Organizasons di ómi ta konsigi poi pas na mundu?

Oji sta ta kontise txeu géra na mundu. Pamodi kel-li, Nasons Unidu i otus organizason sta ta sforsa pa mante pas. Pur izénplu, es ta manda pesoas pa reprizenta-s na kes lugar ki tene géra i ses obijetivu é djuda pa situason midjora. António Guterres, ki é sekretáriu jeral di Nasons Unidu, fla: “Kes algen ki Nasons Unidu ta manda pa reprizenta-l é kel párti más inportanti di sforsu ki nu ta faze pa mante pas na mundu.”

Duránti txeu anu, kes organizason li konsigi alguns rezultadu puzitivu. Pur izénplu, es proteje pesoas, es djuda kes rafujiadu volta pa ses país, es da pesoas kumida i otus kuza ki es staba ta meste i es konpo kes lugar sima skóla ô ospital. Má pamodi alguns motivu es ka ta konsigi faze tudu kes kuza ki pesoas ta spera. Un dia ta ben ten pas di verdadi na mundu? Kuzê ki Bíblia ta fla?

Pamodi ki é difísil es konsigi mante pas i kal ki é soluson ki Bíblia ta da?

Un dizenhu di dôs ómi di kósta pa kunpanheru ku mô maradu na petu.

Pamodi ki é difísil: es ka ta konsigi trabadja ku kunpanheru. Nen sénpri é ka fásil kes organizason, ki normalmenti é di país diferenti, trabadja ku kunpanheru. Alvês kel-li ta kontise pamodi es ka ta konkorda ku kunpanheru ô es ten ideia diferenti sobri kuzê ki é más inportanti.

Kal ki é soluson ki Bíblia ta da: ‘Deus di séu ta ben traze un reinu... i el ta ben kaba ku tudu kes reinu [govérnus di ómi], i sô el ta ben fika pa tudu ténpu’. — Daniel 2:44.

Ka ta dura, Deus ta ben kaba ku tudu géra i el ta ben traze pas na mundu interu. (Salmo 46:8, 9) El ta ben poi un úniku govérnu ta fika na lugar di tudu govérnu di ómi. Kel govérnu li é Reinu di Deus, ki sta na séu. Óras ki kel govérnu perfeitu li ben governa téra interu ka ta ten géra más. Pur isu, nu ka ta ben meste pa ninhun organizason di ómi sforsa pa mante pas.

Un dizenhu di un kaxa abértu sen nada déntu di el.

Pamodi ki é difísil: es ten limitason. Nen sénpri kes organizason ka ta tene algen, dinheru ô otus kuza ki es meste ki ta txiga. Pur isu, es ka ta konsigi faze tudu kel ki es ta krê. Tanbê, kes algen ki kes organizason ta manda pa reprizenta-s ten ki trabadja na kes lugar ki situason é difísil i prigozu.

Kal ki é soluson ki Bíblia ta da: “Kel Deus di nos Sinhor Jizus Kristu... pô-l [Jizus] ta xinta na se direita na kes lugar na séu, riba di tudu govérnu, autoridadi, puder”. — Efézius 1:17, 20, 21.

Jeová,a ki é kel Deus Tudu-Poderozu, skodje Jizus pa ser Rei di Reinu di Deus i el da-l tudu kel ki el meste pa el governa dretu. (Daniel 7:13, 14b) Deus da Jizus mutu más puder, konhisimentu, sabedoria i intendimentu di ki kalker govérnu ô organizason di ómi. (Isaías 11:2) Tanbê, Jizus ten un izérsitu di anju poderozu ki el pode uza. (Apokalipse 19:14) Ka ten ninhun situason ki é difísil dimás pa el.

Jizus ta ben uza kapasidadi i otus kuza ki Deus da-l pa kaba ku géra. Má tanbê el ta ben traze soségu, suguransa i pas di verdadi pa tudu algen ki ta ben vive dibaxu di Reinu di Deus. — Isaías 32:17, 18.

Pamodi ki é difísil: lei ta poi limiti na kuzê ki es pode faze. Alvês kes algen ki kes organizason ta manda pa mante pas ka ta konsigi faze kuzê ki es krê pamodi lei ka ta dexa-s. Pur isu, es ka ta konsigi proteje pesoas dretu ô kunpri ses obijetivu.

Kal ki é soluson ki Bíblia ta da: “[Jizus] dadu tudu autoridadi na séu i na téra.” — Mateus 28:18.

Deus da Jizus orientason klaru i tudu autoridadi pa poi pas na mundu. (Juan 5:22) Jizus nunka ka ta ben faze nada ku injustisa i nen faze algun kuza mariadu. (Isaías 11:3-5) É pamodi kel-li ki Bíblia ta txoma Jizus di ‘Prínsipi di Pas’. Tanbê, Bíblia ta fla ma el ta ben governa ku ‘justisa i retidon’. — Isaías 9:6, 7.

Reinu di Deus ta ben traze pas di verdadi

Kes organizason di ómi ki ta sforsa pa mante pas pode midjora situason ô ti kaba ku géra na algun lugar. Má es ka ta konsigi kaba ku ódiu, ki ta poi algen ta faze violénsia.

“Nu ka pode mante pas, si nu ka ten pas. É kel-li ki é prubléma.” — Dennis Jett, ki éra enbaxador di Mérka.

Má Reinu di Deus ta ben traze pas di verdadi pamodi el ta ben djuda tudu algen tra ódiu di ses korason. Pur izénplu, kantu Jizus staba na téra, el mostra ses disiplu pa kuzas ki el fla i ki el faze modi ki es ta fazeba pas i mostraba amor. Odja alguns izénplu:

“Filís é kes ki ta inpenha pa pas”. — Mateus 5:9.

“Ama bu prósimu sima bu kabésa.” — Markus 12:29-31.

“Torna poi spada na se lugar, pamodi tudu kenha ki ta uza spada é spada ki ta mata-l.” — Mateus 26:52.

“Kantu [Jizus] staba ta insultadu, el ka ta insultaba tanbê. Kantu el staba ta sufri, el ka ta amiasaba kes ki staba ta pô-l ta sufri”. — 1 Pedru 2:23.

Jizus fla tanbê ma kes ki ta apoia Reinu di Deus ta mostra amor pa otus algen. Bíblia ta mostra klaru ma kes ki ta ôdia otus algen ka ta ben vive dibaxu di Reinu di Deus:

“Tudu algen ta fika ta sabe ma nhos é nhas disiplu, si nhos ten amor pa kunpanheru.” — Juan 13:34, 35.

“Tudu kel ki ta ôdia se irmon é asasinu”. — 1 Juan 3:15.

“Kel ki ta ama Deus tanbê debe ama se irmon.” — 1 Juan 4:20, 21.

Jeová, ki kria-nu, sabe kal ki é midjór i úniku manera pa mante pas na mundu interu. Se Reinu ta konsigi faze kel ki ningen, nen kes organizason di ómi ki ta sforsa pa mante pas, ka konsigi faze.

a Jeová é nómi di Deus. (Salmo 83:18) Djobe artigu “Ken ki é Jeová?”.

b Na Daniel 7:13, 14, ‘fidju di ómi’ krê fla Jizus Kristu. — Mateus 25:31; 26:63, 64.