Kuzê ki N pode faze si pesoas sta pâpia na nha vida?

Pamodi ki el ta duê txeu?

Alguns algen ta pâpia na bu vida ku maldadi. Pur izénplu, es pode konta un mintira ku intenson di suja bu nómi. Sikrê é ka mutu gravi, el ta duê simé, inda más si bu ta atxaba ma kel algen ki faze kel-li éra bu amigu! — Salmo 55:12-14.

“N fika ta sabe ma un amiga staba ta pâpia di mi na nha kósta, ta fla ma N ka ta preokupa ku otus algen. Kel-la due-m própi! N ka ta konsigi intende pamodi ki el fla un kuza di kel-la.” — Ashley.

Verdadi: Ka ta inporta si kel algen ki spadja un informason sobri bo é bu amigu ô nau, nunka bu ka ta gosta di sabe ma algen sta ta pâpia na bu vida.

Notísia kasábi: Nen sénpri bu ka ta konsigi ivita pa algen pâpia na bu vida

Ten txeu kuza ki ta poi pesoas ta pâpia na vida di algen, sima:

Preokupa ku algen di verdadi. Nos tudu nu gosta di pâpia ku otus algen. Pur isu, é normal nu pâpia ku kunpanheru i sobri otus algen. Na verdadi, Bíblia ta insentiva-nu pa nu “djobe interesi di otus algen”. — Filipensis 2:4.

“Un konbérsu é sénpri más interesanti óras ki nu ta pâpia sobri pesoas!” — Bianca.

“Pa N fla verdadi, N gosta di sabe kuzê ki sta ta pasa ku pesoas i pâpia sobri kel-li ku otus algen. N ka sabe pamodi má é divirtidu.” — Katie.

Ka tene kuza faze. Na ténpu ki Bíblia skrebedu, tinha pesoas ki “ta uzaba tudu ses ténpu livri ta konta ô ta obi nobidadi.” (Atus 17:21) Mésmu kuza ta kontise oji!

“Alvês óras ki ka sta kontise nada interesanti, pesoas ta inventa algun kuza pa es pâpia na el.” — Joanna.

Atxa ma nu ten poku valor. Bíblia ta aviza-nu pa nu toma kuidadu ku tendénsia di konpara nos kabésa ku otus algen. (Gálatas 6:4) Infilismenti, alguns algen ta pâpia mal di otus algen pa es pode xinti ma es é más inportanti.

“Txeu bês, kuzê ki un algen ta fla sobri otus ta mostra ki tipu di algen ki el é. Si el fla un kuza mariadu, kel-li pode krê fla ma el ten invéja di kel algen ki el sta pâpia di el. El ta pâpia na vida di algen pa el xinti midjór i pa el konvense se kabésa ma el é midjór di ki kel algen.” — Phil.

Verdadi: Ô bu krê ô bu ka krê, pesoas ta pâpia na vida di algen. I es ta pâpia na bu vida tanbê.

Notísia sábi: Bu ka meste fika preokupadu dimás

Talvês bu ka ta konsigi ivita pa pesoas pâpia na bu vida, má bu pode disidi modi ki bu ta reaji. Si bu fika ta sabe ma pesoas sta ta pâpia na bu vida, ten peloménus dôs kuza ki bu pode faze.

PRIMERU: Ka bu liga. Txeu bês, midjór soluson é iginora kuzê ki es fla, prinsipalmenti si é ka un kuza mutu gravi. Sigi kel konsedju di Bíblia li: ‘Ka bu ofende faxi’. — Eclesiastes 7:9.

“Un bês pesoas kumesa ta fla ma N staba ta namora ku un rapás ki nen N ka konxeba. Ka ta fazeba ninhun sentidu. Nton N kumesa ta ri i nen N ka liga.” — Elise.

“Ten un bon fama, ta djuda-u vense kes kuza mariadu ki es ta fla kóntra bo. Sikrê es spadja kuzas mariadu sobri bo, ningen ka ta kridita. Verdadi sénpri ta ganha.” — Allison.

Konsedju: Skrebe (1) kuzê ki es fla sobri bo i (2) modi ki bu xinti. Dipôs di pâpia di kel asuntu li ‘na bu korason’, talvês pode ser más fásil ka liga kuzê ki es fla. — Salmo 4:4.

SUGUNDU: Pâpia ku kel algen ki kumesa ta spadja kel informason. Na alguns situason, bu pode atxa ma kel kuza ki sta fladu sobri bo é gravi di tal manera ki bu meste pâpia ku kel algen ki kumesa ta spadja-l.

“Si bu ba pâpia ku kes algen ki pâpia na bu vida, talvês bu ta djuda-s odja ma más sédu ô más tardi, kel algen ki es pâpia na el ta fika ta sabe. I bu pode rezolve kel prubléma i mante pas.” — Elise.

Antis di ba pâpia ku un algen ki pâpia na bu vida, pensa na kes prinsípiu di Bíblia i na kes pergunta ki sta dibaxu.

• ‘Óras ki un algen responde antis di obi informason é tolisi’. (Provérbios 18:13) ‘N sabe tudu kuza ki kontise? N ten serteza ma kel algen ki ben fla-m kuzê ki el obi ka intende mariadu?’

• “Tudu algen debe sta prontu pa obi, má el ka debe pâpia faxi i nen xatia faxi”. (Tiagu 1:19) ‘Gósi é midjór óra pa ba pâpia ku kel algen ki sta pâpia na nha vida? N ten serteza ma N ta konsigi pâpia ku el di manera kalmu sobri kel asuntu? Ô é midjór N dexa pasa algun ténpu pa N fika kalmu?’

• “Tudu kuza ki nhos krê pa otus algen faze nhos, nhos faze-s tanbê.” (Mateus 7:12) ‘Si N staba na se lugar, modi ki N ta krê pa el papiaba ku mi? Na ki óra i na undi ki N ta krê papiaba sobri kel prubléma? Ki manera di pâpia ki ta daba bon rezultadu?’

Konsedju: Antis di pâpia ku kel algen, skrebe kuzê ki bu sta pensa fla. Dipôs spera un simana ô dôs, torna lé kuzê ki bu skrebe i odja si bu krê muda algun kuza. Tanbê, pâpia ku bu pai ô ku bu mai ô ku un amigu maduru sobri kuzê ki bu sta pensa fla, i pidi se konsedju.

Verdadi: Sima txeu kuza na vida, nen sénpri bu ka ta konsigi kontrola kuzê ki algen ta fla sobri bo. Má kel-li ka krê fla ma bu ka ta konsigi kontrola modi ki bu ta reaji!