Ka bu pensa sô na bu kabésa sima txeu algen oji ta faze

DJA bu da kónta ma txeu algen oji ta xinti ma es merese tratadu midjór di ki otus algen i ma es debe resebe alguns priviléjiu i direitu? Sikrê es ta tratadu di manera spesial, es ta atxa ma es merese más priviléjiu. Pesoas ki ta pensa di kel manera li, ta ama sô ses kabésa i es ka ta mostra gratidon pa kuzê ki es ten. É si ki Bíblia ta fla ma pesoas ta sérba na ténpu di fin. — 2 Tim. 3:2.

É klaru ki sénpri tevi pesoas ki ama sô ses kabésa. Pur izénplu, Adon ku Eva disidi di es pa es kuzê ki é dretu i mariadu, i pamodi ses disizon nos tudu nu ta sufri. Séklus dipôs, rei Uzias, di Judá, pensa ma el tinha direitu di kemaba insénsu na ténplu, má el ka tinha direitu di faze kel-la. (2 Cró. 26:18, 19) Di mésmu manera, kes farizeu i kes saduseu ta kriditaba ma Deus devia trataba es midjór di ki otus algen pamodi es éra disendenti di Abraon. — Mat. 3:9.

Nu sta rodiadu di pesoas ki ta pensa sô na ses kabésa i ses atitudi pode influensia-nu. (Gál. 5:26) Nu pode kumesa ta pensa ma nu merese resebe un priviléjiu ô tratadu di manera spesial. Modi ki nu pode ivita pensa di kel manera li? Primeru, nu meste intende kuzê ki Jeová ta pensa sobri kel asuntu li. Nu ben odja dôs prinsípiu di Bíblia ki pode djuda-nu.

É Jeová ki ta disidi kuzê ki nu debe resebe. Odja alguns izénplu.

• Jeová disidi ma na família, mudjer debe ruspeta se maridu i maridu debe ama se mudjer. (Efé. 5:33) Maridu ku mudjer debe resebe amor romántiku sô di kunpanheru. (1 Kor. 7:3) Pai ku mai ten direitu di spera ma ses fidju ta obi ku es i fidjus ten direitu di resebe amor i ajuda di ses pai ku ses mai. — 2 Kor. 12:14; Efé. 6:2.

• Na kongregason, ansions merese nos ruspetu pamodi es ta trabadja duru. (1 Tes. 5:12) Má es ka ten direitu di manda na ses irmon ku irmans. — 1 Ped. 5:2, 3.

• Deus da govérnus di ómi direitu di pidi inpostu i di resebe ónra di kes algen ki es ta governa. — Rom. 13:1, 6, 7.

Ku amor Jeová ta da-nu más di ki kel ki nu ta merese. Pamodi nos é pekador, úniku kuza ki nu merese é móre. (Rom. 6:23) Má simé, Jeová promete ma el ta da-nu txeu benson pamodi se amor lial pa nos. (Sal. 103:10, 11) Kada benson ô priviléjiu ki nu ta resebe di el é pamodi se grandi bondadi. — Rom. 12:6-8; Efé. 2:8.

KUZÊ KI PODE DJUDA-NU KA PENSA SÔ NA NOS KABÉSA?

Toma kuidadu ku atitudi di mundu. Sen da kónta nu pode kumesa ta pensa ma nu merese más di ki otus algen. Jizus mostra modi ki é fásil kumesa ta pensa di kel manera li, kantu el konta kel ilustrason di kes trabadjador ki pagadu un dináriu. Alguns trabadjador kumesa ta trabadja lógu di sédu palmanhan i es trabadja dia interu dibaxu di sol kenti, i otus trabadja sô un óra. Kel primeru grupu atxa ma es mereseba pagadu más txeu pamodi trabadju ki es faze. (Mat. 20:1-16) Na kel ilustrason li, Jizus mostra ses sigidor ma es debe fika kontenti ku kuzê ki Deus ta da-s.

Ser gratu i ka bu spera ma bu ten ki resebe kuzas di otus algen. (1 Tes. 5:18) Imita izénplu di apóstlu Paulu, ki ka pidi kuzas material di ses irmon na Korintu mésmu ki el tinha direitu di fazeba kel-la. (1 Kor. 9:11-14) Nu debe da valor pa kada benson ki nu ta resebe i ka spera kuzas di otus algen.

Ser umildi. Óras ki un algen ta kumesa ta pensa txeu dimás di se kabésa, normalmenti el ta kumesa ta xinti ma el ten direitu di resebe más di ki kel ki el ten. Si nos é umildi kel-li ta djuda-nu ka pensa di kel manera prigozu li.

Proféta Daniel dexa un bon izénplu di un algen ki éra umildi. El ben di un família inportanti i el éra bunitu, intilijenti i el tinha txeu kapasidadi. Kel-li pode poba el ta xinti ma el mereseba tratadu di manera spesial i resebe priviléjius. (Dan. 1:3, 4, 19, 20) Má simé, Daniel kontinua umildi i kel kualidadi li pô-l ta ten txeu valor pa Jeová. — Dan. 2:30; 10:11, 12.

Ka nu pensa sô na nos kabésa sima pesoas di mundu oji ta faze. Envês di kel-li, nu kontinua ta fika kontenti ku kada benson ki Jeová ta da-nu pamodi se grandi bondadi.