Modi ki bu pode inxina bu fidju sobri séksu

KES DISAFIU

Uns anu atras, pai ku mai tinha txeu xansi di ser kes primeru ki ta papiaba ku ses fidju sobri séksu. Es podia papiaba ku ses fidju sobri kel asuntu li tintin pa tintin di akordu ku ses idadi i ses manera di ser.

Gósi kuzas dja muda. Ten un livrua ki ta fla: “Gósi, kriansas ta obi i ta odja kuzas sobri séksu kada bês más sédu i kel-li sta kada bês más normal na livrus di kriansa, filmis i prugramas di tilivizon.” Kel-li ta djuda ô ta prujudika mininus?

KUZÊ KI BU DEBE SABE

Kuzas sobri séksu gósi sta na tudu lugar. Ten un profesórab ki skrebe na se livru: “Pesoas ta pâpia sobri séksu i es ta obi sobri séksu na publisidadis, filmis, livrus, múzikas, na prugramas di tilivizon, mensájens, na jogus di konputador, kartás i tilifóni ku konputador. I pamodi kel-li jóvens i kriansas ta pensa ma séksu é. . . kel kuza más inportanti na vida.”

Pamodi ki kel-li ta kontise. Kes algen ki ta faze publisidadi ki ta bende kes ropa kurtu i pertadu ta faze di tudu pa es bende kes ropa li pa mininus. I kel-li ta pô-s ta preokupa txeu ku aparénsia désdi pikinoti. Ten un livruc ki ta fla: “Kes algen ki ta trabadja ku publisidadi sabe dretu kuzê ki mininus krê. Obijetivu di tudu kes publisidadi é poi mininus ta kunpra kes kuza.”

Sô sabe sobri séksu ka ta txiga. Sima ten un grandi diferénsa entri sabe modi ki un karu ta funsiona i ser un kondutor responsável, di mésmu manera ten un grandi diferénsa entri sabe sobri séksu i uza es konhisimentu pa toma disizons ki ta mostra sabedoria.

Kuzê ki nu ta prende: Oji, inda é más inportanti djuda bus fidju i trena ses ‘kapasidadi di pensa’ pa es pode ‘sabe kuzê ki é dretu i kuzê ki é mariadu.’ — Hebreus 5:14.

KUZÊ KI BU PODE FAZE

Pâpia ku bus fidju. Pode parse un bokadinhu stranhu pâpia ku bus fidju sobri séksu, má kel-li é bu responsabilidadi. — Prinsípiu di Bíblia: Provérbios 22:6.

Pâpia sobri séksu poku-poku. Envês di pâpia txeu, pruveta kes momentu ki nhos ta sta más trankilu, talvês timenti nhos sta ta viaja na karu ô nhos sta ta faze algun trabadju na dia-dia. Pa djuda bu fidju pâpia ku bo, pergunta-l kuzê ki el ta atxa. Pur izénplu, bu pode pergunta-l: “Bu gosta di kes tipu di publisidadi li? Pamodi ki bu ta atxa ma es ta uza kes tipu di imaji la pa bende ses produtu?” Dipôs ki bu fidju responde, bu pode pergunta-l: “Kuzê ki bu ta atxa di kel-li?” — Prinsípiu di Bíblia: ­Deuteronómio 6:6, 7.

Inxina bu fidju di akordu ku ses idadi. Antis di bu fidju ten idadi di bai skóla, bu pode inxina-l nómi di órgons seksual i tanbê modi ki el pode proteje di kes algen ki ta krê faze-s abuzu seksual. Sima mininus ta ba ta kria i di akordu ku ses idadi, pai ku mai pode pâpia ku ses fidju sobri séksu di un manera sinplis. Asi, sima es ta ba ta kria es ta konsigi ntende dretu kuzê ki é séksu i kuzê ki Deus ta pensa sobri kel-li.

Inxina bu fidju kuzê ki é dretu i kuzê ki é mariadu. Désdi pikinoti, inxina bu fidju fla verdadi, faze kuzê ki é dretu i ruspeta otus algen. Si bu faze si, dipôs ta ser más fásil bu pâpia ku el sobri séksu. Tanbê pâpia ku el di manera klaru kuzê ki bu ta atxa ma é dretu i kuzê ki é mariadu. Si pa bo séksu antis di kazamentu é mariadu, fla bu fidju. I splika-l pamodi ki kel-li é mariadu i prublémas ki el ta traze. Ten un livrud ki ta fla: “Óras ki un adulesenti sabe ma se pai ku se mai ka ta aprova pa el faze séksu antis di kazamentu, nton ten ménus xansi di el faze kel-la.

Da un bon izénplu. Faze sima bu ta inxina bu fidju. Pur izénplu, bu ta ri óras ki otu algen ta faze piada sobri séksu? Bu ta bisti ropa ki ta fika-u pertadu i kurtu? Bu ta mostra interesi ki bu ka debe pa algen ki bo é ka kazadu ku el? Si bu ta faze kes kuza li, ta ser más difísil bu fidju obi ku bo óras ki bu ta pâpia ku el sobri séksu. — Prinsípiu di Bíblia: Romanos 2:21.

Ka bu pâpia di séksu di manera negativu. Séksu é un prezenti di Deus i el pode traze filisidadi óras ki el ta uzadu dretu, sô na kazamentu. (Provérbios 5:18, 19) Inxina bu fidju ma óras ki el kaza, el pode uza es prezenti li sen preokupa ku kes prubléma ki séksu ta traze antis di kazamentu. — 1 Timóteo 1:18, 19.