Modi ki mai ku pai pode inxina ses fidju sobri séksu?
Respósta di Bíblia
Ken ki debe inxina fidjus sobri séksu? Bíblia ta da pai ku mai kel responsabilidadi li, i txeu di es ta atxa ma kes sujiston li djuda-s txeu:
Ka bu xinti vergónha. Bíblia ta pâpia klaru sobri séksu i sobri kes órgon seksual . Deus fla nason di Israel ma es debe inxinaba ‘kriansas’ sobri kes kuza li. (Deuteronómio 31:12; Levítico 15:2, 16-19) Bu pode uza palavras ku ruspetu ki ta mostra ma nu ka debe atxa ma séksu i pártis íntimu di korpu é vergonhozu.
Inxina poku-poku. Envês di ten un konbérsu kunpridu sobri séksu óras ki bu fidju sta kuazi ta bira adulesenti, splika-l poku-poku sima el ta ba ta konsigi ntende. — 1 Coríntios 13:11.
Inxina manera di konporta. Skólas pode inxina bus fidju alguns kuza sobri séksu. Má, Bíblia ta mostra ma pai ku mai debe inxina ses fidju ka sô sobri séksu má tanbê sobri modi ki séksu debe nkaradu i modi ki es debe konporta. — Provérbios 5:1-23.
Obi kuzê ki bu fidju ta fla-u. Ka bu izajera ô tra konkluzon faxi dimás si bu fidju faze-u perguntas sobri séksu. Envês di kel-li, ‘sta prontu pa obi, má bu ka debe pâpia faxi’. — Tiago 1:19.
Modi ki bu pode proteje bu fidju di kes algen ki ta abuza di mininu
Inxina bu fidju kuzê ki el debe faze si algun algen tenta abuza di el
Inxina bu kabésa. Prende modi ki kes algen ki ta abuza di mininu ta aji. — Provérbios 18:15; djobe kapítlu 32 di livru Os Jovens Perguntam — Respostas Práticas, Volume 1, na purtugês.
Fika sienti na kuzas ki ta kontise ku bu fidju. Ka bu dexa algen pa toma kónta di el sen bu sabe si kel algen é di kunfiansa. Tanbê ka bu dexa bu fidju ‘largadu’. — Provérbios 29:15.
Inxina bu fidju ma el ka debe obi ku tudu algen. Kriansas meste prende ma es debe obi ku ses pai ku ses mai. (Colossenses 3:20) Má, si bu inxina bu fidju ma sénpri el debe obi ku kalker adultu, ta bira más fásil es abuza di el. Pai ku mai ki é Tistimunhas di Jeová pode fla ses fidju si: “Si algun algen manda-u faze algun kuza ki Deus ta fla ma é eradu, ka bu faze”. — Atos 5:29.
Mostra bu fidju modi ki el ta proteje se kabésa. Djuda bu fidju ntende kuzê ki el debe faze si algen tenta faze algun kuza ku el óras ki bu ka sta djuntu ku el. Mostra sénas kurtu pode djuda bu fidju sta más priparadu pa fla: “Para! N sta ba fla kuzê ki bu faze!” i sai di la lógu. Talvês bu meste lenbra ‘bus fidju txeu bês’, pamodi es pode skese faxi. — Deuteronómio 6:7.