Modi ki bu pode ser responsável

KUZÊ KI STA NVOLVIDU NA SER RESPONSÁVEL?

Un algen responsável é di kunfiansa. Óras ki bu pidi un algen responsável pa faze-u un kuza, bu pode ten sertéza ma el ta faze-u el dretu i na óra.

Un mininu pode prende ser responsável désdi pikinoti. Un livrua fla: “Óras ki un mininu ten un anu i três mês, el ta faze kel ki se pai ku se mai fla-l pa el faze. Óras ki el ten un anu i 6 mês, el ta krê faze kel ki se pai ku se mai ta faze. Na txeu lugar óras ki un mininu ten entri 5 i 7 anu, se pai ku se mai ta kumesa ta mostra-l modi ki el pode djuda na kaza. Sikrê kel mininu inda sta pikinoti, el ten kapasidadi di faze txeu trabadju dretu na kaza.”

PAMODI KI É INPORTANTI SER RESPONSÁVEL?

Na alguns lugar, txeu jóven ta tenta bai mora es sô, má es ka ta konsigi i dipôs es ta bai mora ku ses pai i ku ses mai otu bês. Kel-li ta kontise ku alguns jóven pamodi ses pai ku ses mai nunka ka inxina-s uza dinheru dretu, modi ki es ta kuida di kaza ô modi ki es ta kuida di ses responsabilidadi.

Pur isu, é bon bu inxina bus fidju ser responsável gósi, asi es ta sabe kuzê ki es ta faze óras ki es bira adultu. Un livrub fla: “Bu ka krê pa bu fidju dipende di bo ti ki el faze 18 anu i dirapenti pa bu larga-l na mundu pa el ba luta ku vida.”

MODI KI BU PODE INXINA BU FIDJU SER RESPONSÁVEL

Da-l trabadju pa el faze na kaza.

PRINSÍPIU DI BÍBLIA: ‘Ten vantaji na tudu tipu di trabadju duru’. — Provérbios 14:23.

Mininus pikinoti sénpri ta krê djuda ses pai ku ses mai na kalker kuza ki es ta faze. Bu pode pruveta di kel dizeju li i da-s alguns trabadju pa es faze na kaza.

Alguns pai ku mai ka ta krê da ses fidju alguns trabadju pa es faze na kaza pamodi es ta atxa ma ses fidju dja ten txeu trabadju di skóla pa faze.

Má un mininu ki ta djuda na faze kes trabadju na kaza ten más xansi di ten bons rezultadu na skóla, pamodi el ta prende kumesa i tirmina kalker trabadju ki el dadu. Un di kes livruc ki dja nu papiaba di el, fla: “Si nu ka dexa nos fidju djuda óras ki el sta pikinoti i ki el ten vontadi di faze kel-li, el pode kumesa ta pensa ma é ka inportanti djuda otus. Tanbê el pode kumesa ta atxa ma otus algen ten obrigason di faze kuzas pa el.”

Kel-li ta mostra ma óras ki kriansas sénpri ta faze trabadju na kaza, es ta prende djuda otus i ka pensa sô na ses kabésa. Kel-li ta djuda-s xinti ma es ten un lugar inportanti na família i es ta konsigi ntende ma kel-li é un kuza ki es meste faze.

Djuda bu fidju seta se éru.

PRINSÍPIU DI BÍBLIA: ‘Obi konsedju i seta disiplina, pa bu pode bira sábiu na futuru.’ — Provérbios 19:20.

Óras ki bu fidju faze un kuza mariadu, pur izénplu si el straga un kuza di un algen, ka bu tenta sukundi se éru. Un mininu pode seta ma el fadja i el pode pidi diskulpa i ti faze algun kuza pa paga kuzê ki el straga.

Óras ki mininus ntende ma es é responsável pa kes kuza mariadu ki es ta faze, kel-li ta ben djuda-s

• ser onéstu i seta ses éru

• ivita kulpa otus algen

• ivita da diskulpa

• pidi diskulpa óras ki meste