Efézius 3:20 — “[Deus] ki ten puder pa faze sénpri más di ki kel ki nu ta pidi ô pensa”

“Deus, di akordu ku se puder ki ta aji na nos, pode faze mutu más txeu inda di ki tudu kel ki nu ta pidi ô ki nu ta imajina. Nton, pa el dadu glória”. — Efézius 3:20, 21, Traduson di Mundu Novu.

“Kel ki ten puder pa faze sénpri más di ki kel ki nu ta pidi ô pensa, di akordu ku se puder ki ta aji na nos, pa el dadu glória, na igreja i na Kristu Jizus, pa tudu jerason i pa tudu ténpu. Amén!” — Efézius 3:20, 21, Nova Almeida Atualizada.

Kuzê ki Efézius 3:20 ta siginifika

Apóstlu Paulu mostra ma el ta kunfiaba ma Deus pode responde orason di Se sérvus i faze kel ki es ta pidi-l di un manera ki nunka es ka ta imajina. El pode ti responde ses orason di un manera mutu más midjór di ki kel ki talvês es ta spera.

“Deus, di akordu ku se puder ki ta aji na nos, pode faze”. Jeováa Deus pode da-nu puder, ô forsa ki nu meste pa faze se vontadi. — Filipensis 4:13.

Na versíklu 20, apóstlu Paulu pâpia di un kuza spesial sobri kapasidadi ki Jeová ten di djuda kes ki ta adora-L. Ta pâpia sobri kes palavra “Deus... pode faze”, un livru fla: “Kel versíklu li ka sta sô ta fla ma Deus pode faze algun kuza ô ma talvês el ta faze-l. Má, el krê fla ma el ten puder di faze-l.” Alvês, un amigu pode krê djuda-nu, má nen sénpri el ta konsigi. Má, Jeová é diferenti. Sénpri el pode faze kel ki meste pa kuida di kes algen ki ta adora-l i responde ses orason. El é úniku algen ki se puder i se autoridadi ka ten limiti. — Isaías 40:26.

“Deus. . . pode faze mutu más txeu inda di ki tudu kel ki nu ta pidi ô ki nu ta imajina.” Jeová pode da kes algen ki ta adora-l más di ki kel ki es meste ô ti “mutu más txeu inda”. El pode djuda-s mutu más di ki kel ki es ta atxa ma é txeu.

Kes palavra “más txeu inda di ki tudu kel ki nu ta pidi ô ki nu ta imajina” ta inxina-nu más un kuza sobri es versíklu. Kantu apóstlu Paulu fla “más txeu inda di ki tudu kel ki nu ta pidi ô ki nu ta imajina”, el kreba pa tudu kristons intendeba ma Deus pode djuda-s di un manera ki es ka sta spera. Traduson di Sosiadadi di Bíblia Purtugês traduzi versíklu 20 di kel manera li: “Kel ki pa kel forsa ki el ta da-nu, ten puder pa faze mutu más di ki kel ki nu ta pidi-l ô ki nu ta konsigi imajina.” Alvês, kristons pode xinti ma ses prublémas é grandi dimás ô ma é difísil di rezolve. Talvês es pode nen ka sabe sobri kuzê ki es pode ora. Má, ka ten situason ki Jeová ka ta konsigi intende ô djuda-nu. Na se ténpu, el pode rezolve kalker prubléma di un manera ki nen nu ka ta imajina ô atxa ma é posível. (Jó 42:2; Jeremias 32:17) Timenti prubléma ka rezolve, el ta da-nu kel forsa ki nu meste pa nu konsigi aguenta firmi i ti mésmu kontinua ku alegria! — Tiagu 1:2, 3.

Kuzê ki kes versíklu antis i dipôs di Efézius 3:20 ta fla

Livru di Efézius é un karta ki apóstlu Paulu skrebe pa kes kriston ki ta viveba na sidadi di Éfezu, na Ázia Menór, ki oji ta faze párti di Turkia. Na se karta, Paulu skrebe kel orason ki el faze pa es. (Efézius 3:14-21) El ora ta pidi pa es imita manera di pensa i di aji di Jizus, i asi es ta konxeba amor di Kristu. Kel-li é un kuza ki tudu kristons meste faze. Paulu tirmina se orason ta lova Deus i ta fla kes palavra ki sta na Efézius 3:20, 21.

Odja kel vídiu li pa bu sabe más sobri livru di Efézius.