STUDU 15
KÁNTIKU 30 Nha amigu, nha Pai i nha Deus
Bira más amigu di Deus é bon pa nos!
‘Pa mi, txiga pértu di Deus é bon pa mi.’ — SALMO 73:28.
ASUNTU PRINSIPAL
Modi ki nu pode bira más amigu di Jeová, i kes bons rezultadu ki nu ta ten si nu faze kel-li.
1-2. (a) Kuzê ki nu meste faze pa nu ten un amizadi fórti ku un algen? (b) Kuzê ki nu sta ben pâpia di el na kel artigu li?
TEN algun algen ki nhos é txeu amigu? Kuzê ki bu faze pa nhos bira amigu? Talvês bu pasa txeu ténpu ku el, bu fika ta sabe di dizafius ki el pasa na vida, i di kuzas ki el gosta i ki el ka gosta. Bu diskubri ma el ten kualidadis bunitu ki bu ta gostaba di imita. Bu pasa ta ama bu amigu.
2 Pa nu ten un amizadi fórti ku un algen nu ta meste ténpu i sforsu. Nu meste faze mésmu kuza pa nu ten un amizadi fórti ku Jeová Deus. Na kel artigu li, nu sta ben pâpia di modi ki nu pode bira más amigu di Deus i kes bons rezultadu ki nu ta ten si nu faze kel-li. Primeru, odja pamodi ki é bon nu bira más amigu di Jeová, ki é nos midjór amigu.
3. Pamodi ki nu debe midita na kes bons rezultadu ki nu ta ten si nu bira más amigu di Jeová? Da un izénplu.
3 Di serteza bu ta konkorda ma bira amigu di Jeová é un kuza bon. Má midita na modi ki kel-li é bon pa nos pode motiva-nu pa nu kontinua ta bira más se amigu. (Sal. 63:6-8) Pur izénplu, nu sabe ma si nu kume dretu, si nu faze izersísiu, nu diskansa dretu i nu bebe txeu agu, kel-li é bon pa nos. Má simé, txeu algen ka ta faze kes kuza li, i es ka ta inporta ku ses saúdi. Má, kantu más nu pensa na modi ki kes kuza li ta djuda-nu, más xansi nu ten di kontinua ta faze-s. Di mésmu manera, nu pode sabe ma bira amigu di Jeová é bon pa nos, má si nu midita na kes bons rezultadu ki nu ta ten óras ki nu ta faze kel-li, nu pode xinti motivadu pa nu kontinua ta bira más amigu di Jeová. — Sal. 119:27-30.
4. Kuzê ki skritor di Salmo 73:28 fla?
4 Lé Salmo 73:28. Kel skritor di Salmo 73 éra un levita ki éra múziku na ténplu di Jeová. Talvês dja el tinha txeu ténpu ta sirbi Jeová di manera fiel. Má simé, inda el ta xintaba ma el meste lenbraba ma ‘txiga pértu di Deus’ é bon pa el. I el kreba pa otus algen sabe ma ten un amizadi ku Deus éra bon pa es tanbê. Kal ki é kes bons rezultadu ki nu ta ten si nu faze kel-li?
BIRA MÁS AMIGU DI DEUS TA DA-NU ALEGRIA
5. (a) Pamodi ki bira más amigu di Jeová ta pô-nu ta ser filís? (b) Di akordu ku Provérbios 2:6-16, da alguns izénplu ki ta mostra modi ki sabedoria di Jeová pode djuda-u i proteje-u.
5 Kantu más nu bira amigu di Jeová, más filís nu ta ser. (Sal. 65:4) Kel-li é verdadi pamodi txeu motivu. Pur izénplu, óras ki nu ta lé kuzê ki el ta fla-nu na Bíblia i nu ta obi ku el, nu ta ten sabedoria. Kel sabedoria li ta proteje-nu di mau influensia i di faze érus gravi. (Lé Provérbios 2:6-16.) É pamodi kel-li ki Bíblia ta fla: ‘Filís é kel ómi ki atxa sabedoria i kel ómi ki ta konsigi ten kapasidadi di pensa’. — Pro. 3:13.
6. Kuzê ki poi kel salmista ta perde se alegria?
6 É klaru ki ti kes amigu di Jeová alvês ta xinti tristi. Kel skritor di Salmo 73 perde alegria kantu ki el kumesa ta pensa di manera negativu. El fika xatiadu i ku inveja, pamodi el atxa ma pesoas mau ki ka ta inporta ku Deus i ku ses lei, ten un vida fásil. El pensa ma kes algen violéntu i orgulhozu sénpri ten más rikéza, más saúdi i es ka ta sufri. (Sal. 73:3-7, 12) Kantu el odja kes injustisa, ti el pensa si baleba pena sirbi Jeová. El staba txeu tristi i el fla: ‘Di serteza, é atoa ki N mante nha korason puru i N laba nha mô pa N mostra ma mi é inosenti.’ — Sal. 73:13.
7. Óras ki nu ta xinti tristi, kuzê ki nu pode faze? (Odja dizenhu.)
7 Enbóra kel salmista fika txeu tristi, el faze alguns kuza pa muda se manera di pensa. El ‘entra na kel grandi santuáriu di Deus,’ undi ki Jeová koriji se manera di pensa. (Sal. 73:17-19) Jeová ki é nos midjór amigu, sabe óras ki nu sta tristi. Si nu faze orason pa el, ta pidi-l orientason i nu seta ajuda ki el ta da-nu através di Bíblia i di kongregason, nu ta ten forsa déntu nos pa nu lida ku tristéza. Sikrê óras ki nu ten txeu prubléma ki nu ka sabe kuzê ki nu ta faze, Jeová ta djuda-nu xinti kalmu. — Sal. 94:19.a
Kel levita ki skrebe Salmo 73, sta di pé na ‘kel grandi santuáriu di Deus’. (Odja parágrafu 7.)
BIRA MÁS AMIGU DI DEUS TA DA-NU OBIJETIVU I SPERANSA
8. Di ki otus manera inportanti bira más amigu di Deus é bon pa nos?
8 Bira más amigu di Deus é bon pa nos di dôs otu manera inportanti. Primeru, el ta da-nu un obijetivu na vida. Sugundu, el ta da-nu un speransa suguru pa futuru. (Jer. 29:11) Nu ben odja kes bons rezultadu li.
9. Modi ki bira más amigu di Jeová ta da-nu obijetivu na vida?
9 Bira más amigu di Jeová ta da-nu obijetivu na vida. Txeu algen oji ki ka ta kridita ma Deus ta izisti, ta pensa ma vida ka ten un obijetivu i ma ku ténpu nu ta ben dexa di izisti. Má ku nos studu di Bíblia nu pasa ta ten serteza ma Deus “ta izisti i ma el ta rekonpensa kes ki ta djobe-l asériu.” (Ebr. 11:6) Tanbê, Jeová kria-nu ku nisisidadi di sirbi-l, nton óras ki nu ta sirbi-l nu ta xinti alegria di verdadi. — Deut. 10:12, 13.
10. Kuzê ki Jeová promete pa kes algen ki ta kunfia na el? (Salmo 37:29)
10 Txeu algen ka ten un speransa di verdadi pa futuru, sô es ta trabadja, es ta kaza, ten fidju i dipôs pripara pa óras ki es ka ta pode trabadja más. Es ka sabe kuzê ki Deus promete pa futuru. Má nu sabe ma Jeová ta kuida di ses sérvu. (Sal. 25:3-5; 1 Tim. 6:17) Nu ta kunfia na nos Deus i nos amigu, i nu sabe ma el ta ben faze kuzê ki el promete-nu. Na futuru, nu ta ben ten txeu kuza sábi, prinsipalmenti oportunidadi di adora Jeová pa tudu ténpu na Paraízu. — Lé Salmo 37:29.
11. Kuzê ki ta kontise óras ki nu bira más amigu di Deus, i modi ki Deus ta xinti?
11 Bira más amigu di Deus é bon pa nos di txeu otus manera. Pur izénplu, Jeová promete púrdua pekadu di kes algen ki rapende i ki bira más se amigu. (Isa. 1:18) Pamodi kel-li, nu ka meste karega pézu di konsénsia pizadu pamodi érus ki nu faze na pasadu. (Sal. 32:1-5) I nu ta xinti kontenti i dexa Jeová filís. (Pro. 23:15) Di serteza bu ta konsigi pensa na otus benson ki nu ta ten óras ki nos é amigu di Jeová. Má modi ki nu pode kontinua ta bira más amigu di Deus?
MODI KI NU PODE KONTINUA TA BIRA MÁS AMIGU DI DEUS?
12. Kuzê ki bu faze pa bira más amigu di Deus?
12 Si bo é un sérvu di Jeová batizadu, di serteza bu tevi ki faze txeu kuza pa bu bira amigu di Deus. Bu prende txeu verdadi sobri Jeová Deus i Jizus Kristu, bu rapende di bus éru di pasadu, bu mostra fé na Deus i bu sforsa pa aji di akordu ku se vontadi. Má pa nu bira más amigu di Deus nu meste kontinua ta faze kes kuza li. — Kol. 2:6.
13. Ki três kuza pode djuda-nu kontinua ta bira más amigu di Jeová?
13 Kuzê ki ta djuda-nu kontinua ta bira más amigu di Jeová? (1) Nu meste kontinua ta lé i ta studa Bíblia. Óras ki nu ta faze kel-li, nos obijetivu debe ser más ki sô prende kuzas sobri Deus. Nu debe tenta intende manera ki Deus ta pensa i kuzê ki el krê pa nos, i vive di manera ki el krê. (Efé. 5:15-17) (2) Nu debe midita na kes txeu manera ki el ta mostra se amor pa nos, asi pa nu bira nos fé más fórti. (3) Nu debe kontinua ta ôdia kes kuza ki ta ofende Jeová i ivita amizadi ku kes algen ki ta faze kuzas mariadu. — Sal. 1:1; 101:3.
14. Di akordu ku 1 Koríntius 10:31, kal ki é alguns kuza ki nu pode faze na nos dia-dia pa nu pode agrada Jeová? (Odja fotus.)
14 Lé 1 Koríntius 10:31. É inportanti nu kontinua ta faze kuzas ki nu sabe ma ta agrada Jeová. Nu meste faze más di ki sô prega i sisti runion. Kuzas ki ta dexa Jeová kontenti ta inklui kuzas ki nu ta faze na nos dia-dia. Pur izénplu, óras ki nos é onéstu na tudu kuza i nu ta dividi kuzê ki nu ten ku otus algen, nu ta dexa Jeová kontenti. (2 Kor. 8:21; 9:7) Tanbê el krê pa nu mostra ma nos é gratu pa kel vida ki el da-nu. Nu ta fika más amigu di Kel ki da-nu vida óras ki nu ta toma kuidadu ku kantu ki nu ta kume i bebe i nu ta faze otus kuza ki ta djuda-nu ten bon saúdi. Tudu sforsu ki nu ta faze pa agrada Jeová, ti mésmu na kuzas pikinoti, ta pô-l ta ama-nu más txeu. — Luk. 16:10.
Konduzi ku suguransa, faze izersísiu, kume kumida ki é bon pa saúdi i gosta di da, é alguns manera ki nu pode agrada Jeová. (Odja parágrafu 14.)
15. Modi ki Jeová krê pa nu trata otus algen?
15 Jeová ta mostra bondadi pa kes algen justu i pa kes algen injustu. (Mat. 5:45) El krê pa nos tanbê nu mostra bondadi pa otus algen. Pur izénplu, nu ‘ka ta pâpia mal di ningen, nu ka ta ser konfuzéntu i nu ta mostra brandura ku tudu algen.’ (Titu 3:2) Pur isu, sikrê un algen ka ta kridita na Jeová, nu ka ta atxa ma nos é más midjór ki el. (2 Tim. 2:23-25) Nu ta bira más amigu di Jeová óras ki nu ta trata tudu algen ku bondadi.
NU PODE BIRA MÁS AMIGU DI DEUS MÉSMU ÓRAS KI NU PEKA
16. Modi ki skritor di Salmo 73 kumesa ta xinti dipôs di algun ténpu?
16 Má i si alvês bu kumesa ta xinti ma bu ka merese amor di Jeová? Sima dja nu odja, kontise un kuza sima kel-li ku skritor di Salmo 73. El fla: ‘Nha pé kuazi dja disviaba; faltaba poku pa N skoregaba.’ (Sal. 73:2) El rekonhese ma el ‘staba tristi’ dianti di Jeová i el ‘ka tinha intendimentu, sima un animal ki ka ta pensa.’ (Sal. 73:21, 22) Má pamodi se éru, el xinti ma Jeová ka ta amaba el más i ma el ka ta purduaba el?
17. (a) Kuzê ki kel salmista faze, sikrê kantu el staba txeu tristi? (b) Ki lison ki nu pode prende ku se izénplu? (Odja fotus.)
17 Si kel salmista pensa ma Jeová bandona-l, talvês el xinti si duránti poku ténpu. Ta parse ma kantu el staba tristi, el rekonhese ma el meste biraba más amigu di Deus. El fla: ‘Má, gósi N sta sénpri ku bo Jeová; bu pega-m na nha mô direita. Bu ta gia-m ku bus konsedju, i dipôs bu ta leba-m pa N ten glória.’ (Sal. 73:23, 24) Nos tanbê, nu debe odja Jeová sima un rótxa firmi óras ki nu ta xinti fraku ô dizanimadu. (Sal. 73:26; 94:18) Sikrê nos pé disvia pa un momentu, nu pode volta pa Jeová ku serteza ma el ‘sta prontu pa púrdua’. (Sal. 86:5) Prinsipalmenti óras ki nu sta txeu tristi, nu debe bira más amigu Deus. — Sal. 103:13, 14.
Óras ki nu xinti ma nu meste bira nos fé más fórti, nu debe pasa más ténpu ta faze orason i sisti tudu runion, asi pa nu pode bira más amigu di Jeová. (Odja parágrafu 17.)
BIRA MÁS AMIGU DI DEUS PA TUDU TÉNPU
18. Pamodi ki nu pode kontinua ta bira nos amizadi ku Jeová más fórti pa tudu ténpu?
18 Nu pode kontinua ta bira nos amizadi ku Jeová más fórti pa tudu ténpu i nunka nu ka ta para di prende sobri el. Bíblia ta fla ma “ningen ka ta pode sabe kaminhu” di Jeová, se sabedoria i se konhisimentu. — Rom. 11:33.
19. Ki serteza Salmo ta da-nu?
19 Salmo 79:13 ta fla: ‘Nos, ki é bu povu i ribanhu ki bu ta pastora, nu ta ben agradese-u pa tudu ténpu, i nu ta ben pâpia di bu lovor di un jerason pa kel otu.’ Sima bu ta ba ta bira más amigu di Deus, bo tanbê, bu pode ten serteza ma bu ta resebe bensons pa tudu ténpu. Sima kel salmista fla, bu pode fla ku kunfiansa: ‘Deus é rótxa di nha korason i nha párti pa tudu ténpu.’ — Sal. 73:26.
KÁNTIKU 32 Fika di ladu di Jeová!
a Alguns algen ki ta kontinua ta xinti ansiadadi ô tristéza duránti txeu ténpu talvês ta meste di ajuda di un dotor. Pa más informason, odja Sentinéla nunbru 1 di 2023.