Kuzê ki kontise ku ruspetu? — Kuzê ki Bíblia ta fla?

Kada bês ménus algen sta mostra ruspetu. Duentis ta grita ku dotor; pesoas na restoranti ta mostra falta di ruspetu pa kes algen ki ta sirbi-s; pasajerus ta ataka kes algen ki ta trabadja na avion; alunus ta faze trósa, amiasa i ataka profesoris; alguns pulítiku ta faze kuzas ki ta poi pesoas ta pâpia mal di es i otus ta faze di tudu pa tenta mostra ma es é dretu.

Bíblia é un gia di kunfiansa ki ta djuda-nu mostra ruspetu di verdadi. Tanbê el ta splika pamodi ki é poku algen ki ta mostra ruspetu oji.

Kuzê ki kontise ku ruspetu?

Ta da pa odja klaru ma na mundu interu ten kada bês más falta di ruspetu. Ten ménus algen ta trata otus dretu, ku justisa i bondadi.

• Un piskiza ki fazedu ka dura li, mostra ma merkanus ta atxa ma na ses país pesoas sta ta mostra mutu ménus ruspetu gósi di ki na kes últimu 22 anu.

• Na otu piskiza, ki fazedu na 28 país, partisipa 32.000 algen i 65 pursentu di es fla ma nunka es ka odjaba pesoas ta mostra falta di ruspetu sima gósi.

Bíblia dja flaba ma pesoas ta ben konportaba sima nu sta odja oji.

• “Na ténpu di fin, situason ta fika konplikadu i difísil di aguenta. Pamodi ómis ta ben ama sô ses kabésa, ta ama dinheru, ta ser konvensidu, aroganti, ta pâpia kóntra Deus, ka ta obi ku pai ku mai, ta ser ingratu... runhu, [i] ka ta ama kuzas dretu”. — 2 Timótiu 3:1-3.

Pa bu sabe más sobri modi ki es profesia sta ta kunpri, djobe artigu ku téma “Bíblia dja flaba modi ki pesoas ta ben pensaba i konportaba na nos ténpu?”

Un gia di kunfiansa ki ta djuda-nu mostra ruspetu

Na kel mundu li, ki kada bês ménus algen sta mostra ruspetu, milhons di algen diskubri ma Bíblia é un bon gia ki ta inxina-nu trata otus algen dretu. Se konsedjus sobri konportamentu ‘é sénpri di kunfiansa, gósi i pa tudu ténpu’. (Salmo 111:8) Odja alguns izénplu:

• Kuzê ki Bíblia ta fla: “Tudu kuza ki nhos krê pa otus algen faze nhos, nhos faze-s tanbê.” — Mateus 7:12.

  Kuzê ki kel testu li krê fla: Nu debe trata otus algen ku bondadi i ruspetu, sima nu ta krê pa es trata-nu.

• Kuzê ki Bíblia ta fla: “Dja ki nhos bandona mintira, kada un di nhos debe pâpia verdadi ku kunpanheru”. — Efézius 4:25.

  Kuzê ki kel testu li krê fla: Nu debe ser onéstu na tudu kel ki nu ta fla i faze.

Pa bu sabe más sobri kel asuntu li, favor lé:

• Sentinéla ku téma “Kuzê ki pode djuda-nu toma bons disizon?”

• Artigu “Toleránsia — Kuzê ki Bíblia ta fla”.