Ódiu ta ben kaba pa tudu ténpu!

DEUS TA BEN KABA KU KES KUZA KI TA POI ÓDIU NA MUNDU

1. 1. SATANÁS. Es mundu sta xeiu di ódiu pamodi Satanás, ki é kel anju ki rabela kóntra Deus. Deus ta ben kaba ku Satanás i tudu kes algen ki ta mostra ódiu sima el. — Salmo 37:38; Romanos 16:20.

2. 2. KES KUZA DI MUNDU DI SATANÁS. Deus ta ben kaba ku tudu kes kuza di mundu di Satanás ki ta traze ódiu. I tanbê el ta ben kaba ku kes pulítiku i xéfis di relijion dizonéstu, kes ómi di nogósiu ki é ganansiozu, dizonéstu i ki ta pruveta di algen. — 2 Pedro 3:13.

3. 3. INPERFEISON. Bíblia ta fla ma nos tudu nu erda inperfeison. Pur isu nu ten tendénsia di pensa, di xinti i di faze kuzas mariadu. (Romanos 5:12) Kel tendénsia li, ta poi pesoas ta xinti i ta mostra ódiu pa kunpanheru. Ka ta dura, tudu algen ta bira perfeitu i ódiu ta kaba pa tudu ténpu. — Isaías 54:13.

BÍBLIA TA PROMETE MA NU TA BEN VIVE NA UN MUNDU SEN ÓDIU

1. 1. NINGEN KA TA BEN SUFRI PAMODI INJUSTISA. Reinu di Deus ta ben governa Téra. Kel Reinu li é un govérnu na Séu ki nunka ka ta kaba i el ta ben traze justisa. (Daniel 2:44) Prekonseitu i diskriminason ka ta ben ten más. Deus ta ben kaba ku tudu injustisa ki pesoas ta pasa pa el. — Lucas 18:7.

2. 2. TUDU ALGEN TA BEN VIVE NA PAS. Ningen ka ta ben sufri pamodi violénsia ô géra. (Salmo 46:9) Téra ta ben bira un lugar suguru pamodi tudu algen ta ben vive na pas ku kunpanheru. — Salmo 72:7.

3. 3. TUDU ALGEN TA BEN VIVE NA UN MUNDU PERFEITU. Tudu algen ta ben mostra amor verdaderu pa kunpanheru. (Mateus 22:39) Ningen ka ta ben sufri más i nen es ka ta lenbra di kes kuza mariadu ki es pasa pa el. (Isaías 65:17) Ódiu ta ben kaba i tudu algen ‘ta ben ten txeu alegria ku txeu pas.’ — Salmo 37:11.

Bu ta gostaba di vive na un mundu sima kel-li? Oji, txeu algen sta konsigi vense ódiu pamodi es sta ta faze kel ki es sta prende na Bíblia. (Salmo 37:8) É kel-li ki dja kontise ku milhons di Tistimunha di Jeová na mundu interu. Nbóra ses kultura i ses situason na vida é diferenti, es é unidu i es ta ama kunpanheru. — Isaías 2:2-4.

Tistimunhas di Jeová ta fika kontenti di djuda-u sabe modi ki es prende lida ku injustisa i diskriminason. Kes kuza ki bu ta prende na Bíblia pode djuda-u para di xinti ódiu i kumesa ta xinti amor pa otus algen. Bu ta prende modi ki bu pode trata tudu algen ku bondadi, ti mésmu kes algen ki ta parse ma es é ingratu ô ki ta trata-u mariadu. Si bu faze kel-li, bu ta ser más filís gósi i bu ta konsigi da dretu ku otus algen. I más inportanti inda, bu ta prende kuzê ki bu meste faze pa bu ben vive na un mundu sen ódiu óras ki Reinu di Deus ben governa Téra. — Salmo 37:29.