MODI KI NU PODE VENSE ÓDIU?

2 | Ka bu vinga

Kuzê ki Bíblia ta fla:

‘Ka nhos paga ningen mal ku mal. Si ta da, na kel ki ta dipende di nhos, nhos mante pas ku tudu algen. Ka nhos vinga, pamodi sta skrebedu: “‘Vingansa é di meu; mi ki ta diskonta’, Jeová fla.”’ — ROMANOS 12:17-19.

Kuzê ki Romanos 12:17-19 krê fla:

É normal nu fika xatiadu óras ki un algen trata-nu mariadu. Má, Deus ka krê pa nu vinga di ningen. El krê pa nu ten paxénxa pamodi el promete ma ka ta dura el ta ben kaba ku tudu injustisa. — Salmo 37:7, 10.

Kuzê ki bu pode faze:

Óras ki un algen ta vinga, kel-li ta traze más ódiu. Pur isu, si un algen ofende-u ô trata-u mariadu, ka bu vinga. Tenta kontrola bu sentimentu i mante pas ku kel algen. Na alguns situason, é midjór skese kuzê ki kontise. (Provérbios 19:11) Má na otus situason, talvês bu debe rezolve kel prubléma. Pur izénplu, si un algen faze un krimi kóntra bo, bu pode ba kexa na pulísia ô na otus autoridadi.

Si nu vinga, nu ta prujudika nos kabésa.

Má, i si ta parse ma ka ten un manera di rezolve kel prubléma na pas? Ô i si dja bu faze tudu kel ki bu pode pa rezolve kel prubléma na pas? Ka bu tenta vinga simé, pamodi kel-li ta piora situason. Má, sforsa pa bu vense ódiu. Deus pode djuda-u rezolve kel prubléma. ‘Kunfia na el, i el ta faze algun kuza pa djuda-u.’ — Salmo 37:3-5.

Stória di vida – ADRIÁN

El konsigi vense dizeju di vinga

Kantu Adrián éra jóven, el éra un algen violéntu, el tinha txeu ódiu i el ta krê vingaba di kalker algen ki trataba el mariadu. El fla: “Txeu bês N ta staba na géra ku tiru ta bai ta ben. Alguns bês N dexadu na rua ku korpu xeiu di sangi, kuazi ta móre.”

Kantu Adrián tinha 16 anu el kumesa ta studa Bíblia. El fla: “Sima N ba ta studa Bíblia, N odja ma N meste mudaba nha manera di ser.” El meste traba ódiu di se korason i paraba di faze violénsia. Kuzê ki el prende na Romanos 12:17-19, djuda-l txeu. El fla: “N prende ma Jeová ta ben rezolve tudu injustisa, na se ténpu i di manera ki el ta atxa midjór. Poku-poku, N dexa kel vida di violénsia pa tras.”

Un dia di noti, inimigus di Adrián ba ataka-l. Xéfi di kel grupu fla: “Difende!” Adrián fla: “N xinti gana di briga.” Má envês di el briga, el faze un orason faxi pa Jeová i el sai di kel lugar.

Adrián fla: “Na kel otu dia, N nkontra ku xéfi di kel grupu, má di es bês, el staba el sô. Kantu N odja-l, N fika uma xatiadu i N krê vingaba. Má, N ora pa Jeová djuda-m kontrola nha kabésa. N atxa ma kel rapás staba xatiadu tanbê. Má, N fika spantadu kantu el txiga na mi i el fla-m: ‘Purdua-m pamodi kuzê ki kontise onti. Pa N fla-u verdadi, N ta gostaba di sérba sima bo. N krê studa Bíblia tanbê.’ Inda ben ki N konsigi kontrola nha kabésa! Pamodi nha atitudi, el kumesa ta studa Bíblia ku mi.”