Gálatas 6:9 — “Ka nu dizisti di faze kel ki é dretu”

“Ka nu dizisti di faze kel ki é dretu, pamodi nu ta kodje na ténpu sértu si nu ka dizanima.” — Gálatas 6:9, Traduson di Mundu Novu.

Kuzê ki Gálatas 6:9 ta siginifika

Apóstlu Paulu insentiva kristons pa kontinua ta faze kel ki é dretu, di akordu ku vontadi di Deus. Si es faze kel-li, es pode ten serteza ma Deus ta rekonpensa-s.

“Ka nu dizisti”. Kel frazi li pode ser traduzidu pa “ka nu kansa”. Kes palavra li na gregu tanbê pode da ideia di ka dizanima ô ka perde alegria. Ku kes palavra li, Paulu mostra ma el tanbê alvês el tinha ki lutaba ku dizánimu. — Romanus 7:21-24.

“Faze kel ki é dretu,” ta involve tudu kuza ki un kriston debe faze na se adorason pa Deus. Kel-li ta inklui kes kuza ki un algen ta faze pa djuda ses irmon i otus algen. — Gálatas 6:10.

“Nu ta kodje na ténpu sértu si nu ka dizanima.” Kes palavra li di Paulu é pa lenbra-nu ma pode leba ténpu antis di nu odja kes bon rezultadu di faze kel ki é dretu, sima ta leba ténpu pa plantason di un agrikultor kria. Ku kel konparason li, Paulu mostra ma kel versiklu li sta ligadu ku un verdadi inportanti ki sta na versiklu 7: “Kel ki un algen símia, é kel ki el ta kodje tanbê.” Di otu manera, nu pode fla ma óras ki un kriston ta faze kel ki é dretu pa Deus, el ta kodje un rekonpénsa grandi, ki ta inklui vida pa tudu ténpu. — Romanus 2:6, 7; Gálatas 6:8.

Kuzê ki kes versiklu antis i dipôs di Gálatas 6:9 ta fla

Apóstlu Paulu skrebe kel karta li pa vólta di anu 50 ti 52 D.K. pa kes kriston ki ta moraba na Galásia. El faze kel-li pa proteje kes kriston di influénsia di kes algen ki ta flaba ma es é kriston, má ki staba ta distorse kes verdadi sobri Jizus. (Gálatas 1:6, 7) Kes instrutor falsu staba ta fla ma kristons meste obiba ku Lei ki Deus daba nason di Israel na pasadu através di Muizés. (Gálatas 2:15, 16) Paulu splika ma Lei dja kunpriba se obijetivu i ma sérvus di Deus ka meste obiba ku el más. — Romanus 10:4; Gálatas 3:23-25.

Kantu Paulu fla kes kriston pa es kontinua ta “faze kel ki é dretu,” el ka staba ta fla-s pa es obiba ku Lei di Muizés. Envês di kel-li, el staba ta fla-s pa es “kunpri lei di Kristu” i kel-li ta inklui tudu kes kuza ki Jizus inxina sobri faze kuzê ki é dretu pa otus algen. — Gálatas 6:2; Mateus 7:12; Juan 13:34.

Odja kel vídiu li pa bu sabe más sobri livru di Gálatas.