MODI KI NU PODE VENSE ÓDIU?

3 | Tra ódiu di bu menti

Kuzê ki Bíblia ta fla:

‘Nhos troka nhos manera di pensa pa nhos pode transforma, asi nhos ta prova nhos kabésa kal ki é kel vontadi di Deus, ki é dretu, ki é perfeitu i ki el ta seta.’ — ROMANOS 12:2.

Kuzê ki Romanos 12:2 krê fla:

Deus ta nporta ku kes kuza ki nu ta pensa. (Jeremias 17:10) Nu debe ivita fla ô faze kalker kuza ki ta mostra ódiu. Má sô kel-li ka ta txiga. É inportanti nu lenbra ma ódiu ta kumesa na menti i na korason. Pur isu, nu debe para di pensa na kes kuza ki ta pô-nu ta xinti ódiu. Di kel manera li, nu ta konsigi muda nos manera di ser i vense ódiu.

Kuzê ki bu pode faze:

Para i pensa dretu sobri kuzê ki bu ta atxa i ki bu ta xinti sobri otus algen, prinsipalmenti kes algen di otu rasa ô país. Pergunta bu kabésa: ‘Kuzê ki N ta atxa di kes algen li? Nha opinion ten bazi na kel ki N sabe sobri es? Ô nha opinion ten bazi na kes kuza mariadu ki N ta obi otus algen ta fla sobri es?’ Tanbê, ivita redi sosial, filmis ô diverson ki ta poi algen ta xinti ódiu i ta faze violénsia.

Bíblia pode djuda-nu vense ódiu na nos menti i na nos korason.

É ka sénpri ki nu ta konsigi sabe dretu kuzê ki nu ta pensa i ki nu ta xinti. Má Bíblia pode djuda-nu ‘diskubri kuzê ki nu ta pensa i kuzê ki nos korason krê.’ (Hebreus 4:12) Pur isu, kontinua ta studa Bíblia. Konpara bu manera di pensa ku kel ki Bíblia ta fla i faze bu midjór pa bu pensa di un manera ki ta agrada Deus. Ódiu pode sta ben finkadu na nos menti i na nos korason, má Bíblia pode djuda-nu vense-l i libra di el. — 2 Coríntios 10:4, 5.

Stória di vida – STEPHEN

El muda se manera di pensa

Stephen i alguns algen di se família sufri pamodi algen branku ta odiaba es. Pamodi kel-li, el entra na un grupu pulítiku ki ta uzaba violénsia pa luta pa direitus di algen. Dipôs, el kumesa ta faze krimi tanbê. Stephen fla: “Alvês mi ku nhas amigu ta staba na sinéma ta odja filmis ki ta mostraba modi ki skravus afrikanu sufri na Mérka. Nu ta fikaba uma xatiadu ku kes injustisa li i nu ta sotaba kes jóven branku lógu la. Dipôs nu ta baba kes zóna di algen branku pa nu bai djobe más algen pa nu sota.”

Stephen muda se manera di pensa kantu el kumesa ta studa Bíblia ku Tistimunhas di Jeová. El fla: “Dja ki N odja txeu diskriminason di rasa, N fika txeu dimiradu kantu N odja modi ki Tistimunhas di Jeová ta trataba kunpanheru. Pur izénplu, kantu un ómi di kor branku, ki éra Tistimunha di Jeová, staba ta viaja pa otu país, el dexa se fidjus ku otu família di kor prétu pa es kuida di es. Tanbê, un família di kor branku resebe un jóven di kor prétu na ses kaza ki ka tinha undi mora.” Stephen odja ma Tistimunhas di Jeová é sima un família i ma es ta mostra kel amor di verdadi ki Jizus flaba ma se sigidoris ta mostraba pa kunpanheru. — João 13:35.

Kuzê ki djuda Stephen para di ser violéntu i di ôdia otus algen? Testu di Romanos 12:2 djuda-l. El fla: “N da kónta ma N meste fazeba mudansa na nha manera di pensa. N tevi ki seta ma N mesteba ka sô ser un algen di pas, má tanbê ten sertéza ma kel-li éra kel midjór manera di vive.” Dja ten más di 40 anu ki Stephen ten un vida filís i livri di ódiu.