Modi ki Jeová ta djuda-nu aguenta firmi?

1. Pamodi ki nu meste aguenta firmi i kuzê ki pode djuda-nu faze kel-li? (1 Pedru 5:10)

NA ES ténpu di fin ki sta difísil di aguenta, povu di Jeová meste aguenta firmi. Alguns sta ta lida ku un duénsa ki ka ten kura. Otus sta ta sufri pamodi algen ki es ta ama móre. Inda otus sta ta lida ku opozison di família ô di govérnu. (Mat. 10:18, 36, 37) Bu pode ten serteza ma ka ta inporta ki difikuldadi bu sta ta pasa pa el, Jeová ta djuda-u aguenta firmi. — Lé 1 Pedru 5:10.

2. Ken ki ta djuda-nu aguenta firmi?

² Aguenta firmi krê fla ma nu ta kontinua lial pa Jeová i nu ta sirbi-l ku alegria, sikrê óras ki nu ta pasa pa prublémas, pirsigison ô tentason. Pa nu aguenta firmi, tanbê nu ten ki kridita ma kuzas ta ben fika midjór. Kapasidadi di aguenta firmi ki un sérvu di Jeová ten, ka ta ben di se forsa. Envês di kel-li, el ta ben di Jeová, ki é kel algen ki ta da-nu “puder alén di normal.” (2 Kor. 4:7) Na kel studu li, nu sta ben odja kuatu kuza ki Jeová ta da-nu pa djuda-nu aguenta firmi. Tanbê nu sta ben odja kuzê ki nu meste faze pa kada un di es djuda-nu.

ORASON

3. Pamodi ki nu pode fla ma orason é un milagri?

³ Jeová faze un kuza spesial ki pode djuda-nu aguenta firmi. Enbóra nos é inperfeitu, Jeová ranja un manera pa nu pâpia ku el. (Ebr. 4:16) Pur izénplu, nu pode pâpia ku Jeová na kalker óra i sobri kalker asuntu. El ta pode obi-nu na kalker língua i na kalker lugar ki nu sta, sikrê nu sta izoladu ô nu sta prézu. (Jonas 2:1, 2; Atus 16:25, 26) Si nu fika preokupadu dimás pamodi nu ka sta konsigi fla kuzê ki nu sta pensa, simé, Jeová ta pode intende kuzê ki nu krê fla. (Rom. 8:26, 27) Orason é própi un milagri!

4. Modi ki nu sabe ma pidi pa Jeová djuda-nu aguenta firmi é un kuza ki sta di akordu ku se vontadi?

⁴ Na se Palavra, Jeová ta da-nu serteza ma “ka ta inporta kuzê ki nu pidi di akordu ku se vontadi, el ta obi-nu.” (1 Juan 5:14) Nu pode pidi Jeová pa djuda-nu aguenta firmi? Klaru ki sin! Pamodi kel-li é un kuza ki sta di akordu ku se vontadi. Modi ki nu sabe di kel-li? Óras ki nu ta aguenta prublémas, Jeová ta pode da Satanás un respósta. (Pro. 27:11) Alén di kel-li, Bíblia ta fla ma Jeová tene vontadi di “mostra se forsa pa kes algen ki ten korason konplétu pa el.” (2 Kró. 16:9) Pur isu, nu pode ten serteza ma Jeová ten puder i dizeju di djuda-nu. — Isa. 30:18; 41:10; Luk. 11:13.

5. Modi ki faze orason pode djuda-nu xinti pas déntu nos? (Isaías 26:3)

⁵ Bíblia ta fla ma óras ki nu ta ora di korason sobri nos preokupason, ‘kel pas di Deus ki nu ka ta konsigi intende, ta proteje nos korason i nos menti’. (Flp. 4:7) Nos é txeu gratu pamodi kel-li. Nu sabe ma kes algen ki ka ta sirbi Jeová tanbê ta pasa pa prublémas i txeu di es ta tenta uza maneras diferenti pa es xinti pas. Pur izénplu, alguns algen ta uza un fórma di miditason pa tra tudu kuza di menti, asi pa es xinti kalmu. Má fika ku menti vaziu pode prujudika nos amizadi ku Jeová. (Konpara ku Mateus 12:43-45.) Alén di kel-li, kel pas ki Jeová ta da-nu óras ki nu ta ora, é mutu más midjór di ki kalker manera ki pesoas ta uza pa tenta xinti pas, sima kel tipu di miditason ki es ta faze. Óras ki nu ora pa Jeová, nu ta mostra ma nu ta kunfia na el di korason i el ta da-nu ‘pas ki ka ta kaba’. (Lé Isaías 26:3.) Un manera ki Jeová ta faze kel-li, é óras ki el ta djuda-nu lenbra di verdadis ki nu prende na Bíblia. Kes verdadi li ta poi nos menti i nos korason ta xinti kalmu, pamodi nu sabe ma Jeová ta kuida di nos i el krê djuda-nu. — Sal. 62:1, 2.

6. Kuzê ki bu pode faze pa bus orason djuda-u más txeu? (Odja imajen.)

⁶ Kuzê ki bu pode faze. Óras ki bu sta pasa pa un prubléma ki ta poi bu fé na próva, ‘lansa bu karga na Jeová’ i ora ta pidi-l pa el da-u se pas. (Sal. 55:22) Tanbê, ora ta pidi-l pa el da-u sabedoria ki bu meste asi pa bu pode lida ku bus prubléma. (Pro. 2:10, 11) Alén di pidi-l pa el djuda-u aguenta firmi, tanbê ka bu skese di agradese-l. (Flp. 4:6) Djobe próvas ma Jeová sta ta djuda-u duránti bus prubléma i agradese-l pa kel-li. Ka bu dexa bus prubléma pô-u ta skese di kes benson ki Jeová dja da-u. — Sal. 16:5, 6.

PALAVRA DI DEUS

7. Modi ki studa Bíblia pode djuda-nu aguenta firmi?

⁷ Jeová da-nu se Palavra pa djuda-nu aguenta firmi. Bíblia ten txeu testu ki ta da-nu serteza ma Jeová ta djuda-nu. Odja un izénplu. Mateus 6:8 ta fla: “Nhos Pai sabe kuzê ki nhos meste, ti mésmu antis di nhos pidi-l.” É Jizus ki fla kes palavra li i el konxe Jeová mutu más midjór ki kalker otu algen. Pur isu, nu pode ten serteza ma óras ki nu sta ta sufri, Jeová sabe kuzê ki nu meste i el ta djuda-nu. Bíblia ten txeu otus promésa ki ta da-nu forsa ki nu meste pa nu aguenta firmi. — Sal. 94:19.

8. (a) Da un izénplu di un prinsípiu di Bíblia ki pode djuda-nu aguenta firmi. (b) Kuzê ki pode djuda-nu lenbra di prinsípius di Bíblia óras ki nu meste toma disizon?

⁸ Prinsípius di Bíblia pode djuda-nu aguenta firmi. Es pode da-nu sabedoria ki nu meste asi pa nu toma bons disizon. (Pro. 2:6, 7) Pur izénplu, Bíblia ta insentiva-nu pa nu vive un dia di kada bês, envês di fika preokupadu ku kuzas di manhan. (Mat. 6:34) Si nu ten ábitu di lé i midita na Bíblia tudu dia é más fásil nu lenbra di prinsípius ki pode djuda-nu óras ki nu meste.

9. Modi ki stórias ki sta na Bíblia ta pô-nu ta ten más kunfiansa ma Jeová ta djuda-nu?

⁹ Tanbê, na Bíblia nu ta atxa stória di pesoas sima nos ki kunfia na Jeová i Jeová djuda-s. (Ebr. 11:32-34; Tia. 5:17) Óras ki nu ta midita na stória sima kes-li nu ta fika ku más kunfiansa ma Jeová é ‘nos lugar di proteson i nos forsa, un ajuda ki ta atxadu faxi na ténpus di frónta.’ (Sal. 46:1) I óras ki nu ta pensa na modi ki sérvus di Jeová mostra fé na el i es kontinua ta sirbi-l sikrê na ténpus difísil, nu ta xinti inkorajadu pa faze mésmu kuza. — Tia. 5:10, 11.

10. Kuzê ki bu pode faze pa Bíblia djuda-u más txeu?

¹⁰ Kuzê ki bu pode faze. Lé Bíblia tudu dia i faze un lista di kes testu ki bu ta atxa ma pode djuda-u más txeu. Tanbê txeu algen ta atxa ma testu di dia é un bon manera pa es kumesa dia ku un inkorajamentu di Bíblia. Un irman ki txoma Mariaa ki se mai ku se pai atxadu ku kánser ta konkorda ku kel-li. Kuzê ki djuda-l aguenta firmi timenti el staba ta kuida di es na kes últimu mês di ses vida? El fla: “Tudu dia di palmanhan N ta leba testu di Bíblia ki sta na Izamina testu di dia i N ta miditaba na el. Kel-li djuda-m pensa tudu dia sobri Jeová i na kes kuza sábi ki el ta inxina-nu na se Palavra envês di pensa sô na prublémas ki N tinha.” — Sal. 61:2.

NOS IRMONS KU IRMANS

11. Modi ki nu ta xinti óras ki nu ta pensa na modi ki irmons ku irmans sta ta aguenta prublémas?

¹¹ Jeová da-nu irmons ku irmans pa djuda-nu aguenta firmi. Sô sabe ma irmons na mundu interu sta pasa pa kes mésmu sufrimentu ta da-nu serteza ma nu ka sta nos sô. (1 Ped. 5:9) Envês di kel-li, nu pode ten serteza ma ka ta inporta ki situason nu sta ta pasa pa el, otus irmon dja pasa pa situason sima di nos i es aguenta firmi. Kel-li krê fla ma nos tanbê nu ta konsigi aguenta firmi! — Atus 14:22.

12. Modi ki nos irmons ta djuda-nu i kuzê ki nu pode faze pa es? (2 Koríntius 1:3, 4)

¹² Irmons ku irmans pode inkoraja-nu pa nu aguenta firmi ku kuzas ki es ta fla i ki es ta faze pa nos. Paulu odja ma kel-li é verdadi. Txeu bês el mostra se gratidon pa kes algen ki djuda-l kantu el staba prézu déntu kaza i ti el fla ses nómi na kes karta ki el skrebe. Es da Paulu konsolu, inkorajamentu i es djuda-l ku kes kuza ki el mesteba. (Flp. 2:25, 29, 30; Kol. 4:10, 11) Oji ta kontise mésmu kuza ku nos. Óras ki nu meste ajuda pa nu aguenta firmi, nos irmons ku irmans sta la pa nos. I óras ki es meste ajuda nu sta la pa es. — Lé 2 Koríntius 1:3, 4.

13. Kuzê ki djuda un irman ki txoma Maya aguenta firmi?

¹³ Na 2020, autoridadis entra na kaza di un irman na Rúsia ki txoma Maya, i es rabista se kaza. Dipôs es leba-l pa tribunal pamodi el ta pregaba pa otus algen. Má irmons ku irmans inkoraja-l txeu duránti kel ténpu difísil. El fla: “Duránti kel ténpu N staba ta xinti kansadu, preokupadu i tristi. Má irmons ku irmans txoma-m, es manda-m mensajen i es skrebe-m karta. Es da-m serteza ma es ta ama-m. Sénpri N sabia ma irmons ku irmans é un grandi família ki N tinha. Má, désdi 2020 N fika ku más serteza di kel-li.”

14. Kuzê ki nu pode faze pa nu resebe ajuda di irmons óras ki nu sta aguenta firmi? (Odja imajen.)

¹⁴ Kuzê ki bu pode faze. Óras ki bu sta ta pasa pa un prubléma é inportanti bu pâpia ku irmons i pasa ténpu ku es. Xinti avontádi na pidi ansions ajuda. Es pode ser sima ‘un lugar pa sukundi di béntu, sima un lugar pa sukundi di tenporal’. (Isa. 32:2.) Lenbra ma bus irmon tanbê sta ta pasa pa prublémas. Pur isu, si bu faze algun kuza bon pa kes algen ki meste, bu ta xinti filís i kel-li ta djuda-u aguenta bus prubléma. — Atus 20:35.

NOS SPERANSA

15. Modi ki speransa djuda Jizus i modi ki nos speransa ta djuda-nu? (Ebreus 12:2)

¹⁵ Jeová da-nu speransa pa djuda-nu aguenta firmi. (Rom. 15:13) Odja modi ki speransa djuda Jizus aguenta kes dia más difísil li na téra. (Lé Ebreus 12:2.) Jizus sabia ma si el kontinuaba lial, el ta provaba ma tudu kuza ki Satanás fla sobri Jeová é mintira i ma Jeová merese pa nu da-l ónra. Tanbê Jizus ta konsentraba na alegria di ba staba djuntu ku se Pai otu bês i na kel ténpu ki el ta ba staba djuntu ku se irmons na Reinu na séu. Di mésmu manera nos speransa di vive pa tudu ténpu na un mundu novu di Deus ta djuda-nu aguenta kalker prubléma ki mundu di Satanás pô-nu ta pasa pa el.

16. Modi ki speransa djuda un irman aguenta firmi i kuzê ki nu ta prende ku kuzê ki el fla?

¹⁶ Odja modi ki speransa di vive na mundu novu djuda un irman ki ta vive na Rúsia i ki txoma Alla. Es poi se maridu prézu i es leba-l pa kadia timenti el staba ta spera se julgamentu. Kantu kel-li kontise, Alla fla: “Faze orason sobri nos speransa i midita na el djuda-m ka fika dizanimadu dimás. N sabe ma dipôs di kes prubléma kuzas bon sta pa ben. Jeová ta ben kaba ku ses inimigu i el ta ben rekonpensa-nu.”

17. Modi ki nu pode mostra gratidon pa speransa ki Jeová ta da-nu?(Odja imajen)

¹⁷ Kuzê ki bu pode faze. Tra ténpu pa bu pensa na kel futuru rei di sábi ki Jeová promete da-u. Imajina modi ki ta ben ser bu vida na mundu novu di Deus i pensa na kes benson ki nu ta ben ten. I kalker prubléma ki nu pode pasa pa el gósi “é lébi i é pa poku ténpu” óras ki nu ta konpara-l ku kel vida pa tudu ténpu na Paraízu. (2 Kor. 4:17) Tanbê faze tudu kel ki bu ta pode pa bu pâpia sobri bu speransa ku otus algen. Pensa na modi ki é difísil pa es lida ku prublémas di es mundu di Satanás sen sabe di kel speransa pa futuru. Sikrê bu fla-s poku kuza, bu pode pô-s ku vontadi di prende más sobri Reinu di Jeová i se promésa.

18. Pamodi ki nu pode kunfia na kes promésa di Jeová?

¹⁸ Dipôs ki Jó aguenta txeu prubléma i el kontinua fiel, el fla Jeová: ‘Gósi N sabe ma bu ta konsigi faze tudu kuza i ka ten nada ki bu sta pensa na el ki bu ka ta pode faze.’ (Jó 42:2) Sima Jó prende, nada ka ta inpidi Jeová di kunpri se promésa. Sabe di kel-li pode da-nu forsa pa nu pode kontinua ta aguenta firmi. Pur izénplu, imajina un mudjer ki sta duenti i ki sta dizanimadu pamodi dja el bai na txeu dotor i ninhun di es ka konsigi atxa kura pa se duénsa. Má, óras ki un dotor ki ten txeu spiriénsia i ki el ta kunfia na el ta diskubri kal ki é se duénsa i el ta splika-l modi ki el ta ba kura-l, kel mudjer ta xinti aliviadu, sikrê ta ba leba algun ténpu ti ki el kuradu. Gósi el ta konsigi aguenta firmi pamodi el sabe ma el ten speransa di ben midjora. Di mésmu manera nu pode aguenta firmi pamodi nu sabe ma kel promésa ki Deus faze-nu di un paraízu ta ben kunpri.

19. Kuzê ki nu meste faze pa nu aguenta firmi?

¹⁹ Sima dja nu odja, Jeová da-nu orason, se Palavra, nos irmons i un speransa pa djuda-nu aguenta firmi óras ki nu ta pasa pa prublémas. Si nu faze nos midjór pa nu uza kes kuza li ki Jeová da-nu, el ta kuida di nos timenti nu sta ta pasa pa prublémas difísil ti ki txiga kel dia ki es mundu di Satanás ta dexa di izisti. — Flp. 4:13.