Kontinua ta anda pa fé

1. Pamodi ki apóstlu Paulu ta fikaba kontenti óras ki el ta pensaba na manera ki el vive?

APÓSTLU Paulu sabia ma faltaba poku ténpu pa es ba mataba el. Má óras ki el ta pensaba na modi ki el vive, el ta fikaba txeu kontenti. El fla: “N tirmina korida i N vive di akordu ku fé.” (2 Tim. 4:6-8) Ku sabedoria Paulu disidi uza se vida pa sirbi Jeová, i el tinha serteza ma Jeová staba kontenti ku el. Nos tanbê, nu krê toma bons disizon i ten aprovason di Deus. Modi ki nu pode faze kel-li?

2. Kuzê ki siginifika anda pa fé?

² Paulu fla kel-li sobri el i otus kriston fiel: “Nu ta anda pa fé, ka pa kel ki nu ta odja.” (2 Kor. 5:7) Kuzê ki Paulu krê flaba? Na Bíblia “anda” alvês krê fla manera ki un algen ta skodje vive. Óras ki un algen ta anda sô pa kel ki el ta odja, el ta toma disizons ku bazi sô na kuzê ki el ta odja, obi i xinti. Má óras ki un algen ta anda pa fé, el ta pensa na kuzê ki Jeová krê pa el faze, óras ki el ta toma disizon. Kuzas ki el ta faze ta mostra ma el ten serteza ma Deus ta ben rekonpensa-l i ma el ta ten bons rezultadu óras ki el ta sigi konsedju di Jeová ki sta na Se Palavra. — Sal. 119:66; Ebr. 11:6.

3. Ki bons rezultadu nu ta ten óras ki nu ta anda pa fé? (2 Koríntius 4:18)

³ É klaru ki alvês nos tudu nu ta toma alguns disizon ku bazi na kuzê ki nu ta odja, obi i nu ta xinti. Má si nu kunfia sô na kel ki nu ta odja ô obi óras ki nu ta toma un disizon inportanti, di serteza nu ta ten prublémas. Pamodi? Pamodi kel ki nu ta odja i obi pode ingana-nu. Mésmu óras ki kel-li ka ta kontise, si nu anda sô pa kel ki nu ta odja, nu pode iginora kuzê ki Deus krê ô se konsedjus. (Ecl. 11:9; Mat. 24:37-39) Má, óras ki nu ta anda pa fé, é más fásil nu toma bons disizon “ki ta agrada Sinhor”. (Efé. 5:10) Sigi konsedjus di Deus ta da-nu pas déntu nos i filisidadi di verdadi. (Sal. 16:8, 9; Isa. 48:17, 18) I si nu kontinua ta anda pa fé, nu ta ben ten vida pa tudu ténpu. — Lé 2 Koríntius 4:18.

4. Modi ki un algen pode sabe si el sta ta anda pa fé ô pa kes kuza ki el sta odja?

⁴ Modi ki nu pode sabe si nu sta ta anda pa fé ô pa kes kuza ki nu sta ta odja? Nos tudu nu meste pensa na kes pergunta li: Kuzê ki ta orienta nha disizon? N ta kunfia sô na kel ki N ta odja, ô N ta kunfia na konsedjus di Jeová? Nu ben odja modi ki nu pode kontinua ta anda pa fé na três ária inportanti di nos vida: óras ki nu ta skodje un trabadju, óras ki nu ta skodje un algen pa nu kaza ku el i óras ki nu ta resebe orientason ki ta ben di organizason di Jeová. Na kada un di es, nu ta ben pâpia di kuzê ki nu debe pensa na el pa nu pode toma un bon disizon.

ÓRAS KI NU TA SKODJE UN TRABADJU

5. Kuzê ki nu debe pensa na el óras ki nu ta skodje un trabadju?

⁵ Nos tudu nu krê kuida di nos nisisidadi i di nisisidadi di nos família. (Ecl. 7:12; 1 Tim. 5:8) Na alguns trabadju, es ta paga más midjór di ki kes otu. Ku kes trabadju li, un algen ta konsigi kuida di kes kuza ki el meste na se dia-dia i guarda algun kuza pa futuru. Na otus trabadju, es ta paga más poku i di kel manera li, un algen ta konsigi ten sô kes kuza ki se família meste. Óras ki nu ta disidi si nu ta seta un trabadju, é klaru ki nu ta pensa na kantu dinheru nu ta ba ganha. Má si kel-li é úniku kuza ki nu ta pensa na el, nu sta ta anda prinsipalmenti pa kes kuza ki nu sta ta odja.

6. Modi ki nu pode anda pa fé óras ki nu ta skodje un trabadju? (Ebreus 13:5)

⁶ Si nu sta anda pa fé, nu pode pensa modi ki kel trabadju ta afeta nos amizadi ku Jeová. Nu pode pensa na kes pergunta li: ‘Kel trabadju ta involve faze kuzas ki Jeová ta ôdia?’ (Pro. 6:16-19) ‘Kel trabadju ta pô-m ta perde runion, ta ten ménus ténpu pa pregason i studa Bíblia, i el ta pô-m ta fika txeu ténpu lonji di nha família?’ (Flp. 1:10) Si respósta pa kes pergunta li é sin, nu ta mostra sabedoria si nu ka seta kel trabadju, sikrê nu ten ki sforsa txeu pa atxa otu. Pamodi nu ta anda pa fé, nu ta toma disizons ki ta mostra nos kunfiansa ma Jeová ta pode kuida di nos nisisidadi. — Mat. 6:33; Lé Ebreus 13:5.

7-8. Modi ki un irmon na Mérka di Sul mostra ma el ta anda pa fé? (Odja fotu.)

⁷ Repara modi ki Xavier,a un irmon na Mérka di Sul, xinti ma el meste andaba pa fé. El fla: “N kandidata pa un trabadju ki es ta pagaba mi dôs bês más txeu di ki kel trabadju ki N tinha antis i ki ta dexaba mi txeu filís.” Má, Xavier tinha txeu vontadi di ser pioneru. El fla: “N markadu un entrivista pa kel trabadju. Antis di kel entrivista, N faze orason ta pidi ajuda i N tinha kunfiansa ma Jeová sabia kuzê ki éra midjór pa mi. N krê tinha más responsabilidadi na nha trabadju i ganha más dinheru, má N ka kreba kel trabadju si el ka ta djudaba mi alkansa nhas méta spritual.”

⁸ Xavier fla: “Duránti kel entrivista, kel jerenti fla-m ma txeu bês N tinha ki trabadjaba ti más tardi. Di manera idukadu, N fla-l ma N ka ta pode fazeba kel-li pamodi nha sirvisu pa Jeová.” Nton, Xavier disidi ka seta kel trabadju. Dôs simana dipôs, el kumesa se sirvisu di pioneru. I un anu dipôs, el atxa un trabadju di meiu-piriúdu. El fla: “Jeová obi nhas orason i el da-m un trabadju ki kel orariu ta dexaba mi ser pioneru. N sta txeu kontenti di ten un trabadju ki ta djuda-m ten más ténpu pa N faze más pa Jeová i pa nhas irmon.”

9. Kuzê ki bu prende ku spiriénsia di Trésor?

⁹ I si bu da kónta ma kel trabadju ki bu sta na el gósi ka ta dexa-u anda pa fé? Odja spiriénsia di Trésor, di Kongu. El fla: “Nha novu trabadju éra kel ki sénpri N kreba. Es ta pagaba mi três bês más di kel trabadju ki N tinha antis. I pesoas ta ruspetaba mi txeu.” Má simé, Trésor staba sénpri ta perde runion pamodi el ta trabadjaba ti más tardi. Tanbê es ta fazeba el preson pa ser dizonéstu. Trésor krê dexaba kel trabadju, má el tinha medu si el ka atxaba otu trabadju. Kuzê ki djuda-l? El fla: “Habacuque 3:17-19 djuda-m intende ma sikrê N perde nha trabadju, Jeová ta ranja un manera di kuida di mi. Nton, N sai di nha trabadju.” El fla: “Txeu patron ta atxa ma óras ki bu ten trabadju ki el sta paga dretu, kel algen ten ki sakrifika kalker kuza. Kel-li ta inklui bu família i kes kuza ki bu ta faze pa Deus. N sta kontenti pamodi N proteje nha amizadi ku Jeová i ku nha família. Un anu dipôs, Jeová djuda-m atxa un trabadju ki N ta ten dinheru pa kes kuza ki N ta meste i ten más ténpu pa nha sirvisu pa Jeová. Óras ki nu ta poi Jeová na primeru lugar, na algun momentu nu pode ten falta di dinheru, má Jeová ta kuida di nos.” Si nu kontinua ta kunfia na konsedju i promésa di Jeová, nu ta kontinua ta anda pa fé i el ta abensua-nu.

ÓRAS KI BU TA SKODJE UN ALGEN PA BU KAZA KU EL

10. Kuzê ki pode poi un algen ta anda sô pa kel ki el ta odja óras ki el ta skodje un algen pa el kaza ku el?

¹⁰ Kazamentu é un prezenti di Jeová i é normal un algen krê kaza. Óras ki un irman sta ta djobe un algen pa el kaza ku el, é normal el pensa na manera di ser di kel irmon, se aparénsia, kuzê ki algen ta pensa di el, modi ki el ta lida ku dinheru, si el ten ki toma kónta di algen di se família i si el ta konsigi faze-l filís.b Tudu kes kuza li é inportanti. Má, si el ta pensa sô na kes kuza li, el pode sta ta anda pa kes kuza ki el ta odja.

11. Modi ki nu pode anda pa fé óras ki nu ta skodje un algen pa nu kaza ku el? (1 Koríntius 7:39)

¹¹ Jeová ta xinti txeu orgulhu di nos irmons ku irmans, óras ki es ta sigi se konsedju na skodje un algen pa es kaza ku el! Pur izénplu, es ta sigi kel konsedju di Bíblia ki ta fla pa spera ti ki pasa “flor di juventudi” antis di es kumesa ta namora. (1 Kor. 7:36) Es ta djobe un algen ki ten kes kualidadi ki Jeová ta fla ma un bon maridu ô un bon mudjer debe ten. (Pro. 31:10-13, 26-28; Efé. 5:33; 1 Tim. 5:8) Si un algen ki é ka Tistimunha di Jeová mostra interesi na es, es ta sigi kel konsedju di kaza “sô na Sinhor”, ki nu ta atxa na 1 Koríntius 7:39. (Lé.) Es ta kontinua ta anda pa fé, pamodi es ta kunfia ma Jeová pode kuida di ses sentimentu midjór di ki kalker otu algen. — Sal. 55:22.

12. Kuzê ki bu prende ku izénplu di Roza?

¹² Odja spiriénsia di Roza ki é un pionera na Kulónbia. Un ómi na se trabadju ki ka éra Tistimunha di Jeová kumesa ta mostra interesi na el. Roza kumesa ta gosta di el. El fla: “El ta parseba un algen dretu. El ta djudaba pesoas na lugar undi el ta moraba i el tinha un bon konportamentu. N gostaba di modi ki el ta trataba mi. El tinha kuzê ki N kreba na un maridu, sô ki el ka éra Tistimunha di Jeová.” Tanbê el fla: “Foi difísil fla-l nau pamodi N gostaba di el. Na kel ténpu N ta xintiba mi sô i N kria kazaba, má N ka staba ta atxa ningen ki éra Tistimunha di Jeová.” Má Roza ka konsentra sô na kes kuza ki el ta odjaba. El pensa na modi ki kel disizon ta ba afetaba se amizadi ku Jeová. Pur isu, el para di pâpia ku kel ómi i el mante konsentradu na se sirvisu pa Jeová. Poku ténpu dipôs el konvidadu pa bai Skóla pa Pregadoris di Reinu i gósi el é un pionera spesial. Roza fla: “Jeová intxi nha korason ku txeu alegria.” Enbóra nen sénpri é ka fásil anda pa fé na kes asuntu ki ta involve sentimentus fórti, faze si é sénpri midjór pa nos.

ÓRAS KI NU RESEBE ORIENTASON DI ORGANIZASON DI JEOVÁ

13. Modi ki nu pode reaji óras ki nu resebe orientason di organizason di Jeová?

¹³ Txeu bês nu ta resebe orientason di organizason di Jeová através di ansions di nos kongregason, di enkaregadu di grupu di kongregason, di filial ô di Grupu Enkaregadu di Óbra, pa djuda-nu sirbi Jeová. Má i si na un situason nu ka intende pamodi ki nu dadu kel orientason? Talvês nu pode odja sô kes kuza negativu ki kel orientason pode ten pa nos. Nu pode ti kumesa ta konsentra na inperfeison di kes irmon ki da-nu orientason.

14. Kuzê ki ta djuda-nu anda pa fé óras ki nu resebe orientason di organizason di Jeová? (Ebreus 13:17)

¹⁴ Óras ki nu ta anda pa fé nu ten serteza ma é Jeová ki sta ta orienta se organizason i ma el sabe nos situason. Pur isu, nu ta obidese lógu i nu ta faze-l ku un atitudi puzitivu. (Lé Ebreus 13:17.) Nu sabe ma óras ki nu sigi kes orientason, nu ta djuda nos kongregason kontinua unidu. (Efé. 4:2, 3) Enbóra kes irmon ki ta toma kónta di organizason é inperfeitu, nu ta kunfia ma Jeová ta abensua-nu óras ki nu ta obidese. (1 Sam. 15:22) Na ténpu sértu, Jeová ta ben koriji tudu kuza ki meste ser korijidu. — Miq. 7:7.

15-16. Kuzê ki djuda un irmon anda pa fé mésmu kantu el tinha dúvida sobri alguns orientason ki el resebe? (Odja fotu.)

¹⁵ Nu ben odja un spiriénsia ki ta mostra bon rezultadu ki nu ta ten óras ki nu ta anda pa fé. Na Perú, maioria di algen ta pâpia spanhol, enbóra txeu algen ten ses própi língua. Un di es é kêxua. Duránti txeu anu, irmons ku irmans ki ta pâpia kêxua ta djobeba pesoas na tiritóriu ki ta papiaba kêxua. Nton, pa sigi kes lei di govérnu, fazedu mudansa na manera di prega pa kes algen. (Rom. 13:1) Pamodi kel-li, alguns fika ta pergunta si kel-la ka ta ba prujudikaba trabadju na kel tiritóriu. Dja ki kes irmon sigi kel orientason, Jeová abênsua ses sforsu i es atxa txeu algen ki ta pâpia kêxua.

¹⁶ Un di kes irmon ki staba preokupadu é un ansion ki txoma Kevin, ki é di un kongregason ki ta pâpia kêxua. El splika: “N pensa: ‘Modi ki gósi nu ta ben atxa kes algen ki ta pâpia kêxua?’” Kuzê ki Kevin faze? El fla: “N lenbra di Provérbios 3:5 i N pensa na Muizés. Jeová da-l un orientason ki ta parse ma ka ta fazeba sentidu. El fla Muizés pa tra kes israelita di Ijitu i pa leba-s ti mar Brumedju, undi ki ta parseba ma es ka ta pode skapaba di kes ijípsiu ki staba ta pirsigi-s. Má simé, el obidese i Jeová abensua-l kantu el faze un grandi milagri pa salva-s.” (Ézu. 14:1, 2, 9-11, 21, 22) Kevin staba dispostu na muda se manera di prega. Kal ki foi rezultadu? El fla: “N fika dimiradu di modi ki Jeová abensua-nu. Antis nu ta andaba txeu na pregason, i alvês nu ta atxaba sô un ô dôs algen ki ta papiaba kêxua. Gósi nu ta konsentra na kes tiritóriu ki ten txeu algen ki ta pâpia kêxua. Pur isu, gósi nu ta pâpia ku más algen, nu ten más revizitas i studus di Bíblia, i más algen sta ta sisti nos runion.” Nu ka ten dúvida ma óras ki nu ta anda pa fé, Jeová sénpri ta rekonpensa-nu.

17. Kuzê ki bu prende na kel studu li?

¹⁷ Dja nu odja modi ki nu pode kontinua ta anda pa fé na três ária inportanti. Má nu debe kontinua ta anda pa fé na tudu ária di nos vida, sima óras ki nu ta skodje diverson, óras ki nu ta disidi si nu ta faze un kursu ô formason, ô modi ki nu ta kria nos fidju. Kalker disizon ki nu ten ki toma, nu ka debe sigi sô kuzê ki nu ta odja má tanbê nu debe pensa na nos amizadi ku Jeová, ses konsedju i se promésa di kuida di nos. Si nu faze si, nu ta konsigi ‘anda na nómi di Jeová, nos Deus, pa tudu ténpu.’ — Miq. 4:5.