N ganha nha maridu “sen palavras”

N nase na anu di 1952, na Ruménia. Enbóra nha mai éra Tistimunha di Jeová, el staba inativu i pamodi kel-li N ka ta sistiba runion. Alén di kel-li, govérnu di Ruménia éra kumunista i Tistimunhas di Jeová staba proibidu di inprimi publikasons i di faze trabadju di pregason. Pur isu, ti kantu N tinha 36 anu N ka sabia kenha ki é Jeová ô kuzê ki Bíblia ta inxina. Má na anu di 1988, kantu N ta viveba na sidadi di Satu-Mare djuntu ku nha maridu, István, kontise un kuza ki muda nha vida.

Un konviti ki N ka pode negaba

Un dia nha mai ben vizita-m. El fla-m: “N sta bai vizita bu tia. Bu krê bai ku mi? Dipôs nu pode ba faze kónpra.” Dja ki N ka tinha nada pa faze, N seta bai ku el.

Kantu nu txiga na kaza di nha tia, N da kónta ma el staba ta organiza un runion di Tistimunhas di Jeová, ki tinha uns 9 algen ta sisti. N fika ta sabe ma nha mai bira un Tistimunha di Jeová ativu i zeloza otu bês. Kel ki N obi na kel palmanhan mexe txeu ku mi.

Kantu runion tirmina, kel irmon ki staba ta diriji txiga na mi i el fla-m: “Nha nómi é János. N repara ma bu staba ku txeu atenson. Bu gosta di kuzê ki bu obi oji?” N fla-l ma nunka N ka sistiba un runion sima kel-li i ma N krê sistiba otu bês. El pergunta-m: “Bu ta gostaba di studa Bíblia?” Kel-li éra un konviti ki N ka pode negaba. N xinti ma Deus atrai-m pa kes algen la.

Na kel otu dia, János aprizenta-m Ida ki kumesa ta studa Bíblia ku mi. Má N staba ku medu di modi ki István ta ba reajiba óras ki el fikaba ta sabe ma N staba ta studa Bíblia ku Tistimunhas di Jeová. Txeu bês N tenta pâpia ku el sobri kel-li, má el ka ta mostraba interesi pa kuzê ki N staba ta fla-l. N sabia ma el ka staba kontenti ku kuzê ki N staba ta faze.

Má simé, N kontinua ta studa Bíblia i N batiza na agostu di 1989. Kuatu mês dipôs, kel govérnu kumunista di Ruménia perde puder i kel xéfi matadu.

Más opozison

Kantu trokadu di govérnu nu fika ku más liberdadi. Tistimunhas di Jeová fika ta faze runion i pregason di manera livri. Na nha kazu, kel liberdadi li traze-m más opozison. István fla-m: “N ka ta inporta ku kuzê ki bu ta kridita na el, désdi ki bu ka ba prega di kaza en kaza.”

É klaru ki N ka staba ta bai para di prega. (Atus 4:20) Nton, N ta fazeba kel-li sen el da kónta. Má un dia, amigus di István odja-m na pregason di kaza en kaza i es bai konta István. Kantu N txiga na kaza, nha maridu grita ku mi i el fla-m: “Bu ka sta ta ruspeta-m i bu sta ta poi nos família na vergónha!” El pô-m un faka na piskós i el fla-m ma el ta mata-m si N ka para di prega.

N tenta pâpia ku István i mostra-l ma N ta ama-l. Ta parse ma pa un ténpu nhas palavra pô-l ta xinti más kalmu. Má, kantu N ka seta bai pa un kazamentu di un família di nos, na igreja, el fika ku txeu raiba otu bês. Nton el kumesa ta fla-m más kuza ki ta maguaba mi.

Infilismenti N tevi ki aguenta raiba di István pa 13 anu. Duránti kel ténpu la, el fla-m ma el ta divorsiaba di mi. Di vês en kuandu el ta fitxaba pórta i el ka ta dexaba mi entra na kaza. Alvês el ta flaba mi pa N rumaba nhas kuza i pa N saíba di la.

Kuzê ki djuda-m aguenta kel situason difísil? N faze orason i N pidi Jeová pa djuda-m mante kalmu i N xinti ma el djuda-m própi. (Salmo 55:22) Tanbê, kongregason djuda-m txeu. Ansions i alguns irman ku más spiriénsia da-m koraji pa N ka dizisti di nha sirvisu pa Jeová. Es lenbra-m di kel ki Bíblia ta fla ma mudjer debe kontinua firmi i lial pa Jeová asi pa es ganha ses maridu “sen palavras”. (1 Pedru 3:1) Ku ténpu, é kel-li ki kontise ku mi.

Kantu tudu kuza muda

Na 2001, István panha un tronbózi ki ka ta dexaba el anda. El pasa un mês na ospital i txeu simana ta faze tratamentu pa rekupera. Duránti kel ténpu la, N staba na se ladu tudu óra. N ta daba el kumida, pâpia ku el i faze di tudu pa el tinha kel ki el mesteba.

Tanbê, alguns irmon ku irmans di kongregason ba djobe-l. István odja na se vida amor i preokupason di irmons. Txeu irmon oferese pa djuda-m ku kes kuza ki N meste fazeba pa kuidaba di el i ansions staba sénpri prontu pa da-nu koraji i ajuda.

Kes vizita li mexe ku István i kel-li pô-l ta xinti vergónha di manera ki el ta trataba mi. Tanbê, el repara ma ninhun di ses amigu ka ba djobe-l. Nton, kantu el sai di ospital el fla: “N krê studa Bíblia i bira un Tistimunha di Jeová.” N fika txeu kontenti i N kumesa ta txora.

Na maiu di 2005, István batiza. Dja ki el ka ta konsigi andaba, irmons leba-l na un kadera di róda ti bera di pisina i ku kuidadu es leba-l pa déntu di agu i es batiza-l. István bira un irmon zelozu na pregason. N ten bons lenbransa di kes ténpu ki nu pasa djuntu na pregason. Kel-li foi un kuza bon dimás! Imajina kel ómi ki ta fazeba mi opozison pamodi N ta pregaba kes verdadi di Palavra di Deus i ki gósi sta na nha ladu kontenti ta pâpia di kes notísia sábi ku otus algen!

István bira ta ama Jeová más txeu i el uza se ténpu pa studa i dikora versiklus di Bíblia. El gostaba di pâpia di kes versiklu li ku irmons i irmans na kongregason. El ta uzaba kes oportunidadi li pa inkoraja irmons ku irmans.

Saúdi di István ba ta fika kada bês más piór. Dipôs di panha alguns tronbózi más lébi, el perde se kapasidadi di pâpia i el fika un duenti na kama. Kel situason li pô-l ta para di sirbi Jeová? Nau. El kontinua ta lé i ta studa sima el ta konsigiba. Óras ki irmons ku irmans ta vizitaba el, el ta uzaba un ekran pa papiaba ku es i pa djuda-s bira ses fé más fórti. Un irmon fla: “N gosta di odja István. Sénpri N ta volta pa kaza animadu i xeiu di forsa.”

Infilismenti, na dizenbru di 2015, István móre. Se mórti traze-m txeu tristéza. Má kel-li tanbê traze-m pas déntu mi. Kel-li é pamodi txeu ténpu antis di István móre el bira amigu di Jeová. Kel-li é un di kes kuza ki más ta pô-m kontenti. Gósi, István i nha mai sta na mimória di Jeová. Ta ben ser sábi dimás brasa-s otu bês i resebe-s na kel mundu novu i justu di Jeová.

Dja pasa más di 35 anu ki mi ku nha mai nu bai vizita nha tia, i kel-li é un vizita ki nunka N ka ta ben skese. Gósi N ten más di 70 anu i mi é pionera fíksu. N ta atxa ma ka ten un manera midjór di agradese Jeová pa tudu kel ki el faze pa mi. (Salmo 116:12) El djuda-m kontinua lial i kalmu kantu N sufri opozison. Sikrê ku opozison N prende ma nos situason pode muda. Enbóra N ka staba ta spera, N konsigi ganha nha maridu sen palavra.