Modi ki nu pode sta kontenti ku kel ki nu ten?

1. Un algen ki sta kontenti ta konsentra na kuzê, má kuzê ki kel-li ka krê fla?

ABO é un algen ki sta kontenti ku kes kuza ki bu ten? Un algen ki sta kontenti ta konsentra na kes benson ki el ten gósi. Pur isu, el ta xinti pas i alegria. El ka ta xinti tristi ô xatiadu pamodi kes kuza ki el ka ten. Má, sta kontenti ka krê fla ma nu ka ta inporta ku modi ki nu ta leba nos vida. Pur izénplu, un sérvu di Jeová ta djobe oportunidadi di faze más na se sirvisu. (Rom. 12:1; 1 Tim. 3:1) Tanbê, el ka ta perde se alegria si inda el ka resebe un priviléjiu ki el ten vontadi di ten.

2. Ki kuzas mariadu nu pode faze si nu ka sta kontenti?

² Si nu ka sta kontenti nu pode kumesa ta toma maus disizon. Kes algen ki nunka ka sta kontenti ku kes kuza ki es ten, pode pasa txeu óra ta trabadja pa es pode ten kes kuza ki na verdadi es ka meste. Infilismenti, alguns sérvu di Jeová txiga di furta dinheru i otus kuza ki es krê tinha. Talvês es ta fla: ‘N merese kel-li, dja N ten txeu ténpu ta spera-l’, ô ‘N pode paga kel dinheru dipôs’. Kalker tipu di furtu ta dizagrada Jeová i ta dizonra se nómi. (Pro. 30:9) Otus fika dizanimadu pamodi es ka resebe un priviléjiu na sirvisu di Jeová i es para di sirbi Jeová. (Gál. 6:9) Pamodi ki un sérvu di Jeová ta pensa na faze kel-li? Pode ser ki kel algen ba ta dexa di sta kontenti ku kel ki el tinha.

3. Filipensis 4:11, 12 ta da-nu serteza di kuzê?

³ Nu pode prende sta kontenti. Apóstlu Paulu skrebe ma el “prende sta kontenti na tudu situason.” (Lé Filipensis 4:11, 12.) El skrebe kes palavra li kantu el staba na kadia. Má simé, el ka perde se alegria. El “prende kal ki é segredu” di sta kontenti. Si nu sta ta sforsa pa sta kontenti, palavras i spiriénsia di Paulu ta da-nu serteza ma nos tanbê nu pode prende sta kontenti. Má nu ka debe spera ma é fásil fika kontenti ku nos situason. Envês di kel-li, nu debe prende sta kontenti. Modi? Nu sta ben pâpia di alguns kualidadi ki ta djuda-nu prende kel segredu di sta kontenti.

DIZENVOLVE GRATIDON

4. Modi ki ser gratu ta djuda-nu sta kontenti? (1 Tesalonisensis 5:18)

⁴ É más fásil pa un algen ki ta mostra gratidon sta kontenti. (Lé 1 Tesalonisensis 5:18.) Pur izénplu, óras ki nos é gratu pamodi nu ten kes kuza ki nu meste, nu ta fika ta pensa más poku na kes kuza ki nu krê, má ki nu ka meste. Óras ki nu ta da valor pa priviléjius ki nu ten gósi, nu ta mante konsentradu na da nos midjór na kel diziginason, envês di fika ta pensa txeu na un novu priviléjiu. Nu ka ta fika dimiradu pamodi ki Bíblia ta insentiva-nu pa nu mostra gratidon na nos orason pa Jeová! Óras ki nos é un algen gratu nu ta xinti “kel pas di Deus ki nu ka ta konsigi intende”. — Filipensis 4:6, 7.

5. Kal ki éra alguns motivu ki kes israelita tinha pa es mostraba gratidon? (Odja imajen.)

⁵ Odja kuzê ki kontise ku kes israelita. Txeu bês es reklama di Jeová pamodi es ka tinha kes kumida ki es ta kumeba na Ijitu. (Nun. 11:4-6) É verdadi, ma vida na dizértu ka éra fásil. Kuzê ki pode djudaba es sta kontenti? Es devia pensaba ku gratidon na kuzê ki Jeová dja fazeba pa es. Na Ijitu, undi ki es éra maltratadu sima skravu, Jeová traze 10 prega pa kes gentis di Ijitu. Dipôs ki kes israelita libertadu, “es toma gentis di Ijitu ses rikéza”, sima ses prata, oru i ropa. (Ézu. 12:35, 36) Kantu israelitas staba ta ser pirsigidu ti bera di mar Brumedju, Jeová faze un milagri kantu el abri mar. I timenti es staba na dizértu, Jeová da-s maná tudu dia pa es kume. Nton, pamodi ki kes israelita staba ta reklama di kumida? Ses prubléma ka éra pamodi es ka tinha kel kumida ki es mesteba, má éra pamodi es ka staba ta mostra gratidon pa kes kuza ki dja es tinha.

6. Kuzê ki pode djuda-nu dizenvolve gratidon?

⁶ Modi ki bu pode dizenvolve gratidon? Primeru, tra ténpu tudu dia pa bu pensa na kes bons kuza ki ta dexa-u kontenti. Ti mésmu bu pode skrebe dôs ô três kuza ki bo é gratu pa es. (Lam. 3:22, 23) Sugundu, mostra bu gratidon. Sénpri agradese otus algen pa kuzê ki es faze pa bo. I más inportanti, agradese Jeová tudu dia. (Sal. 75:1) Tirseru, skodje amigus ki ta mostra gratidon. Si nos amigus ta mostra gratidon, ses atitudi pode pô-nu ta faze mésmu kuza. Di mésmu manera, si nu sta djuntu ku kes algen ki ka ta mostra gratidon ô ki ta sta sô ta reklama, nu ta faze mésmu kuza. (Deut. 1:26-28; 2 Tim. 3:1, 2, 5) Óras ki nu sta disididu na mostra gratidon é más difísil pa sentimentu di ingratidon toma kónta di nos.

7. Kuzê ki djuda Ana dizenvolve gratidon i kal ki foi rezultadu?

⁷ Odja kuzê ki kontise ku Ana,a ki ta vive na Indonézia. El fla: “Duránti COVID-19 N kumesa ta konpara nha situason ku kel di nhas irmon. Pamodi kel-li, N bira un algen ingratu.” (Gál. 6:4) Kuzê ki djuda-l muda se manera di pensa? El fla: “N kumesa ta konta kes benson ki N ta resebeba tudu dia i N ta pensaba na kes txeu kuza bon ki N ten pamodi N ta faze párti di organizason di Jeová. Dipôs, N ta agradeseba Jeová pa kes kuza li. Pamodi kel-li, N kumesa ta xinti alegria di verdadi.” Si bu sta ta ten pensamentus negativu, bu ta pode faze kuzas sima kel-li pa bu mostra gratidon otu bês?

MANTE KONSENTRADU I SER UMILDI

8. Na ki armadilha Baruki kai?

⁸ Baruki, ki éra sekretáriu di Jeremias, pa un ténpu kai na un armadilha. Baruki tinha un diziginason difísil, ki éra apoia Jeremias timenti el ta papiaba di un mensajen fórti kóntra un nason ingratu. Tevi un ténpu, ki Baruki dexa di sta konsentradu. Envês di el konsentra na kuzê ki Jeová krê pa el fazeba, ta parse ma el kumesa ta pensa txeu na el mê i na kuzê ki el krê fazeba. Jeová uza Jeremias pa fla Baruki: ‘Bu sta ta djobe kuzas grandi pa bo. Para di djobe kes kuza la.’ (Jer. 45:3-5) Kuzê ki Jeová krê flaba Baruki é: “Sta kontenti ku bu situason gósi.” Baruki seta kel koreson i el kontinua ta ten aprovason di Jeová.

9. Sima sta na 1 Koríntius 4:6, 7, kuzê ki umildadi pode pô-nu ta rekonhese? (Odja imajen.)

⁹ Alvês, un sérvu di Jeová pode xinti ma el ten direitu di ten un priviléjiu na se sirvisu. El pode ser un algen ki ten txeu kapasidadi, ki ta trabadja duru, ki ten spiriénsia, ô el pode ten kes três kuza li. Má, otus algen pode resebe kel priviléjiu ki el ta gostaba di ten. Kuzê ki pode djudaba el si el fika xatiadu? El pode pensaba na kuzê ki apóstlu Paulu skrebe, na 1 Koríntius 4:6, 7. (Lé.) Tudu priviléjiu ki nu ta resebe i tudu kapasidadi ki nu ten, ta ben di Jeová. Jeová ka da-nu kes prezenti li pamodi nos é más spesial di ki otus algen. Jeová ta da-nu es pamodi se grandi bondadi. — Rom. 12:3, 6; Efé. 2:8, 9.

10. Modi ki nu pode dizenvolve umildadi?

¹⁰ Nu pode dizenvolve umildadi si nu pensa txeu na izénplu ki Jizus da-nu. Odja kuzê ki kontise na kel noti ki Jizus laba pé di kes apóstlu. Apóstlu Juan skrebe ma “Jizus sabia [1] ma se Pai intregaba tudu kuza na se mô i [2] ma el binha di Deus i [3] el ta baba pa Deus.” Má simé el “kumesa ta laba se disiplus pé”. (Juan 13:3-5) Jizus pode xintiba ma éra el ki tinha direitu pa es lababa el pé. Má Jizus nunka ka xinti ma pamodi el éra fidju di Deus, el mereseba ten un bon kaza, txeu dinheru ô ten un vida fásil. (Luk. 9:58) Má Jizus éra umildi i el staba kontenti ku kuzê ki el tinha. El dexa un izénplu perfeitu pa nos. — Juan 13:15.

11. Modi ki umildadi djuda Denis sta kontenti?

¹¹ Un irmon di Olanda ki txoma Denis, tenta sigi izénplu di umildadi di Jizus, má kel-li ka foi fásil. El fla: “Alvês N ta xinti orgulhu i ingratidon ta dizenvolve déntu mi, sima óras ki N ta odja otus algen ta resebe un priviléjiu. Óras ki kel-li ta kontise, N ta studa sobri umildadi. Na JW Library^®, N ta marka kes testu ki ta pâpia sobri umildadi pa N pode atxa-s más faxi i pa N le-s otu bês. Tanbê, N ta diskarega na nha tilifóni alguns diskursu sobri umildadi i N ta fika ta obi-s.b N prende ma tudu trabadju ki nu ta faze é pa da Jeová glória, ka pa nos. Ku bondadi Jeová ta dexa pa kada un di nos faze algun kuza, má é el ki ta poi kel trabadju ta ten bon rezultadu.” Si bu kumesa ta xinti ma bu ka sta filís pamodi bu ka resebe un diziginason ki bu kreba, faze algun kuza pa bu dizenvolve umildadi. Kel-li ta poi bu amizadi ku Jeová ta bira más fórti i el ta djuda-u sta kontenti — Tia. 4:6, 8.

MIDITA NA BU SPERANSA

12. Ki speransa pa futuru ta djuda-nu sta kontenti? (Isaías 65:21-25)

¹² Nu ta xinti más kontenti óras ki nu ta midita na kel speransa sábi ki nu ten pa futuru. Kes palavra di Jeová ki proféta Izaías skrebe ta mostra modi ki vida oji pode ser difísil i el ta garanti-nu ma Jeová ta ben kaba ku kes prubléma. (Lé Isaías 65:21-25.) Nu ta ben mora na kazas suguru i bunitu. Nu ta ben ten trabadju ki nu gosta, kume kumida sábi i ki é bon pa saúdi. Nunka más nu ka ta ben fika preokupadu ku kuzas prigozu ki pode kontise ku nos ô ku nos fidju. (Isa. 32:17, 18; Eze. 34:25) Nos futuru ta ben ser sábi i suguru.

13. Na ki situason más nu meste konsentra na nos speransa?

¹³ Gósi más di ki nunka, nu meste konsentra na nos speransa. Pamodi? Pamodi nu sta ta vive na “ténpu di fin” i nos tudu nu tene prublémas ki é “difísil di aguenta.” (2 Tim. 3:1) Tudu dia Jeová ta djuda-nu aguenta firmi, óras ki el ta da-nu orientason, forsa i ajuda ki nu meste. (Sal. 145:14) Alén di kel-li, nos speransa pode djuda-nu aguenta firmi óras ki nu ta pasa pa prublémas. Talvês bu sta ta sforsa pa bu da bu família kes kuza ki es meste. Kel-li krê fla ma sénpri bu ten ki ben luta pa sobrivive? Klaru ki nau! Jeová promete ma el ta da-u kuzê ki bu meste i mutu más inda na Paraízu. (Sal. 9:18; 72:12-14) Bu pode sta ta luta ku un duénsa gravi, depreson, ô otu prubléma di saúdi. Bu ta ben kontinua ta sufri kes kuza li i nunka más bu ka ta midjora? Klaru ki nau. Duénsa ku mórti ta ben kaba na kel mundu novu di Deus. (Apo. 21:3, 4) Kel speransa li ta djuda-nu sta kontenti, i ka fika xatiadu i diziludidu, pamodi kuzê ki sta kontise gósi. Nu pode ser filís mésmu ki nu sta ta lida ku injustisa, mórti di un algen ki nu krê txeu, un duénsa ô kalker otu prubléma. Pamodi? Pamodi ka ta inporta modi ki nos situason é difísil, nu sabe ma “nos sufrimentu é pa poku ténpu” i ma na mundu novu ki sta kuazi ta txiga nu ka ta ben sufri más. — 2 Kor. 4:17, 18.

14. Modi ki nu pode bira nos speransa más fórti?

¹⁴ Dja ki speransa é inportanti pa nu sta kontenti, modi ki nu pode bira-l más fórti? Sima un algen talvês meste uza un óklus pa el odja un kuza ki sta lonji más dretu, nos tanbê, nu meste faze alguns kuza pa nu odja nos futuru na Paraízu más dretu. Pur izénplu, óras ki nu ta fika txeu preokupadu pamodi é difísil ganha dinheru ki nu meste pa nu vive, nu pode imajina modi ki vida ta ben ser óras ki nu ka ta ben meste di dinheru i ningen ka ta ben ser póbri. Si nu sta dizanimadu pamodi nu ka resebe algun priviléjiu di sirvisu, nu pode pensa na modi ki kes kuza li ka ta ben ser inportanti más óras ki nu bira perfeitu i ki dja nu sta ta sirbi Jeová pa milharis di anu. (1 Tim. 6:19) Nu pode fika preokupadu ku kuzas ki sta kontise gósi ki ta fika difísil nu pensa na kes benson ki nu ta ben ten na futuru. Kantu más nu pensa na kes benson ki Jeová ten pa nos, ku ténpu ta fika más fásil nu konsentra na es.

15. Kuzê ki bu prende ku kel ki Kristina fla?

¹⁵ Odja modi ki speransa djuda Kristina, ki é kazadu ku Denis, ki dja nu papiaba di el. El fla: “N ten un duénsa ki ta poi nha musklu ta fika fraku dimás i pur isu N ten ki uza un kadera di róda. N ta pasa maior párti di ténpu na kama i N ta sta ku dór tudu dia. Ka dura li nha dotor fla-m má N ka sta ta ben midjora. Má lógu N pensa: ‘El ta odja futuru di manera diferenti.’ N konsentra na nha speransa i kel-li da-m pas déntu mi. Gósi, N ten ki luta pa N vive, má N ta ben ten un vida sábi dimás na mundu novu!”

‘KES KI TEN GRANDI RUSPETU PA EL KA TA XINTI FALTA DI NADA’

16. Pamodi ki rei Davidi pode flaba ma kes ki ten grandi ruspetu pa Jeová ‘ka ta xinti falta di nada’?

¹⁶ Sikrê un sérvu di Jeová é filís el ta ben lida ku difikuldadis. Rei Davidi sufri pamodi três di ses fidju móre. El traídu, pirsigidu i el pasa txeu anu ta fuji pamodi es tenta mata-l. Simé, kantu el staba ta pasa pa kes prubléma la, el fla sobri Jeová: ‘Kes ki ten grandi ruspetu pa el ka ta xinti falta di nada.’ (Sal. 34:9, 10) Pamodi ki el pode flaba kel-li? Pamodi el sabia ma nos, ki é sérvus di Jeová, nu ka ta spera ma nu ta ten un vida sen prubléma, má nu ten serteza ma nu ka ta ben xinti falta di kes kuza ki nu meste di verdadi. (Sal. 145:16) Nu pode ten serteza ma Jeová ta djuda-nu aguenta firmi na tudu prubléma ki nu pode pasa pa el. Nu pode ten pas i filisidadi ka inporta nos situason.

17. Pamodi ki bu krê sta kontenti?

¹⁷ Jeová krê pa bu sta kontenti. (Sal. 131:1, 2) Nton faze tudu kel ki bu ta pode pa bu sta kontenti. Si bu sforsa txeu pa dizenvolve gratidon, pa mante konsentradu, pa ser umildi i pa bira bu speransa más fórti, bu ta pode ben fla: ‘Sin, N sta kontenti’. — Sal. 16:5, 6.