MODI KI NU PODE VENSE ÓDIU?

4 | Buska ajuda di Deus

Kuzê ki Bíblia ta fla:

‘Frutu di spritu é: amor, alegria, pas, paxénxa, bondadi, amor lial, fé, brandura, kapasidadi di kontrola kabésa.’ — GÁLATAS 5:22, 23.

Kuzê ki Gálatas 5:22, 23 krê fla:

Deus pode djuda-u vense ódiu. Se spritu santu pode djuda-nu ten kes kualidadi ki nu ka ta konsigi dizenvolve nos sô. Envês di nu kunfia na nos kapasidadi pa djuda-nu vense ódiu, nu debe kunfia na ajuda ki Deus ta da-nu. Si nu faze kel-li, nu pode xinti sima apóstlu Polu, ki fla: ‘Pa tudu kuza N ten forsa pamodi kel ki ta da-m puder.’ (Filipenses 4:13) Tanbê, nu ta pode fla: ‘Nha ajuda ta ben di Jeová’. — Salmo 121:2.

Kuzê ki bu pode faze:

“Ami éra un algen violéntu, má Jeová djuda-m bira un algen di pas.” — WALDO

Faze orason pa Jeová di korason i pidi-l pa el da-u se spritu santu. (Lucas 11:13) Tanbê, pidi-l pa el djuda-u mostra kes kualidadi ki el gosta. Studa sobri kes kualidadi ki ta djuda-u tra ódiu di bu korason sima amor, pas, paxénxa i kapasidadi di kontrola bu kabésa. Djobe manera di mostra kes kualidadi li na bu vida. I faze amizadi ku kes algen ki tanbê ta mostra kes kualidadi li. Kes tipu di amigu li pode ‘insentiva-u pa amor i pa bons óbra’. — Hebreus 10:24.

Stória di vida — WALDO

El vense ódiu i violénsia

Kantu Waldo éra mininu, el sufri txeu i kel-li pô-l ta xinti txeu ódiu. El fla: “N ta staba sénpri ta briga na rua ku trafikantis di dróga. . . Un dia, un grupu violéntu ki éra nha inimigu, manda un algen pa ba mata-m. El da-m un fakada, má N konsigi skapa.”

Waldo fika uma xatiadu kantu se mudjer kumesa ta studa Bíblia ku Tistimunhas di Jeová. El fla: “N ta odiaba Tistimunhas di Jeová i txeu bês N ta insultaba es. Má, N ta fikaba dimiradu pamodi nunka es ka ta respondeba mi di mésmu manera.”

Dipôs di algun ténpu, Waldo tanbê kumesa ta studa Bíblia. El fla: “Ka foi fásil faze kes kuza ki N staba ta prende. N ta atxaba ma nunka N ka ta konsigi kontrolaba nha konportamentu violéntu. Má, N prende un kuza na Bíblia ki djuda-m txeu.”

Waldo fla: “Alejandro, ki éra kel irmon ki ta studaba Bíblia ku mi, fla-m pa N lé Gálatas 5:22, 23. . . . Alejandro fla-m ma N ka ta konsigi dizenvolveba kes kualidadi la mi sô, má N mesteba ajuda di spritu santu di Deus. Ntende kel verdadi li muda nha manera di pensa!”

Waldo konsigi para di ôdia otus algen pamodi el dexa Deus djuda-l. El fla: “Nhas família ku nhas amigu fika dimiradu ku tudu kes mudansa ki N faze.” Tanbê el fla: “Ami éra un algen violéntu, má Jeová djuda-m bira un algen di pas.”