Stória di Nué i di kel Dilúviu kontise mê ô el inventadu?
Respósta di Bíblia
Dilúviu kontise mê. Deus manda Dilúviu pa kaba ku kes algen mau, má el fla Nué pa faze un arka pa salva kes algen dretu i animal. (Génesis 6:11-20) Nu pode kridita ma Dilúviu kontise mê pamodi el sta na Bíblia, ki ‘ben di Deus’. — 2 Timóteo 3:16.
Verdadi ô stória inventadu?
Bíblia ta mostra ma Nué izistiba mê i ma Dilúviu é ka un stória inventadu, el kontise mê.
Kes ómi ki skrebe Bíblia ta kriditaba ma Nué izistiba mê. Pur izénplu, Esdras ku Lúkas ki fazeba txeu piskiza, inklui nómi di Nué na kes família di nason di Israel. (1 Crónicas 1:4; Lucas 3:36) Kes skritor di Ivanjélhu di Mateus i Lucas skrebe kes kuza ki Jizus fla sobri Nué i sobri Dilúviu. — Mateus 24:37-39; Lucas 17:26, 27.
Proféta Ezekiel tanbê i apóstlu Polu pâpia di izénplu di fé i di justisa di Nué. (Ezequiel 14:14, 20; Hebreus 11:7) Si Nué ka izistiba mê, es ta flaba ma el é un bon izénplu pa nu sigi? Nton, nu pode imita izénplu di Nué i kes otu mudjer i ómis di fé pamodi es izistiba mê. — Hebreus 12:1; Tiago 5:17.
Bíblia ta pâpia tintin pa tintin sobri Dilúviu. Kes stória ki sta na Bíblia sobri Dilúviu ka ta kumesa si: “Un bês”, sima stórias inventadu. Envês di kel-la, Bíblia ta fla kel anu, kel mês i kel dia ki kontise kes kuza ki ten aver ku Dilúviu. (Génesis 7:11; 8:4, 13, 14) Tanbê, el ta pâpia sobri kes medida di kel arka ki Nué faze. (Génesis 6:15) Bíblia ta konta kel stória sobri Dilúviu di manera ki ta prova ma el kontise mê, envês di konta-l sima un stória inventadu.
Pamodi ki Dilúviu ben?
Di akordu ku Bíblia, antis di Dilúviu, ‘maldadi di ómi éra txeu’. (Génesis 6:5) Tanbê, el ta fla ma ‘Deus verdaderu odja ma Téra staba tudu stragadu’. — Génesis 6:11; Judas 6, 7.
Bíblia ta fla ma ken ki staba ta faze kuazi tudu kes kuza mau li, éra kes anju mau ki dixi di Séu pa ben ten konportamentu seksual mariadu ku mudjeris. Kes anju li tinha fidjus ki éra konxedu pa nefilins, ki ta trazeba txeu prubléma i sufrimentu pa gentis di Téra. (Génesis 6:1, 2, 4) Deus disidi kaba ku maldadi pa kes algen dretu podia ten un vida novu. — Génesis 6:6, 7, 17.
Pesoas sabia ma Dilúviu staba ta ben?
Sin. Deus fla Nué ma Dilúviu staba ta ben i el fla-l modi ki el ta fazeba arka pa salva se família i animal. (Génesis 6:13, 14; 7:1-4) Nué aviza pesoas ma Dilúviu staba ta ben, má es ka liga kes avizu. (2 Pedro 2:5) Bíblia ta fla: ‘Nen es ka liga, ti ki Dilúviu txiga i kaba tudu es’. — Mateus 24:37-39.
Modi ki éra kel arka di Nué?
Arka éra un kaxa uma grandi ki tinha más ô ménus 133 métru di konprimentu, 22 métru di largura i 13 métru di altura.a Arka fazedu ku madera i es pô-l alkatron pa déntu ku pa fóra. El tinha três andar, i txeu divizon. Tinha un pórta na ladu i di sertéza janélas, ki ta daba vólta na tudu kel párti di riba. Talvês se kubertura éra un bokadinhu más altu na meiu, asi pa agu pode koreba. — Génesis 6:14-16.
Kantu ténpu ki leba pa Nué faze arka?
Bíblia ka ta fla kantu ténpu ki leba pa Nué faze arka, má ta parse ma el pasa txeu anu ta faze-l. Nué tinha más di 500 anu di idadi kantu ki se primeru fidju nase i el tinha 600 anu kantu ki Dilúviu ben.b — Génesis 5:32; 7:6.
Kantu ki Deus fla Nué pa faze arka, se três fidju matxu dja staba grandi i dja es kazaba. Kel-la talvês leba uns 50 ô 60 anu. (Génesis 6:14, 18) Nton, ta parse ma leba 40 ô 50 anu pa arka sta prontu.
a Bíblia ta fla tamanhu di arka na un medida ki é kôvadu. “Na medida ki ebreus ta uzaba, un kôvadu éra 44,45 cm”. — The Illustrated Bible Dictionary, verson atualizadu, párti 3, pájina 1635.
b Odja artigu “As pessoas nos tempos bíblicos realmente viviam mais?”, na Sentinéla di 1 di dizénbru di 2010, na purtugês, pa bu sabe kantu ténpu ki alguns algen sima Nué vive.