Nha vida staba ta konplika kada bês más txeu

MODI KI ÉRA NHA VIDA ANTIS:

N kria na Los Angeles, ki ta fika na Kalifórnia, na Mérka, na alguns zóna ki ten txeu grupu violéntu, ki ta uza dróga. Nos éra 6 fidju i mi éra kel sugundu fidju.

Nha mai kria-nu na Igreja Ivanjéliku. Má, kantu N bira adulesenti, N ta lebaba dôs stilu di vida diferenti. Na dumingu, N ta kantaba na koru di igreja i na kes otu dia di simana, N ta baba fésta, N ta tinha konportamentu seksual mariadu i N ta uzaba dróga.

N ta xatiaba faxi i mi éra violéntu. Si N staba ta briga ku algen, kalker kuza ta sirbiba mi di arma. Kel ki N prende na igreja ka sirbi-m pa nada. Sénpri N ta flaba: “Vingansa é di Sinhor, má ami é se anju di vingansa!” Na fin di anus 60, kantu N staba na liseu, N influensiadu pa un partidu pulítiku, ki txomaba kes Pantera prétu, i ki ta uzaba violénsia pa luta pa direitus di algen. Pamodi kel-li, N bira ta faze párti di un grupu di studantis ki ta lutaba pa direitus di algen. Nu faze txeu manifestason i pamodi kel-li es ta fitxaba skóla pa un ténpu.

Dja ki mi éra txeu violéntu, kes manifestason ka ta txigaba mi. Pur isu, N kumesa ta partisipa na krimis ki ta mostraba nha raiba. Alvês mi ku nhas amigu ta staba na sinéma ta odja filmis ki ta mostraba modi ki skravus afrikanu sufri na Mérka. Nu ta fikaba uma xatiadu ku kes injustisa li i nu ta sotaba kes jóven branku lógu la. Dipôs nu ta baba kes zóna di algen branku pa nu bai djobe más algen pa nu sota.

Kantu N tinha uns 18 anu, mi ku nhas irmon dja nu éra konxedu pa kes krimi violéntu ki nu ta fazeba. Nu ta tinha txeu prubléma ku autoridadis. Un di nhas irmon ta staba na un grupu violéntu txeu konxedu i N ta pasaba txeu ténpu ku es. Nha vida staba ta konplika kada bês más txeu.

MODI KI BÍBLIA MUDA NHA VIDA:

Mai ku pai di un di nhas amigu éra Tistimunha di Jeová. Es konvida-m pa N sisti un runion ku es, i N bai. Na kel primeru runion ki N sisti, N odja lógu ma Tistimunhas di Jeová éra diferenti. Tudu es tinha un Bíblia i es ta uzaba el. Ti jóvens ta fazeba diskursu! N fika dimiradu kantu N prende ma nómi di Deus é Jeová, i kantu N obi kes algen ta uza kel nómi li. (Salmo 83:18) Tinha algen di txeu rasa diferenti na kongregason, má es ka ta fazeba ningen diskriminason.

Na komésu, N ka krê studaba Bíblia ku Tistimunhas di Jeová, má N gostaba di bai runion. Un dia di noti timenti N staba na runion, alguns di nhas amigu bai odja banda ta toka. La na kel lugar es da un jóven pankada ti ki es mata-l, pamodi el ka krê daba es se kazaku di péli. Na kel otu dia, es fika ta ngaba pamodi es mata kel jóven. Ti mésmu kantu es staba ta julgadu es fika sô ta ri. Maioria di es kondenadu pa fika na kadia pa réstu di ses vida. É klaru ki N fika txeu kontenti pamodi N ka staba ku es kel dia di noti. N disidi muda nha vida i kumesa ta studa Bíblia.

Dja ki N odja txeu diskriminason di rasa, N fika txeu dimiradu kantu N odja modi ki Tistimunhas di Jeová ta trataba kunpanheru. Pur izénplu, kantu un ómi di kor branku, ki éra Tistimunha di Jeová, staba ta viaja pa otu país, el dexa se fidjus ku otu família di kor prétu pa es kuida di es. Tanbê, un família di kor branku resebe un jóven di kor prétu na ses kaza ki ka tinha undi mora. N fika konvensidu ma Tistimunhas di Jeová staba ta faze kel ki Jizus fla, ki sta na João 13:35: ‘Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.’ Ti ki enfin N atxa un família di verdadi.

Na nha studu di Bíblia, N da kónta ma N meste fazeba mudansa na nha manera di pensa. N tevi ki seta ma N mesteba ka sô ser un algen di pas, má tanbê ten sertéza ma kel-li éra kel midjór manera di vive. (Romanos 12:2) Poku-poku, N ba ta muda nha vida. I na mês di janeru di anu 1974, N batiza i N bira Tistimunha di Jeová.

Má mésmu dipôs ki N batiza, N mesteba kontinua ta sforsa pa N kontrola nha manera di ser. Un bês timenti N staba ku un grupu di irmons ta prega di kaza en kaza, un ladron furta rádiu di nha karu i N kóre se tras. Kantu N staba kuazi ta txiga na el, el bota kel rádiu na txon i el fuji. Kantu N torna volta pa kel grupu di irmons, N fla-s modi ki N konsigi toma nha rádiu otu bês. Un ansion pergunta-m: “Stephen, abo nton si bu pegaba el éra modi?” N fika ta pensa na kel pergunta li i N odja ma inda N mesteba sforsa pa N ser un algen di pas.

Na mês di otubru di anu 1974, N kumesa ta sirbi pa ténpu interu i N ta daba 100 óra pa mês ta inxina otus algen sobri Bíblia. Dipôs, N tevi priviléjiu di sirbi di livri vontadi na sédi mundial di Tistimunhas di Jeová na Brooklyn, na Nova York. Na anu 1978, N volta pa Los Angeles pa N kuida di nha mai ki staba duenti. Dôs anu dipôs, N kaza ku Aarhonda. Nha mudjer ki N krê txeu, djuda-m txeu pa N kuida di nha mai ti ki el móre. Ku ténpu, mi ku Aarhonda nu kursa Skóla di Jiliádi di Tori di Vijia i nu mandadu pa Panamá, pa nu ser misionáriu la i ti oji é la ki nu sta ta sirbi.

Désdi ki N batiza, N pasa pa txeu situason na vida ki pode poba mi ta aji ku violénsia. N prende afasta di kes algen ki ta provokaba mi ô rezolve situason na pas. Txeu algen, ku nha mudjer ku tudu, ilojia-m pa manera ki N lida ku kes situason la. Ti N fika spantadu ku nha kabésa! N ta atxa ma nunka N ka ta konsigiba muda nha manera di ser mi sô. Envês di kel-li, N ten sertéza ma kel-li é un próva ma Bíblia ten puder di muda vida di algen. — Hebreus 4:12.

BENSONS KI N RESEBE:

Bíblia da-m un obijetivu na vida i el inxina-m ser un algen di pas. Gósi, envês di maltrata otus algen, N ta faze nha midjór pa N djuda-s konxe Deus. N inxina ti un algen ki nu éra inimigu na skóla sobri Bíblia! Dipôs ki el batiza, nu mora na mésmu kaza pa un ténpu. I ti inda nos é txeu amigu. Más di 80 algen ki mi ku nha mudjer studa Bíblia ku es, bira Tistimunha di Jeová.

N ta agradese Jeová di korason pamodi el da-m un vida ki ta faze sentidu i N ta xinti kontenti pamodi el da-m un família di irmons ku irmans na mundu interu, ki é txeu unidu.