamodi ki Juzé tra barba i el rapa kabésa antis di el bai pâpia ku Faraó?
Di akordu ku stória ki sta na Génesis, Faraó manda pa Juzé, ki éra un ebreu ki staba prézu, trazedu di kadia uma faxi pa el splikaba sonhus ki staba ta preokupa Faraó. Juzé dja tinha alguns anu na kadia. Nbóra Faraó manda pa el ben faxi, Juzé disidi tra barba i rapa kabésa primeru. (Génesis 39:20-23; 41:1, 14 ) Kantu skritor di Génesis da kel informason li, ki ta parse ma ka é inportanti, el mostra ma Juzé konxeba dretu kes kustumu di gentis di Ijitu.
Dexa barba kria éra un kuza normal pa ebreus i txeu nason di ténpu antigu. Má un ensiklopédia ta fla: “Gentis di Ijitu di ténpu antigu éra úniku nason di orienti ki éra kóntra uza barba”. — McClintock and Strong’s Cyclopedia of Biblical, Theological, and Ecclesiastical Literature.
Éra sô barba ki gentis di Ijitu ta rapaba? Un revista ta da ideia ma na alguns di ses serimónia, gentis di Ijitu ta izijiba pa un algen priparaba pa bai ti Faraó di mésmu manera ki kel algen ta fazeba pa entra na un ténplu. (Biblical Archaeology Review ) Nton, Juzé tinha ki rapaba tudu kabélu di kabésa i di korpu.
(Génesis 41:33 ) “Pur isu, gósi Faraó debe djobe un ómi prudenti i ki ten sabedoria, i pô-l ta toma kónta di téra di Ijitu.
w09 15/11 p. 28 par. 14
Sérvus di Deus ta mostra ma es é idukadu
14 Na ténpu ki Bíblia skrebedu, pai ku mai ki ta ruspetaba Deus, ta fazeba di tudu pa inxinaba ses fidjus désdi pikinoti pa ser idukadu. Pur izénplu, odja manera idukadu ki Abraon ku se fidju Izaki pâpia ku kunpanheru, sima sta na Génesis 22:7. Juzé tanbê mostra ma se pai ku se mai da-l bon idukason. Kantu el staba prézu, el éra idukadu ti ku kes otu prézu. (Gén. 40:8, 14) Kes palavra ki el fla Faraó ta mostra ma el prende kal ki é manera dretu di pâpia ku un algen ki tinha autoridadi. — Gén. 41:16, 33, 34.
25 TI 31 DI MAIU
TIZORUS DI PALAVRA DI DEUS | GÉNESIS 42-43
“Juzé kontrola se sentimentus”
(Génesis 42:5-7 ) Fidjus di Israel bai djuntu ku kes otu algen ki staba ta bai kunpra kumida, pamodi fómi dja txigaba na téra di Kanan. 6 Éra Juzé ki ta mandaba na kel país, i éra el ki ta bendeba kumida pa tudu algen na Téra. Pur isu, kes irmon di Juzé txiga i es nbaxa se dianti ku róstu pa txon. 7 Kantu Juzé odja se irmons, el konxe-s lógu, má el ka dexa-s sabe ken ki el éra. Nton, el pâpia di manera duru ku es i el pergunta-s: “Di undi ki nhos ben?” Es responde: “Nu ben di téra di Kanan, nu ben kunpra kumida.”
Jeová ka skese di Juzé
Kantu fidjus di Jakó txiga na Juzé, el odja lógu ma es éra se irmons. Má se irmons ka repara ma el éra Juzé. Es poi duedju na txon se dianti, sima Juzé sunhaba kantu el éra jóven. Juzé krê sabeba si se irmons ka staba runhu más. Pur isu el fla-s: ‘Anhos é algen ki ben spreta. Nhos krê sabe kal ki é frakéza di nos país.’ Es fla: ‘Nau! Anos é 12 irmon di Kanan. Un di nos irmon dja móre i kel más pikinoti fika na kaza ku nos pai.’ Nton Juzé fla: ‘N ta kridita na nhos sô si nhos traze nhos irmon más pikinoti’. Nton, es volta pa ses kaza.
(Génesis 42:14-17 ) Má, Juzé fla-s: “É sima N flaba nhos: ‘Nhos ben djobe lugar!’ 15 Nhos ta ben podu na un próva: N ta jura pa vida di Faraó, ma nhos ka ta sai di li timenti nhos irmon más pikinoti ka txiga li. 16 Nhos manda un di nhos bai buska nhos irmon i kes otu ta fika prézu. Asi, nhos palavra ta podu na próva, pa N odja si nhos sta ta pâpia verdadi. Má, si é kasí, N ta jura pa vida di Faraó ma nhos ben djobe lugar.” 17 Nton el pô-s na kadia djuntu pa três dia.
Jeová ka skese di Juzé
Kantu kumida kaba, Jakó torna manda se fidjus pa Ijitu. Di es bês, es leba Benjamin, ses irmon más pikinoti, djuntu ku es. Pa ten sertéza ma se irmons dja mudaba, Juzé sukundi se kópu di prata na bólsa di Benjamin. Dipôs el fla ma se irmons dja furta-l kópu. Kantu ajudantis di Juzé atxa kópu na bólsa di Benjamin, ses irmon fika spantadu. Es pidi pa Juzé kastiga-s na lugar di Benjamin.
(Génesis 42:21, 22 ) I es fla kunpanheru: “Di sertéza, nu sta ser kastigadu pamodi kuza ki nu faze ku nos irmon, pamodi nu odja modi ki el sufri kantu el pidi-nu pa nu ten péna di el, má nu ka obi ku el. É pur isu ki kel sufrimentu li dja ben kai riba nos.” 22 Nton Ruben fla-s: “N ka fla nhos: ‘Ka nhos peka kóntra kel rapazinhu’? Má nhos ka obi ku mi. Gósi, di sertéza nu sta ben paga pamodi se sangi.”
Jeová ka skese di Juzé
Kantu kumida kaba, Jakó torna manda se fidjus pa Ijitu. Di es bês, es leba Benjamin, ses irmon más pikinoti, djuntu ku es. Pa ten sertéza ma se irmons dja mudaba, Juzé sukundi se kópu di prata na bólsa di Benjamin. Dipôs el fla ma se irmons dja furta-l kópu. Kantu ajudantis di Juzé atxa kópu na bólsa di Benjamin, ses irmon fika spantadu. Es pidi pa Juzé kastiga-s na lugar di Benjamin.
Asi, Juzé fika ta sabe ma se irmons dja mudaba. Juzé ka aguenta más i el kumesa ta txora i el fla: ‘Ami é nhos irmon Juzé. Nha pai inda sta bibu?’ Se irmons fika uma spantadu. El fla-s: ‘Ka nhos fika tristi pamodi kuza ki nhos faze-m. Deus ki manda-m pa li pa salva nhos vida. Nhos bai faxi i nhos traze nha pai pa li.’
Djobe jóias ki sta na Bíblia
(Génesis 42:22 ) Nton Ruben fla-s: “N ka fla nhos: ‘Ka nhos peka kóntra kel rapazinhu’? Má nhos ka obi ku mi. Gósi, di sertéza nu sta ben paga pamodi se sangi.”
(Génesis 42:37 ) Má, Ruben fla se pai: “Nhu pode mata nhas dôs fidju si N ka torna traze nho el. Nhu ntrega-m el na nha mô i N ta torna da nho el.”
it-3 p. 466
Ruben
Nu ta odja alguns di kes bon kualidadi di Ruben kantu el konvense se 9 irmon pa bota Juzé na un posu ki staba séku, envês di mata-l. Obijetivu di Ruben éra torna tra Juzé di posu sen se irmons da kónta. (Gén 37:18-30) Más di 20 anu dipôs, kantu se irmons staba ta ser akuzadu di ser spion i es pensa ma éra pamodi es maltrataba Juzé, Ruben lenbra-s ma el ka partisipaba na kel planu pa mata Juzé. (Gén 42:9-14, 21, 22) Tanbê, kantu Jakó ka seta pa Benjamin bai ku se irmons na kel sugundu viaji pa Ijitu, é Ruben ki oferese se dôs fidju matxu pa ser garantia. El fla: ‘Nhu pode mata nhas dôs fidju si N ka torna traze nho [Benjamin].’ — Gén 42:37.
(Génesis 43:32 ) Es poi Juzé kumida el sô i se irmons tanbê es sô, i gentis di Ijitu ki staba ku el tanbê kume es sô. Pamodi gentis di Ijitu ka ta kumeba djuntu ku ebreus, pamodi kel-li éra un kuza ki gentis di Ijitu ka ta gostaba.
w04 15/1 p. 29 par. 1
Pártis inportanti di livru di Génesis — Párti 2
43:32 — Pamodi ki kes algen di Ijitu ka gostaba di kume ku ebreus? Motivu prinsipal éra prekonseitu pamodi relijion ô orgulhu di ses rasa. Tanbê gentis di Ijitu ta odiaba pastoris. (Génesis 46:34 ) Pamodi? Talvês éra pamodi pastoris ta staba na un di kes puzison más baxu na sosiadadi di gentis di Ijitu. Ô pode ser ki dja ki ka tinha txeu téra pa trabadja, kes genti di Ijitu ta disprezaba kes algen ki ta bai djobeba padja pa ses ribanhu.