“Nha amor pa Jeová djuda-m”

I modi ki ami, ki antis éra kumunista, bira ta faze párti di un relijion ki es ta atxa ma éra inimigu di govérnu? I modi ki amor di Jeová i manera ki el trena-m djuda-m midjora nha manera di ser i aguenta tudu kes anu ki N staba na kadia ta faze trabadju forsadu?

Ta djobe justisa i pas déntu mi

N nase na anu 1930, na Tabani, un zóna póbri ki ta fika na nórti di Moldávia. Nha pai ku nha mai ta trabadjaba duru na kanpu di agrikultura pa es pode kuidaba di ses 6 fidju. Nu ka tinha txeu kuza. Nha mai ta fazeba párti di Igreja Ortodoksu di Rúsia. Es ta diskutiba txeu pamodi kes kuza mariadu ki saserdótis ta fazeba.

Dipôs ki N tirmina skóla ku 18 anu, N entra na Komsomol, un organizason di jóvens ki ta difendeba ideias kumunista. Ses obijetivu éra pripara kes jóven pa faze párti di Partidu Kumunista. Ka dura txeu, N bira sekretáriu di grupu di kel zóna. N ta gostaba di kuzas ki es ta inxinaba, ma tudu algen éra irmon i devia tratadu igual i di manera justu. Má óras ki N ta odjaba tudu korupson i injustisa na sosiadadi, N ta xintiba un vaziu déntu mi.

Dja ki mi éra ménbru di Komsomol, óras ki govérnu di Union Suviétikaa ta tomaba disizon di fitxa igrejas i kaba ku grupus relijiozu, N tinha ki apoiaba ses disizon. Na nos zóna tinha alguns Tistimunha di Jeová. Sikrê dja N odjaba na ses konportamentu ma es éra onéstu i algen di pas, N ta atxaba ma es éra fanátiku. Má, N ka sabia ma poku ténpu dipôs, un di es ta ba respondeba txeu di kes pergunta ki N tinha.

Mi ku nha tiu Dimitriy, nu ta moraba na mésmu zóna. El éra Tistimunha di Jeová. Un dia na anu 1952, el pergunta-m: “Georgiy, kuzê ki bu krê faze ku bu vida?” El é úniku algen ki preokupa i tevi koraji di faze-m kel pergunta li. N tinha txeu pergunta ki inda N ka atxaba respósta. Pur izénplu, sénpri N ta perguntaba: ‘Si Deus izisti, pamodi ki ten txeu sufrimentu?’ Duránti 8 dia, nha tiu Dimitriy uza Bíblia pa responde nhas pergunta. Alvês nu ta papiaba sobri Deus ti três óra di madrugada!

Dipôs di kel-li, N disidi studa Bíblia asériu. N da kónta ma N tinha un Pai na Séu ki ta amaba mi di verdadi. (Salmo 27:10) Nbóra N tinha poku konhisimentu di Bíblia, nha amor pa Jeová djuda-m toma alguns disizon. Sikrê ku amiasa di xéfi di kel zóna, N dexa di faze párti di Partidu Kumunista. I na setenbru di anu 1952, kuatu mês dipôs ki N kumesa ta studa Bíblia N da nha vida pa Jeová i N batiza.

Nha amor pa Jeová podu na próva

Na kel ténpu, óbra di Tistimunhas di Jeová staba proibidu. Má N kria mostraba nha amor pa Jeová na kuzas ki N ta fazeba. Pur isu N oferese pa leba publikasons pa irmons ki ta viveba na alguns zóna. Kel-li éra prigozu pamodi si algen di kes zóna diskunfiaba di un stranhu, es podia txomaba autoridadi. Na verdadi, ti alguns Tistimunha di Jeová diskunfia di mi, pamodi es ta atxaba ma mi éra un spion ki staba ta finji ser Tistimunha di Jeová. Má, ka dura txeu pa es da kónta ma N ka éra un spion. Dôs mês dipôs ki N batiza, N kondenadu i N podu prézu pamodi N staba ta leba publikasons ki éra proibidu.

N fika prézu kuazi un anu antis di N julgadu. I duránti kel ténpu kes guarda ta fazeba mi txeu pergunta i tenta pô-m ta ser disleal. Má nha amor pa Jeová éra fórti. Dipôs N lebadu pa tribunal na sidadi di Odessa na Ukránia. Nha pai ku nha mai i nhas irmon, ki na kel ténpu ka éra Tistimunha di Jeová, txomadu pa bai tribunal.

Duránti nha julgamentu, es tenta pasa ideia ma mi éra un algen ki nganadu pa faze párti di un relijion prigozu. Kes autoridadi kria pa nha pai ku nha mai i nhas irmon pensa ma dja N biraba dodu. Nha pai ku nha mai fika ku medu. Es txora i es pidi-m pa N dexa di ser Tistimunha di Jeová. Má N fika kalmu i N fla nha mai: “Ka bu preokupa, N ka nganadu. N atxa kel ki N staba ta djobe nha vida interu i nunka N ka ta larga-l.” (Provérbios 23:23) N ka tinha txeu konhisimentu di Bíblia, má kel ki N sabia sobri Jeová dja txigaba pa N kontinua lial pa el. I 6 anu dipôs nha pai ku nha mai prende más sobri nhas krénsa, es da kónta ma kel-li éra verdadi i es bira Tistimunha di Jeová.

Es kondena-m pa 15 anu i es manda-m di konboiu pa Kolyma ki éra un zóna na Sibéria undi ki tinha txeu kanpu di trabadju forsadu. Pa kontrola tudu kes prézu, kes guarda i kes pulísia ta sotaba nos i es ta dexaba nos pasa fómi. Na komésu N ta perguntaba si N ta skapaba.

N xinti ma Deus kuida di mi ku amor i el trena-m

Lógu ki N txiga, alguns di kes 34 Tistimunha di Jeová ki staba prézu na kanpu pergunta-m ku kuidadu: “Ten algun Jonadabi na bu grupu?” Lógu N da kónta ma es éra nhas irmon. Sô es ki ta uzaba kel palavra li ki sta na Bíblia. Kes irmon spritual ki tinha más spiriénsia djuda-m odja modi ki N pode aplika prinsípius di Bíblia na situason difísil i tanbê djuda-m dizenvolve bons kualidadi sima disirnimentu.

La N ta trabadjaba ku mákinas. Un dia, un koléga di trabadju ki txomaba Matphey kumesa ta ngaba ma dja el dikoraba nómi di 50 santu. Kantu N fla un kuza mariadu sobri kes santu ki el fla-m di el, el tenta da-m un soku, má N sai N kóre. Dipôs, kantu N odja irmons ta ri N fika xatiadu i N fla-s: “Pamodi ki nhos sta ri? N kria da-l tistimunhu!” Ku jetu, es lenbra-m ma nos obijetivu é pâpia sobri notísias sábi, é ka ofende algen. (1 Pedro 3:15) Nbóra Matphey ka ta konkordaba ku kes ideia di govérnu, el fika dimiradu pamodi Tistimunhas di Jeová ta ruspetaba kes guarda i autoridadis. Dipôs el mostra interesi pa verdadi. Nunka N ka ta skese di kel noti ki el batizadu sukundidu déntu di un baril di agu friu.

Poku ténpu dipôs ki nu txiga na kanpu, mi ku dôs irmon nu konvidadu pa nu ba sisti aulas sobri pulítika. Na komésu nu nega bai. Nu ta atxaba ma si nu sisti kes aula nu staba ta mete na pulítika. (João 17:16) Pa kastiga-nu, es pô-nu na un sela sukuru duránti dôs simana. Kantu nu tradu di la, alguns irmon splika-nu ku jetu ma sô sisti kes aula ka éra mete na pulítika. Má kel-la podia ser un xansi di da un grandi tistimunhu. Kes irmon amorozu djuda-nu dizenvolve sabedoria i aplika prinsípius di Bíblia pa nu toma bons disizon.

Manera ki irmons trena-m ku paxénxa, éra un próva ma Jeová staba ta kuida di mi. Pur izénplu, un di kes prézu ki éra padri, skodjedu pa ser xéfi di kontabilidadi. Tudu bês ki nu ta nkontraba na óra di kume, el ta flaba mi: “Modi ki bu sta fidju di Diabu!” Otu prézu fla-m ma óras ki el fla-m si pa N responde-l: “N sta dretu nha pai!” Infilismenti, pamodi N obi se konsedju i N faze si, es kaba pa sota-m riju. Kantu irmons da kónta di kuzê ki kontise, es djuda-m ntende ma N ka devia ajiba si. (Provérbios 29:11) Dipôs, N pidi kel padri diskulpa.

Antis di N lebadu pa kel kanpu di trabadju forsadu, N ta kustuma sistiba runion sukundidu di noti ô di palmanhan. Má la nu ka tinha undi sukundi. Pur isu, tudu dia nu ta djuntaba un grupu i nu ta fikaba undi ki guarda ta odjaba nos pa nu pâpia di alguns testu di Bíblia ki nu tinha skrebedu na padás di papel pikinoti. Nos obijetivu éra dikora tudu testu ki nu ta podeba i pensa na es sénpri. Óras ki un guarda ta paraba nos runion, nu ta nguliba kes papel faxi.

Sikrê prézu, má ka lonji di amor di Deus

Dipôs ki N libertadu di kanpu na anu di 1959, N mandadu pa Karaganda na Kazakiston. Nbóra inda N staba na liberdadi kondisional, N pidi autoridadi lisénsa di 20 dia pa N pode kaza. N viaja pa Tomsk na Rúsia, undi ki N konxe un irman ki éra fiel i bunita ki txomaba Maria. Ami éra sénpri dirétu. Pur isu N fla-l lógu: “Maria, N ka ten ténpu pa namora, kaza ku mi!” El seta lógu i nu faze un kazamentu sinplis. El ta daba txeu valor pamodi kes provason ki N pasa pa el. El kria djudaba mi kontinua ta sirbi Jeová. — Provérbios 19:14.

Na anu 1960 éra proibidu prega di kaza en kaza. Má simé nu ta pruvetaba tudu oportunidadi pa nu pâpia ku otus sobri nos krénsas. Óras ki algen ta konvidaba nos pa nu bai ses kaza ô si nu staba di féria, nu ta pruvetaba oportunidadi pa pâpia ku es sobri nos speransa di vive pa tudu ténpu na Téra. Tanbê nu ta kriaba oportunidadis pa pâpia ku otus. Pur izénplu, óras ki nu ta vizitaba kes kaza ki staba di bénda, nu ta tenta papiaba ku kes dónu sobri alguns kuza spritual. Di kel manera li mi ku Maria nu konsigi kumesa studus di Bíblia ku 6 algen ki bira Tistimunha di Jeová.

Alvês nu ta daba tistimunhu duránti ténpu di ileison. Un dia, pulísia bai na fábrika undi mi ku alguns irmon ta trabadjaba, i na frenti di uns 1.000 koléga di trabadju es pergunta-nu pamodi ki Tistimunhas di Jeová ka ta mete na pulítika. Kel enjinheru ki éra xéfi i otus koléga difende-nu. Es fla kes pulísia ma nos éra responsável i bons trabadjador. Manera ki es aji, da-nu forsa pa nu splika nos krénsas i fla alguns testu ki nu tinha na kabésa. Pamodi kel tistimunhu li ki nu da, kuatu di nos koléga di trabadju mostra interesi na verdadi i es batizadu na ménus di un anu.

Na komésu di anu 1970, txeu algen ki tinha bon korason bira Tistimunha di Jeová na Kazakiston, i nu odja ma tinha nisisidadi di nu organiza nos primeru asenbleia. Má modi ki nu ta fazeba kel-li sen autoridadis da kónta? Nu disidi faze asenbleia djuntu ku un kazamentu na un vila pértu di sidadi di Almaty. Nos runion foi tantu un kazamentu kómu un asenbleia. Staba 300 konvidadu i kes noivu. Nha mudjer ku otus irman trabadja txeu pa dikora kel lugar. I es pripara un kumida sábi. Kuzê ki más kes konvidadu gosta foi kes diskursu ki kes irmon faze ku bazi na Bíblia. Na kel dia, pa primeru bês, N faze un diskursu na frenti di txeu algen.

Amor pa Deus pô-nu ta aguenta firmi duránti provasons

Nha mudjer ki N krê txeu, Maria, foi sénpri fiel i el djuda-m txeu duránti se vida. El éra un algen kalmu i ki ta obiba. El ta poba asuntu di Reinu na primeru lugar na se vida. Nbóra el éra un mudjer ki ta parseba ma el tinha un bon saúdi, dirapenti el dizenvolve un duénsa gravi ki pô-l kuazi 16 anu na kama. Ku ajuda di nos fidju-fémia, Lyudmila ki ten txeu amor, nu kuida dretu di el ti ki el móre na anu di 2014.

Odja Maria, nha mudjer ki N krê txeu ta sufri, pô-m ta xinti sen valor. Má simé, ti últimu dia di se vida, nu lé Bíblia djuntu i artigus ki ta daba nos txeu koraji. Nu ta papiaba sénpri sobri mundu novu. Alvês N ta staba djuntu ku el i N ta txoraba déntu mi. Má kada bês ki nu leba sobri un promésa sábi di Jeová, nu ta fikaba kalmu i nu ta tinha forsa pa nu kontinua. — Salmo 37:18; 41:3.

Désdi primeru dia ki N da kónta ma Jeová ta amaba mi, sénpri N xinti ma el ta kuida di mi i ma el ta djuda-m. (Salmo 34:19) Dja ki mi éra un jóven ki ka tinha spiriénsia, N xinti amor através di kes ki ku paxénxa, djuda-m midjora nha manera di ser. Kantu N pasa txeu difikuldadi na kanpu di trabadju forsadu, N xinti ma Jeová apoia-m através di se Palavra. I el da-m forsa ki N sta mesteba pa N kuida di nha mudjer, Maria, ti kantu ki el móre. Oji, N pode fla ku tudu sertéza ma nha amor pa Jeová djuda-m duránti nha vida. — Salmo 31:19.