Kuzê ki é Régra di oru?

Respósta di Bíblia

Kes palavra “Régra di oru” ka ta parse na Bíblia. Má txeu algen ta uza kes palavra pa pâpia di un régra di konportamentu ki Jizus inxina. Na kel diskursu txeu konxedu ki Jizus faze na un monti, el fla: “Tudu kuza ki nhos krê pa otus algen faze nhos, nhos faze-s tanbê.” (Mateus 7:12; Lukas 6:31)

• Kuzê ki Régra di oru krê fla?

• Modi ki Régra di oru ta djuda-nu?

• Régra di oru ta inxina-nu da ku obijetivu di resebe?

• Modi ki nu pode aplika Régra di oru?

Kuzê ki Régra di oru krê fla?

Régra di oru ta insentiva-nu trata otus algen sima nu ta gostaba pa es trata-nu. Pur izénplu, nos tudu nu gosta pa nu tratadu ku ruspetu, bondadi i amor. Pur isu, ta faze sentidu nu trata otus algen “di mésmu manera.” — Lukas 6:31.

Modi ki Régra di oru ta djuda-nu?

Régra di oru ta aplika na tudu situason di vida. Pur izénplu, el pode...

• Bira kazamentu más fórti. — Efézius 5:28, 33.

• Djuda pai ku mai kria ses fidju. — Efézius 6:4.

• Djuda-nu da dretu ku nos amigu, vizinhu i koléga di trabadju. — Provérbios 3:27, 28; Kolosensis 3:13.

Régra di oru ta sigi kel mésmu prinsípiu ki nu ta atxa na maior párti di kel ki ta txomadu di Velhu Testamentu. Jizus fla ma kel régra li é kel “ki Lei [kes primeru sinku livru di Bíblia] i Profétas [kes livru di Bíblia ki profétas skrebe] krê fla.” (Mateus 7:12) Kel-li krê fla ma Régra di oru ta mostra un prinsípiu inportanti di Velhu Testamentu, ki é ama nos prósimu. — Romanus 13:8-10.

Régra di oru ta inxina-nu da ku obijetivu di resebe?

Nau. Régra di oru ta konsentra na da. Kantu Jizus da kel régra li, el staba ta inxina modi ki nu debe trata tudu algen, ti mésmu nos inimigus. (Lukas 6:27-31, 35) Nton, Régra di oru ta insentiva-nu pa nu faze kuzas dretu pa tudu algen.

Modi ki nu pode aplika Régra di oru?

1. 1. Presta atenson. Presta txeu atenson na kes algen ki sta na bu vólta. Pur izénplu, talvês bu pode odja un algen ki sta frontadu ta karega bólsas di kónpra, bu pode fika ta sabe ma un di bus vizinhu sta na ospital ô bu pode da kónta ma un koléga di trabadju sta dizanimadu. Si bu “djobe interesi di otus algen”, di serteza bu ta atxa oportunidadi di fla ô faze algun kuza pa djuda-s. — Filipensis 2:4.

2. 2. Poi na lugar di otus algen. Pensa na kel-li: Modi ki bu ta xintiba si bu staba na mésmu situason ki kel algen? (Romanus 12:15) Óras ki bu ta tenta intende modi ki otus algen ta xinti é más fásil bu krê djuda-s.

3. 3. Lenbra ma nos é diferenti di kunpanheru. Kel ki un algen ta gostaba pa bu faze pa el talvês é diferenti di kel ki bu ta gostaba pa un algen faze pa bo. Ten txeu kuza ki bu pode faze pa un algen, má tenta skodje un kuza ki el ta gosta más txeu. — 1 Koríntius 10:24.