Géra na Orienti Médiu — Kuzê ki Bíblia ta fla?

Pesoas na mundu interu sta preokupadu dimás ku kel géra ki sta kontise entri Mérka, Israel i Iron. Kel situason li ta ben piora i el ta ben bira un géra ki ta afeta txeu país? Govérnus ta ben konsigi ivita un dizastri i poi pas na mundu?

Kes algen ki konxe kes profesia di Bíblia pode pergunta si kel géra na Orienti Médiu pode ser komésu di géra di Armajedon ki livru di Apokalipse ta pâpia di el.

Kuzê ki Bíblia ta fla?

Govérnus ta ben konsigi kaba ku géra na Orienti Médiu?

Bíblia ta fla: ‘Ka nhos kunfia na prínsipis nen na fidjus di ómi ki ka ta pode traze salvason.’ — Salmo 146:3.

Nu ka sabe si govérnus ta ben konsigi midjora situason na Orienti Médiu. Má Bíblia ta dexa klaru ma é ka xéfis di pulítika, govérnus di ómi ô grupu di pesoas ki ta ben kaba ku géra i traze pas pa tudu ténpu. É sô Deus ki ta pode ‘kaba ku géra na téra interu.’ — Salmo 46:9.

• Pa sabe más, lé revista Sentinéla ku téma “Modi ki géra ta ben kaba?”

Kel géra na Orienti Médiu sta ta kunpri profesia?

Bíblia ta fla: “Nhos ta ben obi ta papiadu di géra i di notísias di géra. . . . Nason ta ben labanta kóntra nason i reinu kóntra reinu”. — Mateus 24:6, 7.

Kel géra na Orienti Médiu é un di kes sinal di “fin di es mundu” i un próva ma nu sta ta vive na “ténpu di fin”. (Mateus 24:3; 2 Timótiu 3:1) Kes géra ki nu sta ta odja gósi ta mostra ma ka ta dura Deus ta ben kaba ku géra i ku tudu kes otu prubléma ki ta pô-nu ta sufri.

• Pa sabe más, lé artigu ku téma “Kal ki é sinal di ‘ténpu di fin’?”

Armajedon ta ben kumesa na Orienti Médiu?

Bíblia ta fla: “Es djunta-s na kel lugar ki na ebraiku ta txomadu Armajedon.” — Apokalipse16:16.

Géra di Armajedon é ka un géra entri govérnus di ómi ki ta ben kumesa na Orienti Médiu. El é un géra entri Deus i tudu govérnu di ómi i el ta ben afeta mundu interu.

• Pa sabe más, lé artigu ku téma “Kuzê ki é géra di Armajedon?”

Kuzê ki pode djuda-nu mante kalmu?

Bíblia ta fla: “Ka nhos preokupa dimás ku ninhun kuza, má sénpri nhos ora pa Deus i nhos inplora-l pa el orienta nhos na tudu kuza, i sénpri nhos agradese-l.” — Filipensis 4:6.

Jeováa Deus ta konvida-nu pa nu ora pa el. Dja ki Deus ta preokupa ku nos el ta obi nos orason i el ta djuda-nu mante kalmu. (1 Pedru 5:7) Un manera ki el ta faze kel-li é djuda-nu intende pamodi ki sta kontinua ta ten géra, modi ki el ta ben kaba ku géra i kuzê ki el ta ben faze pa kaba ku dór i sufrimentu. — Apokalipse 21:3, 4.

• Pa sabe más sobri modi ki Deus ta djuda-nu, lé artigu ku téma “N ta pode atxa konsolu na Bíblia?.”