PÁRTI 5

Dilúviu di ténpu di Nué — ken ki obi ku Deus i kenha ki ka obi?

Na ténpu di Nué kuazi tudu algen ta fazeba kuzas mariadu. Génesis 6:5

Dipôs ki Adon ku Eva kumesa ta ten fidju, algen ba ta bira más txeu na Téra. Alguns anju djunta ku Satanás, es rabela kóntra Deus i es ben pa Téra.

Es bira sima ómi i es skodje mudjer pa es kaza ku el. Fidjus di kes mudjer éra jiganti fórti i violéntu.

Mundu fika xeiu di algen mau. Bíblia ta fla ma ‘maldadi di ómis éra txeu na téra i tudu óra es ta pensaba na faze sô kuzas mariadu’.

Nué éra un ómi dretu. Jeová fla-l ma el sta ta trazeba un dilúviu pa El kaba ku tudu algen mau.

Tanbê Jeová fla Nué pa el faze un barku grandi, ki ta txomadu arka, i pa el poi na el se família i tudu tipu di animal.

Nué aviza kes algen ma Dilúviu staba ta binha, má simé es ka obi. Alguns faze-l trósa i otus fika ku raiba di el.

Dipôs ki arka sta prontu, Nué leba kes animal pa déntu di arka i el ku se família tanbê entra.